પર્રિકરના અંતિમ દર્શન માટે વડાપ્રધાન મોદી પહોંચ્યા ગોવા /  સુરતના વેડરોડ પર આવેલા એક બિલ્ડીંગમાં લાગી ભયાનક આગઃ આખુ બિલ્ડીંગ ખાલી કરાવાયું / ઝિમ્બાબ્વે, મલાવી અને મોઝામ્બિકમાં ત્રાટક્યું ઈડાઈ નામનું વાવાઝોડુંઃ ૧પ૦ના મૃત્યુઃ સેંકડો લોકો લાપત્તા

 

'સ્ત્રી વાણી સ્વાતંત્રતા ખરેખર કે આભાસી'

જાપાની દંતકથા મુજબ પૃથ્વીનો સૌ પ્રથમ પુરુષ ઈઝનાગી અને સૌ પ્રથમ સ્ત્રી ઈઝનામી હતાં. બન્ને મળતા ત્યારે જો સ્ત્રી ઈઝનામી પોતાની ઈચ્છા પ્રથમ વ્યક્ત કરે તો જન્મતા બાળકો રાક્ષસ બનતા અને પુરુષ ઈઝનામી પોતાની ઈચ્છા પ્રથમ વ્યક્ત કરે તો જન્મતા બાળકો દેવતા બનતા.

અબ્રાહામિક કથા મુજબ ઈડનમાં લીવીથ નામની રૃપસુંદરીએ એકાંતમાં મળેલા આદમની કેટલીક અરૃચિકર માંગણી સ્વીકારી નહીં, તો પછીથી તેના  બાળકો દાનવ બન્યા. આદમ ઈવના ચારિત્ર્યની પણ કસોટી કરતો રહેતો કે તેને દાનવ સાથે સંબંધ  તો નથી ને...

હિંદુ પુરાણ મુજબ ઋષિ જમદગ્નિએ તેમની પત્ની રેણુકાનો શિરચ્છેદ કરાવ્યો હતો. કારણ કે, ઋષિ પત્ની રેણુકા પાણી ભરવા ગયા ત્યારે નદીમાં સ્નાન કરતા કોઈ પુરુષને જોઈને તેમના મનમાં તેની નજીક જવાના વિચાર આવ્યા હતાં.

ભગવાન ઈન્દ્રએ ઋષિનું રૃપ લીધું અને ગૌતમ ઋષિની પત્ની અહલ્યાની સાથે રહ્યા. ખરેખર તો ભગવાને તેને છેતરી હતી, છતાં અહલ્યાને પથ્થરમાં પરિવર્તિત થવું પડ્યું.

