લોકડાઉન વધે તેવા ભણકારા...

લોકડાઉનના ર૧ દિવસ ૧૪મી એપ્રિલે પૂરા થવાના છે, અને ૧પમી એપ્રિલથી લોકડાઉન લંબાવાની શક્યતાઓ વધી રહી છે, ત્યારે જો લોકડાઉન લંબાવાય તો તેનો પડકાર સરકાર અને તંત્રો માટે પડકારરૃપ બનવાના છે. આ કપરો નિર્ણય લીધા પછી ભારત જેવા દેશમાં તેની વ્યાપક અસરો થવાની ગણત્રીઓ પણ મંડાવા લાગી છે.

ઉત્તરપ્રદેશમાં કેટલાક જિલ્લાઓમાં મુખ્યમંત્રી યોગી આદિત્યનાથે કડક લોકડાઉનનો અમલ શરૃ કરાવ્યો છે અને હોટસ્પોટ નક્કી કરીને તેને સીલ કરી દીધા છે. એ પહેલા રાજસ્થાનના મુખ્યમંત્રી અશોક ગેહલોતે પણ રાજ્યના કેટલાક સ્થળે કરફયુ સહિતના ઉપાયો અજમાવ્યા હતાં. રાજ્ય સરકારો પોતપોતાની રીતે કોરોનાના કહેરને ખતમ કરવાના પ્રયાસો કરીને કેન્દ્ર સરકારને સપોર્ટ કરી રહ્યાં છે. વડાપ્રધાને વિપક્ષના નેતાઓ સાથે કરેલી ચર્ચા, સાંસદો સાથે પરામર્શ અને ચર્ચા દરમિયાન મળેલા સંકેતો એવા જણાય છે કે, કમસેકમ ૧પમી એપ્રિલથી તો લોકડાઉન સંપૂર્ણપણે ઉઠશે નહીં, પરંતુ તે માટે કોઈ વ્યૂહ ઘડીને યોગ્ય સમયે તબક્કાવાર ઉઠશે. જો કે, સરકારે હજુ સુધી કોઈ અંતિમ નિર્ણય લીધો નથી.

એવું બની શકે કે જે જિલ્લાઓમાં કોઈ પોઝિટિવ કેસ આવ્યા જ નથી કે પછી એકાદ-બે કેસ આવ્યા પછી સંક્રમણ વધ્યું નથી, તેવા જિલ્લાઓમાં કેટલીક છૂટછાટો મળી શકે છે, પરંતુ પરિવહન કે લોકો એકત્રીત થાય, તેવી કોઈ છૂટછાટ મળવાની સંભાવના જણાતી નથી. જો કે, અંતિમ નિર્ણય હવે પછીના ચાર-પાંચ દિવસમાં કેટલા કેસો ક્યાં-ક્યાં નોંધાય છે, તેના પર જ લેવાશે.

કોરોનાને હટાવવા લોકડાઉન લંબાવવું જ પડે તેમ હોય તો પણ હવે સરકારે સિક્કાની બીજી બાજુ પણ વધુ ધ્યાન આપવું પડે તેમ છે. રાશનકાર્ડ પર આવશ્યક ચીજવસ્તુઓ પહોંચાડીને અને ભૂખ્યાજનો માટે ભોજન કે ફૂડ પેકેટની વ્યવસ્થા ઊભી કરીને અથવા કેટલાક જરૃરિયાતમંદોના ખાતામાં અમુક રકમ જમા કરાવીને સરકારે લોકોની તકલીફો ઓછી કરવાના પ્રયાસો જરૃર કર્યા છે, પરંતુ તે સિવાયની પણ ઘણી વ્યવહારિક, સામાજિક અને આર્થિક સમસ્યાઓ પણ છે. તેના પર લક્ષ્ય આપવું અત્યંત જરૃરી છે.

