ઘેર ઘેર આનંદ ભયો જય કનૈયાલાલ કી...

ભગવાન શ્રીકૃષ્ણનો અવતાર એક એવું દૃષ્ટાંત છે, જેમાંથી વર્તમાન સમયની સમસ્યાઓના પણ જવાબ મળે છે. આવતીકાલે જન્માષ્ટમીનું પર્વ છે. આ વખતે કોરોનાને લઈને ઘેર-ઘેર નંદભયો થવાનો છે, કારણ કે ભગવાન દ્વારકાધીશજીના દ્વારકાના જગતમંદિર સહિતના તમામ શ્રીકૃષ્ણના મંદિરો દર્શનાર્થીઓ માટે બંધ રાખવામાં આવ્યા છે. ભગવાને આ રીતે એક સંદેશ આપ્યો છે કે ભક્તજનોને આ વર્ષે હું તેમના ઘેર દર્શન આપીશ. ભગવાન શ્રીકૃષ્ણ બાહ્યસ્વરૃપી છે અને તેઓ બાલકૃષ્ણ સ્વરૃપે આવતીકાલે મધ્યરાત્રિએ ભક્તજનોના ઘેર ઘેર પધારશે, તેવો માહોલ ઊભો થયો છે. કોરોનાએ દુનિયાની દરેક પરંપરાઓ, સિસ્ટમો અને વ્યવસ્થાઓને અસ્તવ્યસ્ત કરી નાંખી છે, ત્યારે ભગવાન શ્રીકૃષ્ણ આ મહામારીમાંથી સૌને ઉગારે અને ઝડપથી સમગ્ર  વિશ્વને આ ભયાનક રાક્ષસી વાઈરસથી મુક્ત કરે તેવી આશા રાખીએ.

આ વખતે જન્માષ્ટમીના સાતમ-આઠમના મેળાઓ કે અન્ય મેળાઓ થવાના નથી, પરંતુ ઘેર-ઘેર આનંદોત્સવ ઉજવવા અને નિયમોના પાલન સાથે ઘરમાં જ ભગવાનની પૂજા-અર્ચના વિગેરે પરિવારજનો કરે, તેમાં કોઈ પ્રતિબબંધ નથી. આ વર્ષે કાનાના જન્મોત્સવની આરતી ઘેર ઘેર થશે અને તેના ઘંટારવ અને દીપજ્યોતિથી માહોલ પવિત્ર બનશે.

ઘરમાં ઈન્ડોર રમતો રમીને અને લેખ-વાચન-મીડિયા, સોશિયલ મીડિયા, ન્યૂઝ ઉપરાંત ઘરના સભ્યો દ્વારા કાન્હાની કોઈ નાની વાટિકાનું મંચન વગેરે ઘરમાં જ થઈ શકે છે. બસ ક્યાંય પણ ટોળા ભેગા થવા ન જોઈએ, અને માસ્ક તો હવે અનિવાર્ય જ છે. કારણ કે જાહેરમાં માસ્ક વગર દેખાયા, તો રૃપિયા એક હજારનો દંડ નિશ્ચિત છે.

તો, આવો આપણે બધા સાંપ્રત સ્થિતિને સ્વીકારીને જન્માષ્ટમીના તહેવારો ભીડભાડ ન કરવી, સોશ્યલ ડિસ્ટન્સ, માસ્ક, વારંવાર હાથ ધોવા વગેરે નિયમોનું પાલન કરીને ઘેર-ઘેર કાન્હાને વધાવીએ.

'નોબત' પરિવાર અને માધવાણી પરિવાર, 'નોબત'ના પ્રિય વાચકો, ગ્રાહકો, વિજ્ઞાપન દાતાઓ, પ્રતિનિધિઓ, પત્રકારો, વિતરકો અને શુભેચ્છકો સહિત સૌને જન્માષ્ટમીની શુભ કામનાઓ પાઠવે છે.