અભિનેત્રી તબ્બુની ફિલ્મ 'અસ્તિત્વ'માં તેનો પતિ હંમેશાં બહાર રહેતો હોવાથી તેણે બીજાનો સાથ લીધો, પતિને ખબર પડી ત્યારે તબ્બુએ કરેલી દલીલો ખરેખર સાંભળવા જેવી છે. ફિલ્મનો વિષય જ એ હતો કે સ્ત્રી પોતાની ઈચ્છા વ્યક્ત કરે તો તે ખરાબ છે? હમણાં એક નવી ફિલ્મમાં પણ ચાર સખીઓ બિન્દાસ્ત, ખુલ્લા શબ્દોમાં પોતાની મનની વાત-વિચારો-આવેગો એકબીજા સાથે સેર કરે છે. અન્ય એક ફિલ્મને પ્રદર્શિત કરવાની મનાઈ ફરમાવી હતી. કારણ કે તેમાં સ્ત્રીઓ સેક્સની વાતો કરે છે. ફિલ્મોમાં જ્યારે સ્ત્રીઓ આવી વાતો કરતી હોય ત્યારે તે ફિલ્મને 'એ' સર્ટીફિકેટ આપવામાં આવે છે. સ્ત્રીઓને વિકૃત કહેવાય છે. મારો સવાલ એક જ છે કે શું સ્ત્રીઓ પોતાની બહેનપણીઓ સાથે વિજાતીય પાત્ર કે પતિ સાથેના જીવનની વાત ન કરી શકે? પોતાના વિચારો વ્યક્ત ન કરી શકે? શું સ્ત્રીઓ આવેગો પોતાના સાથી સામે રજૂ ન કરી શકે? પહેલ કરનારી સ્ત્રી ખરાબ છે એવું કેમ માનવામાં આવે છે? ભારત જેવા લોકશાહી દેશ અને અભિવ્યક્તિના સ્વાતંત્ર્યના સંદર્ભમાં મહિલાઓની સ્થિતિ આજે પણ કેવી છે એ જ બતાવવાનો પ્રયાસ ઉપરના કિસ્સાથી આપ્યો છે. પુરુષો 'યારિયા'-'મસ્તી', 'ગ્રાન્ડ મસ્તી' જેવી ફિલ્મોમાં દ્વીઅર્થી સંવાદો બોલી શકે, સ્ત્રીઓને કેવી રીતે વશમાં કરવી અને બેડરૃમ સુધી લાવવી એ અંગે ચર્ચા કરતા હોય, સ્ત્રીઓના યૌવનની ખુલ્લેઆમ ગંદા શબ્દોમાં વર્ણન કરતા હોય તો ચાલે? 'ચશ્મે બદદુર'થી લઈને આજ સુધીની ફિલ્મોમાં પુરુષો સ્ત્રીઓને પટાવવાના ઉપાયો બતાવતા હોય છે, પણ સ્ત્રીઓને આવો અધિકાર નથી. સ્ત્રીઓ જો તેના પક્ષ કે સાથી નિરસ છે તેવું કહે અથવા તેના માટે પોતાના મનમાં કઈ ફેન્ટસી છે એવા વિચારો જણાવે તો ભૂકંપ આવી જાય છે. મોટાભાગે ફિલ્મો કે નાટકોમાં લેખક-નિર્માતા પુરુષો જ હોય છે. આથી સ્ત્રીઓ માટે દ્વીઅર્થી અને ગંદા સંવાદોની ભરમાર ચલાવે છે. પત્નીને બૈરી, બાયડી, હિડંબા, કજિયાળી, એનાકોન્ડા, ફટકો, જવાળામૂખી જેવા અને આગ લખી પણ ન શકાય તેવા શબ્દો વાપરે છે. આપણી કહેવતો અને સુવાક્યોમાં પણ પત્ની મૂર્ખ છે તેવું બતાવે છે. સ્ત્રીનો મોહ પતન નોતરે છે એવું દર્શાવે છે. અગણિત કહેવતો એવી છે કે જેમાં સ્ત્રીઓને હીન-કલંક અને જીવન બરબાદ કરનારી બતાવે છે.

મહિલાઓની દાસી અવસ્થાના મૂળ પૂરાણ કથાઓથી જ નંખાયા છે. તમામ કથાઓ પુરુષોએ જ ઘડેલી છે. તેથી જ સ્ત્રી-પત્ની એટલે રાક્ષસી, કજિયો કરનારી, પતિના હાથે માર ખાતી, પગ દબાવતી, લાજ કાઢતી બતાવાયી છે. પત્નીની વેદના કે સંવેદના દિલમાં જ રહે છે. પતિ સંન્યાસી બની જાય તો પત્નીને એક ક્ષણમાં તરછોડી દે છે. પછી તે પત્નીની ઈચ્છાઓનું શું? તે વિચારવાનું જ નથી. તેણે પણ સંન્યાસી જીવન જ વિતાવવાનું... પતિનો જીવનમાર્ગ કાંટાળો હોય તો પત્નીએ જોડાવું જ પડે. પતિ દારૃડિયો હોય, બેકાર હોય તો પત્ની નાના-મોટા કામ કરીને ઘર પરિવારને સાચવે,  પણ પતિને તો પૂજવાનો જ હોય... પતિની દરેક ઈચ્છા પૂરી કરવાની જ... હા... પોતાની ઈચ્છા વ્યક્ત નહીં કરવાની... આપણી વ્રતકથાઓ પણ સ્ત્રીને સંયમના પાઠ જ શીખવે છે, પણ એવું ક્યાંય જોયું કે એવી કોઈ વ્રત કથા છે કે જેમાં પતિ પત્ની માટે વ્રત કરે?

કમનસીબે મહિલા સશક્તિકરણ અંગેના લેખ કે વક્તવ્ય પણ સ્ત્રીને બંડખોર બનાવે તેવા હોય છે. સ્ત્રીનું સન્માન જળવાય તેવી વાત કોઈ નથી કરતું. બસ સ્ત્રીઓને પુરુષોની વિરૃદ્ધ કરે તેવા લેખ જ હોય છે. ખરેખર તો ઘરમાં કેન્દ્રસ્થાને સ્ત્રીઓ જ છે. તેમની ઈચ્છા-વિચારોનું સન્માન કરવું જ જોઈએ.