બીજી બધી બાબતો કરતા સૌથી વધુ અગ્રતા લોકોની જિંદગીઓ બચાવવાની હોવી જ જોઈએ અને તે દિશામાં સરકારના કોઈપણ નિર્ણય સાથે જનતા ઊભી રહી છે અને હજુ પણ એવું જ થશે, પરંતુ સરકારે કડવા અને કડક નિર્ણય લેતા પહેલા પ્રવર્તમાન તમામ સમસ્યાઓનો અભ્યાસ કરીને વ્યવહારૃ અને વ્યૂહાત્મક રીતે લોકડાઉનનો સમય વધારવો જોઈએ.

આ માટે પંજાબ, ઉત્તરપ્રદેશ અને રાજસ્થાન અને મધ્યપ્રદેશ જેવા રાજ્યોની જેમ જે વિસ્તારોમાંથી સંખ્યાબંધ કોરોનાના પોઝિટિવ કેસો મળ્યા હોય, તે વિસ્તારો એટલે કે હોટસ્પોટને સીલ કરીને જે વિસ્તારોમાં કોરોના બહુ ફેલાયો નથી તેવા વિસ્તારો માટે પ્રવર્તમાન લોકડાઉનમાં થોડી રાહત મળે, અને લોકોની સમસ્યાઓ હળવી થાય તેવો કોઈ વચલો રસ્તો કાઢવો જોઈએ.

એવું કહેવાય છે કે, રૃપાણી સરકારે એપ્રિલના અંત કે મે મહિનાના પહેલા સપ્તાહ સુધી લોકડાઉન લંબાવવાનો નિર્ણય લીધો છે. જો એવો કોઈ નિર્ણય લેવામાં આવી રહ્યો હોય તો પણ કોરોનાથી ખૂબ જ પ્રભાવિત વિસ્તારો એટલે કે હોટસ્પોટ, કોરોનાના કેટલાક કેસો થયા હોય તેવા વિસ્તારો અને કોરોનાના કેસો નહીંવત હોય કે નોંધાયા જ ન હોય, તેવા વિસ્તારોને અલગ-અલગ તારવીને તે મુજબના પ્રતિબંધો રાખવા જોઈએ.

જો કે, સરકાર જનતાની મુશ્કેલીઓ સમજીને કેટલાક વિસ્તારોમાં થોડી ઘણી છૂટછાટ આપે તો પણ સોશ્યલ ડિસ્ટેન્સીંગનો ચૂસ્ત અમલ કરવો જોઈએ. આ ચેપી રોગ  કોઈનેય છોડતો નથી તેથી છૂટછાટ મળી હોય તો પણ અનિવાર્ય કામ સિવાય કે સામાન્ય અને હાલ તુરંત ચલાવી શકાય તેવા કામો માટે નીકળી પડવું ન જોઈએ. જનતા કરફયુ સમયે ઢોલનગારા લઈને નીકળી પડેલા અને ગત્ રવિવારે દીપ પ્રગટાવીને નીકળી પડેલા લોકોની માનસિકતાથી જ સરકાર અને તંત્રને સોશ્યલ ડિસ્ટન્સીંગ નહીં જળવાય, તેવી આશંકા રહેતી હોય તે સ્વાભાવિક છે.

સરકારે  ભાડેથી રિક્ષા લઈને ગુજરાન ચલાવતા, ભાડાની દુકાનો રાખીને વ્યવસાય કરતા અને નાના-મોટા વ્યાપાર-વ્યવસાય દ્વારા ઘર ચલાવતા લોકો તથા ઔદ્યોગિક સંકુલોમાં સેવા વ્યવસાય કે છૂટક મજૂરી કરતા લોકોની ચિંતા કરીને જ્યાં કોરોનાનો કોપ પ્રસર્યો નથી, ત્યાં બહારથી કોઈ લોકો આવી ન શકે અને સોશ્યલ ડિસ્ટન્સીંગ જળવાય રહે, તેવી ચોકસાઈ સાથે થોડા લઘુ ઉદ્યોગ, કામ-ધંધા શરૃ કરવા વિચારવું જોઈએ.

close
Nobat Subscription