નગરના ડો. કિશન મજીઠીયાએ ઓલ ઈન્ડિયા નીટ એસએસમાં મેળવ્યો છઠ્ઠો ક્રમ

ઈક શિખર સે દૂસરા શિખર આસમાની હૈ મેરા સફર

નાની-નાની સફળતાઓથી ખુશ થઈ જનારા લોકો સામાન્ય માણસ હોય છે અને ઊંચા લક્ષ્યો મેળવ્યા વગર સંતોષ ન માનનારા ઈતિહાસ સર્જનારા અસાધારણ લોકો હોય છે. જામનગરના ડો. કિશન એન. મજીઠીયા પણ આવા જ એક અસાધારણ માનવી છે. જેમણે રૃમેટોલોજીની પ્રવેશ પરીક્ષા 'ઓલ ઈન્ડિયા નીટ એસ.એસ. રૃમેટોલોજી'માં રાષ્ટ્રીય સ્તરે છઠ્ઠો ક્રમ મેળવી જામનગરનું ગૌરવ વધાર્યુ છે. ડો. કિશન મજીઠીયાએ તથા તેમના માતા-પિતા નંદકિશોરભાઈ મજીઠીયા અને ગીતાબેન મજીઠીયા સાથે 'નોબત' ના પત્રકાર આદિત્ય સાથે વાર્તાલાપ કરી પોતાની ઝળહળતી સફળતાઓ તથા તેની પાછળના પરિશ્રમ અંગે ચર્ચા કરી હતી.

નગરની બ્રિલિયન્ટ સ્કૂલ તથા ડીસીસી હાઈસ્કૂલના વિદ્યાર્થી રહી ચૂકેલા ડો. કિશને સુરેન્દ્રનગરની સી.યુ. શાહ મેડિકલ કોલેજમાંથી એમ.બી.બી.એસ. કર્યા પછી ઓલ ઈન્ડિયા ડીએનબી એકઝામમાં ર૬મો ક્રમ મેળવી દિલ્હીની પ્રતિષ્ઠીત સર ગંગારામ હોસ્પિટલમાંથી ડીએનબીની ડીગ્રી મેળવી છે. ત્યારપછી જામનગરની જી.જી. હોસ્પિટલમાં ૬ મહિના સિનિયર રજીસ્ટ્રાર તરીકે ફરજ નિભાવી ઓલ ઈન્ડિયા નીટ એસએસ રૃમેટોલોજીની એક્ઝામની તૈયારી કરવા નોકરીમાંથી રાજીનામું આપી દીધું હતું.

ત્યારપછી સતત છ મહિના નિયમિત ૧૪ થી ૧૬ કલાકના વાચન સાથે ફુલપ્રૂફ તેયારી કરી ઓલ ઈન્ડિયા નીટ એસ.એસ. રૃમેટોલોજીમાં રાષ્ટ્રીય સ્તરે છઠ્ઠો ક્રમ મેળવી પોતાના લક્ષ્ય તરફ ગૌરવપૂર્વક આગેકૂચ કરી છે.

રૃમેટોલોજીસ્ટ એક સુપર સ્પેશ્યાલીસ્ટ ડોક્ટર હોય છે, જે આર્થરાઈટીઝ જેવી બીમારીઓનો સુક્ષ્મ ઈલાજ કરે છે. સમગ્ર દેશમાં રૃમેટોલોજીના અભ્યાસની ૩પ થી ૪૦ બેઠક જ ઉપલબ્ધ છે. કદાચ એટલે જ ભારતમાં ખૂબ જ ઓછા રૃમેટોલોજીસ્ટ છે. સમગ્ર સૌરાષ્ટ્રમાં પણ બે થી ચાર જ રૃમેટોલોજીસ્ટ ડોક્ટર છે.

ડો. કિશનને સંભવતઃ યુ.પી.ના લખનઉમાં આવેલ સંજય ગાંધી પોસ્ટ ગ્રેજ્યુએટ ઈન્સ્ટિટયુટ ઓફ મેડિકલ સાયન્સમાં અથવા તમિલનાડુના વેલ્લોરમાં આવેલ કિશ્ચિયન મેડિકલ કોલેજમાં રૃમેટોલોજીનો અભ્યાસ કરવાની તક મળશે.

ડો. કિશનના પિતા નંદકિશોરભાઈ ગ્રેઈન માર્કેટમાં વેપારી છે તથા માતા ગીતાબેન ગૃહિણી છે. ડો. કિશનના બહેન ખુશ્બુ પણ ડોક્ટર છે. ડો. ખુશ્બુ પીડિયાટ્રીક્સ ડિપાર્ટમેન્ટમાં પોસ્ટ ગ્રેજ્યુએશનની તૈયારી કરી રહ્યાં છે. તાજેતરમાં ડો. કિશનનું સગપણ ડો. આરતી પોપટ સાથે થયું છે. તેણી ઓપથોલ્મોલોજીસ્ટ એટલે કે આંખના ડોક્ટર છે.

ડો. કિશનના માતા-પિતા નંદકિશોરભાઈ તથા ગીતાબેન ધાર્મિક તથા આધ્યાત્મિક વૃત્તિના દંપતી છે ત્યારે તેમના બન્ને સંતાનોએ પરિશ્રમના બળે ડોક્ટર બની માતા-પિતાના સંઘર્ષને સાર્થક કર્યો છે એમ કહી શકાય.

ક્રિકેટ મેચ જોવાનો તથા ટ્રાવેલીંગ એન એડવેન્ચરનો શોખ ધરાવતા ડો. કિશન એક્યુરેટ ટાઈમ મેનેજમેન્ટને પોતાની સફળતાનું કારણ ગણાવી જમવા સહિતની રોજિંદી ક્રિયાઓ માટે નિશ્ચિત સમય મર્યાદા ફાળવી મહત્તમ સમયનો ઉપયોગ વાચન માટે કરવાનો અનુભવ સિદ્ધ કિમીયો જણાવે છે. ડો. કિશન રૃમેટોલોજીસ્ટ બની ગયા પછી ગુજરાતના કોઈ મહાનગરમાં સ્થાયી થઈ જામનગરમાં વિઝિટીંગ રૃમેટોલોજીસ્ટ તરીકે સેવા આપવાનો નિર્ધાર ધરાવે છે. તેમના ભૂતકાળના તમામ લક્ષ્યોની જેમ આ લક્ષ્ય પણ સિદ્ધ થાય તેવી શુભેચ્છા...