ભારતની જ નહીં, પણ જુદી જુદી સંસ્કૃતિની કથાઓમાં પણ સ્ત્રી માત્ર ઈચ્છા પૂર્તિ કરવાનું સાધન દર્શાવ્યું છે. ઈચ્છા વ્યક્ત કરવાની તેને આઝાદી નથી. સુપર્ણખાનું નાક કાપી નખાયું, અહલ્યાને પથ્થર બનાવી દેવાઈ, રેણુકાનો શિરચ્છેદ થયો, મેનકા-શંકુલતા જેવી અપ્સરા ઉપર પણ દેવતાનું-પુરુષનું પ્રભૂત્વ બતાવાય છે. ઋષિઓ રાજાઓ-દેવતાને રિઝવે એ બધી અપ્સરા અને પજવે એ રાક્ષસી... એવી જ ઓળખ મળી છે સ્ત્રીઓને... સુર્પણખાનું નાક શું કામ કપાયું? પોતાને ગમતા પુરુષની નજીક જવા પ્રયત્ન કર્યો એટલે? સુંદર સ્ત્રીઓ-લટકામટકા કરતી સ્ત્રીઓને મેનકા નામ આપવામાં આવે છે. શું કામ તે પોતાની ઈચ્છા વ્યક્ત કરે છે  એટલે? મેનકા ખરાબ છે? ઋષિઓને ઉત્તેજીત કરવા તે નૃત્ય કરે છે, એ પણ ખરેખર તો દેવતાના પ્રપંચનો જ ભાગ છે ને...

આજે સ્ત્રી સ્વતંત્ર છે. પોતાની રીતે જીવી શકે છે, મનગમતા વસ્ત્રો પહેરી શકે છે, ભાવતી વાનગી ખાઈ શકે છે, નોકરી કરવા બહાર જઈ શકે છે, છતાં એક વિષય પર બોલવાની તેને છૂટ નથી, એ છે 'પોતાના તનની ભાષા' મનના વિચારો વ્યક્ત કરી શકે, પણ તેમના વિચારોને શબ્દ ન આપી શકે. પુરુષો સાથે તો સ્ત્રીઓ આ વિષય પર ચર્ચા ન જ કરે, પણ બહેનપણીઓ અંદરોઅંદર વાત કરતી હોય કે આડોશ પાડોશમાં સ્ત્રીઓ આવી વાત કરે તો તેને ખરાબ-હલકા વિચારવાળી એવું બિરૃદ અપાય છે.

'વાણી સ્વાતંત્ર્ય' સ્ત્રીઓ માટે આભાસી શબ્દ છે. પોતાના વિચારો વ્યક્ત કરે તો તેને ચૂપ કરી દેવાય છે. 'સ્ત્રી એટલે દાસી અને હાંસી' એ પુરાણકાળથી ચાલ્યું આવે છે. તેને ઉપભોગનું સાધન  મનાય છે. ઈચ્છાપૂર્તિ માટે તેની જરૃરિયાત છે, પણ સ્ત્રીની ઈચ્છા હોય તો? તે વ્યક્ત કરવાની છૂટ નથી...

મહિલા દિને ફરીથી એક દિવસ માટે સ્ત્રીને દુર્ગા, લક્ષ્મી, શક્તિ કહીને પાનો ચઢાવવામાં આવશે. ફરીથી એક દિવસ માટે સ્ત્રીનો આદર કરવામાં આવશે. સ્ત્રી સ્વતંત્રતાના ભાષણો આપવામાં આવશે, પણ શું સ્ત્રીને વાણી સ્વાતંત્ર્ય છે? વિચારી જો જો... શું એક સ્ત્રી તરીકે તમે તમારા વિચારો-ઈચ્છા-આવેગો વ્યક્ત કરી શકો છો? અન્ય સામે નહીં તો તમારા સાથી સામે પણ વ્યક્ત  કરી શકો છો? જો હા તો... તમે નસીબદાર છો, સ્વતંત્ર છો, જો ના... તો પછી મહિલા દિનની ઉજવણીનો ભાગ બનીને જાતને છેતરશો નહીં.

