નેશનમાં શરૃ થયું વેક્સિનેશન... મહામારીના નામે માર્કેટીંગ...?

આજથી દેશભરમાં કોરોના સામે જંગ શરૃ થયો છે. દેશના વિવિધ રાજ્યોમાં આજે પૂર્વ નિર્ધારિત પ્લાનીંગ મુજબ વેક્સિનેશન શરૃ કરી દેવામાં આવ્યું છે. ભારત બાયોટેકે ૧૧ શહેરોમાં ૧૬ લાખથી વધુ વેક્સિન મોકલી છે. સરકારે ભારત બાયોટેકને પપ લાખ વેક્સિનનો ઓર્ડર આપ્યો છે. સીરમ ઈન્સ્ટિટ્યુટે પણ ૧ કરોડ નવ લાખથી વધુ વેક્સિનનો જથ્થો વિવિધ સ્થળોએ મોકલી દીધો હોવાનું કહેવાય છે.

આજે દેશના ૩૦૦૬ રસીકરણ કેન્દ્રો પરથી ૩૦૦૬૦૦ લોકોને વેક્સિનેશન કરવામાં આવી રહ્યું છે. જેમાં હેલ્થ વર્કર્સને પ્રાયોરિટી અપાઈ છે.

કોવિડશિલ્ડ અને કોવેક્સિનની ફાળવણી કેન્દ્ર સરકારે વિવિધ રાજયોને કરી છે અને ૧.૬પ કરોડ ડોઝ ફાળવી દેવાયા હોવાનો દાવો કરાયો છે. આ બધી આંકડાકીય માહિતી અને દેશભરમાં ઠેર-ઠેર મહાનુભાવોના હસ્તે થઈ રહેલા વેક્સિનેશનની સાથે-સાથે વિવિધ વેક્સિનની વિશેષતાઓ, જોખમો અને તેની સંભવિત અસરો અંગે પણ અનેક પ્રકારની ચર્ચાઓ શરૃ થઈ ગઈ છે. કેટલીક અફવાઓ ઉડી રહી છે, તો કેટલીક અટકળો પણ થઈ રહી છે. સરકારે કોઈપણ પ્રકારની અફવાઓથી સાવધ રહેવાની ચેતવણી પહેલેથી જ આપી રાખી છે, પરંતુ 'ગામના મોઢે ગરણું કેમ બાંધવું...?" તે કહેવતની જેમ સોશ્યલ મીડિયાના યુગમાં કોઈપણ પ્રકારની વાતો અને અફવાઓ ઉડતી રહેતી હોય છે, જેથી સાવચેત રહેવું જરૃરી છે.

ગુજરાતમાં કોવિશિલ્ડ વેક્સિન મૂકવામાં આવી રહી છે. રાજ્યને પ.૪૦ લાખ ડોઝ વેક્સિનના મળ્યા છે. રાષ્ટ્રીય કક્ષાએથી વડાપ્રધાન, રાજ્યકક્ષાએ મુખ્યમંત્રી - નાયબ મુખ્યમંત્રી અને જુદા-જુદા શહેરો-જિલ્લાઓમાં રસીકરણ કેન્દ્રો પરથી વિવિધ મહાનુભાવોના હસ્તે આ મહાભિયાનનો પ્રારંભ થયો છે. રાજ્યમાં ૧૩૯ સ્થળોએ વેક્સિનેશન કરવામાં આવી રહ્યું.

બીજી તરફ નોર્વેમાં ફાઈઝર કંપનીની વેક્સિન લીધા પછી ૧૩ લોકોના મૃત્યુ થયા હોવાના અહેવાલોથી ફફડાટ ફેલાયો છે. જો કે, અત્યાર સુધીમાં ૩૩ હજાર લોકોને નોર્વેમાં આ રસી અપાઈ ચૂકી છે. જેમાંથી ર૯ લોકોને આડઅસર થઈ હોવાનો દાવો કરાયો હતો. એવો દાવો પણ કરાયો હતો કે, મૃતકોમાં મોટાભાગના વૃદ્ધ હતાં. આ અહેવાલોને લઈને ચિંતિત નહીં થવાની અપીલ પણ કરવામાં આવી રહી છે.

થોડા સમય પહેલા એવી વાતો વહેતી થઈ હતી કે, સીરમ પોતાની રસી કોવિશિલ્ડ માર્કેટમાં મોંઘા ભાવે વેંચવા માંગે છે. સરકારને સસ્તામાં જથ્થાબંધ વેક્સિન પૂરી પાડનાર આ કંપની ખૂલ્લા બજારમાં એક હજારના ભાવે વેંચવા માંગે છે. મહામારીના નામે માર્કેટીંગની આશંકાઓ પણ વ્યક્ત થઈ, એ પછી તો ઘણી વાતો ઉડી અને રદિયા પણ અપાયા. હવે જ્યારે રસીકરણ શરૃ થઈ ગયું છે, અને વિદેશોમાં પણ ભારતની વેક્સિનની માંગ ઉઠવા લાગી છે, ત્યારે આ મહાભિયાન સફળ નિવડે અને કોરોના સામેનો જંગ માત્ર ભારત નહીં, પરંતુ દુનિયાના બધા દેશો જીતી લ્યે, તેવી આશા રાખીએ.

અત્યારે ભારત સરકારે ત્રણ કરોડ જેટલા હેલ્થ ફ્રન્ટલાઈન વર્કર્સને સરકારના ખર્ચે આપવાની જાહેરાત કરી છે. બીજા ર૭ કરોડ લોકોને કોરોનાની રસી મૂકવાની તૈયારી કરી છે, પરંતુ તેનો ખર્ચ કોણ ભોગવશે, તે નક્કી થયું નથી. દિલ્હીના મુખ્યમંત્રી અરવિંદ કેજરીવાલે જાહેર કર્યુ છે કે, કેન્દ્ર સરકાર જો બાકીના લોકોના રસીકરણનો ખર્ચ નહીં ભોગવે, તો દિલ્હી રાજય માટે દિલ્હી સરકાર ખર્ચ ભોગવશે. થોડા દિવસો પહેલા પશ્ચિમ બંગાળના મુખ્યમંત્રી મમતા બેનર્જીએ પણ રાજ્યના લોકોનો રાજ્ય સરકારના ખર્ચે વેક્સિન આપવાની તૈયારી બતાવવાની સાથેસાથે મોદી સરકારની ટીકા પણ કરી હતી. હવે પંજાબના મુખ્યમંત્રી કેપ્ટન અમરિન્દરસિંહે પણ તમામ લોકોને રસીકરણનો ખર્ચ કેન્દ્ર ભોગવે તેવી માંગ ઉઠાવી હોવાના અહેવાલો છે, જ્યારે ભાજપ, એનડીએ શાસિત રાજ્યો પણ એવું જ ઈચ્છે છે, પરંતુ ઉપરવાળા ઈચ્છતા હશે તેમ જ થશે.