- દિપા સોની



તરવરિયા બાળકોની નાની નાની વસ્તુ મોઢામાં મૂકવાની જોખમી આદત

એક વર્ષનો પર્વ ઘરમાં રહતો હતો. તેની મમ્મી તેની બાજુમાં જ હતી પણ ફોનની રીંગ વાગવાથી તે ફોન લેવા ગઈ. તે સમયમાં પર્વના હાથમાં તેની મમ્મીનું પર્સ આવી ગયું. પર્સ પકડ્યું કે તેમાંથી એક-બે રૃપિયાના સિક્કા બહાર નીકળ્યા. પર્વએ સિક્કો લઈ લીધો અને રમત રમતમાં સિક્કો મોઢામાં નાખી દીધો. સિક્કો તેના ગળામાં અટવાઈ ગયો. પર્વને શ્વાસ લેવામાં તકલીફ પડવા લાગી. પાંચ મિનિટ પછી તેની મમ્મી આવી તો પર્વ તરફડિયા મારતો હતો. પર્વને તરત હોસ્પિટલમાં લઈ જવાયો અને ડોક્ટરે ખાસ સાધનો વડે ગળામાંથી સિક્કો કાઢી પર્વનો જીવ બચાવી લીધો. ડોક્ટરે પર્વના મમ્મીને દીકરાની સંભાળ લેવામાં સાવચેતી રાખવાની સૂચના આપી.

આવા કિસ્સા લગભગ બનતા રહે છે.  એક સર્વેક્ષણ મુજબ કાન સાફ કરવા માટે ઉપયોગમાં લેવાતા કોટન બડ્ઝ ગળી જવાથી રોજ લગભગ લગભગ ૩૦ થી ૩પ બાળકોને હોસ્પિટલમાં લાવવા પડે પડે છે. મોટાને કોટન બડ્ઝથી કાન સાફ કરતા જોઈને નાના બાળકો પણ તેની નકલ કરીને કોટન બડ્ઝ કાનમાં નાખી દેતા હોય છે અને તેમાં ક્યારેક કાનને ઈજા થાય છે.

ઓઈ ઈન્ડિયા ઈન્સ્ટિટ્યુટ ઓફ મેડિકલ સાયન્સના બાળરોગના ડોક્ટર કહે છે કે આવા ઘણાં કિસ્સા હોય છે જેમાં નાના બાળકની શ્વાસ નળીમાં શર્ટનું બટન, લોખંડની ખીલી, સિક્કા જેવી વસ્તુઓ અટવાઈ જાય છે. અમુક  વખતે તો આવી વસ્તુ મળ દ્વારા બહાર નીકળી જાય છે, પણ છતાં ક્યારેક એન્ડોસ્કોપની મદદથી આ વસ્તુ બહાર કાઢવી પડે છે.

બીજા એક ડોક્ટર કહે છે કે મેં ઓપરેશન કરીને ઘણાં બાળકોના પેટમાંથી ટીવીના રિમોટના પાતળા સેલ, નાની ટોર્ચના સેલ-લોકેટ જેવી વસ્તુ બહાર કાઢી છે. બાળકોની ઉંમર બેથી ત્રણ વર્ષની હોય છે. નાના બાળકો ઘરમાં રમતા-રમતા નાની વસ્તુ માટે જોવે એટલે બાળસહજ જિજ્ઞાસાથી તે ચીજ મોઢામાં મૂકી દે. બાળકો પર મમ્મી-પપ્પાએ સતત નજર રાખવી જરૃરી છે. નાના બાળકો રમતા-રમતા કઈ વસ્તુ હાથમાં લે છે અને ફરતા-ફરતા ક્યાં જાય છે. તેના પર નજર રાખવી જોઈએ. બાળકો સમજણ થાય એટલે તેમને વારંવાર સમજાવવાનો પ્રયત્નો કરવો જોઈએ એ જે-તે વસ્તુ મોઢામાં ન નખાય.

જો કે, આવા કિસ્સામાં બહુ જોખમ નથી હોતું. સામાન્ય રીતે નાની વસ્તુ જાતે જ નીકળી જાય છે, પણ જો બાળક સેલ ગળી ગયું હોય તો ચિંતાની વાત કહેવાય. કારણ કે, સેલમાંના પારાનું ઝેર પીગળીને બાળકના પેટમાં પ્રસરી જાય તો પરિસ્થિતિ ગંભીર બને. ક્યારેક બાળક બિમરીની કોઈ દવા પી જાય કે ટેબલેટ ગળી જાય ત્યારે કાળજી રાખવી પડે.

ઘણાં બાળકોને માટી-ચોક-પેન ખાવાની આદત હોય છે. એક અજીબ કિસ્સો કે ચાર વર્ષનો શિવમ નામનો બાળક ધ રેપ્રન્ઝેલ સિન્ડ્રોમ નામની વિચિત્ર આદતનો ભોગ બન્યો, આ બિમારીમાં બાળકને વાળ ખાવાની ટેવ પડે છે. આવી આદતથી શિવમના પેટમાં વાળનો મોટો જથ્થો જમા થઈ ગયો. તેના ઉદરથી લઈને નાના અને મોટા એમ બન્ને આંતરડા સુધી ફેલાઈ ગયો હતો. પરિણામે તેના પેટમાં ખોરાકની જરાપણ જગ્યા બચી ન હતી. તેના પેટમાંથી ૧૧૭ સેન્ટીમીટર લંબાઈનો વાળનો ગુચ્છો અને દોરાનો જથ્થો બહાર કાઢ્યો હતો.

ગતે તે કહો પણ બાળકો રમતીયાળ - તરવરીયા અને જીજ્ઞાસાસભર હોય છે. તેમના માટે દરેક વસ્તુ અને ક્રિયા નવા હોવાથી તેને લેવા-જોવા અને જાણવાનો પ્રયત્ન કરતા હોય છે. જો કે તેમની આવી જીજ્ઞાસા ક્યારેક જોખમી સાબિત થાય છે. એટલે ઘરમાં નાનુ બાળક હોય તો માતા-પિતાએ સતર્ક રહેવું જોઈએ. બાળક માટે તો તેના માતા-પિતા જ અભેદ સુરક્ષાકવચ ગણાય છે.

- જીજ્ઞા પટેલ



વાનગીઃ ગ્રીન પાસ્તા

સામગ્રીઃ પાસ્તા ર૦૦ ગ્રામ, ટમેટા બે નંગ, તેલ એક ચમચો (ઓલીવ ઓઈલ હોય તો વધુ સારૃ) પાલક એક જુડી, લીલા મરચા બે નંગ, શેકેલા સીંગદાણા રપ ગ્રામ, કેપ્સિક્મ એક નંગ, ફ્રેશ ક્રિમ બે ચમચી, ચીઝ બે ક્યુબ, મીઠું સ્વાદ મુજબ, પાણી જરૃર મુજબ, ઓરેગાનો-મરી પાઉડર જરૃર મુજબ

રીતઃ સૌ પ્રથમ એક ડીપ પેનમાં પાણી લો. તેમાં પાંચ મિનિટ માટે પાલક બ્લાન્ચ કરી લો. હે પાલક કાઢીને તે જ પેનમાં પાણી લઈ મીઠું નાખીને ઉકાળો. પાણી ઉકળે એટલે તેમાં પાસ્તા નાખીને બાફી લો. પાસ્તા બફાઈ જાય એટલે તેને ચારણીમાં કાઢી તેના પર ઠંડુ પાણી નાખી દો. સાથે થોડું તેલ પણ છાંટો જેથી પાસ્તા ચોટે નહીં.

ટમેટાને ઝીણા સમારી લો. ફ્રાય પેનમાં ચમચી તેલ લઈ તેમાં ટમેટા નાખી ચડવા દો. મિક્સરમાં બ્લાન્ચ કરેલી પાલક, લીલા મરચા, શેકેલા સીંગદાણા, એક ચમચી તેલ લઈ મિક્સ કરી તેની પેસ્ટ બનાવો. ટમેટા ચડી જાય એટલે ટમેટા બહાર કાઢી લો અને પેનમાં રહેલા તેલમાં જ કેપ્સિકમ સાંતળો. પછી તેમાં બાફેલા પાસ્તા અને તૈયાર કરેલી પેસ્ટ ઉમેરીને સરખું મિક્સ કરી લો. તેમાં ફ્રેશ ક્રિમ, ખણેલું ચીઝ, ઓરેગાનો, મરી પાઉડર ઉમેરી બરાબર મિક્સ કરો. ઉપર સાંતળેલા ટમેટા ઉમેરી સર્વ કરો.

ગ્રીન પાસ્તા સામાન્ય પાસ્તા કરતા વધુ ઝડપથી બની જાય છે અને તે હેલ્ધી પણ વધારે છે.

  • અવની ચટ્ટ-જુતપુર


હવામાન

weather

શબ્દવ્યુહ

MARKET

માર્કેટ યાર્ડ - હાપા, જામજોધપુર, જામનગર બ્રાસ સીટી:

માર્કેટ યાર્ડ - હાપા   ઘઉં ....242 ...383 । મગ ....800 ...1680 । લસણ ....160 ...805 । ચણા। ....160 ...805   માર્કેટ યાર્ડ - જામજોધપુર   કપાસ। ....780 ...937 । જીરૂ। ....2600 ...3125 । અરેંડા। ....650 ...729   જામનગર બ્રાસ સીટી   બ્રાસ હાની ઢાંળો ...315.00 । બ્રાસ હાની વાસંણ ...327.00 । બ્રાસ હાની પાઈપ ...329.00 । બ્રાસ વિલાયતી ....310.00