થોડું ડોક્ટર વિશે...

મારે ઘણાં ડોક્ટર મિત્રો પણ છે અને તેમને હું વારંવાર મળતો પણ રહું છું, સિવાય કે હું પોતે માંદો હોવ. કારણ કે મને પણ ડોક્ટરની દવાનો, દવાને બદલે આપવામાં આવતા ઈન્જેક્શનનો, જરૂર હોય કે ન હોય તો પણ કરવામાં આવતા અનેક લેબોરેટરી ટેસ્ટનો ડર લાગે છે. અને સૌથી વધુ ડર તો લાગે છે ડોક્ટરના બીલનો.

અને ડોક્ટરના બિલ હોય છે પણ એવા જ. હમણાં નવા વર્ષની શરૂઆતમાં જ અમથાલાલ અમદાવાદીને છાતીમાં દુખાવો થયો અને તેઓ સીધા કાર્ડિયોલોજીસ્ટ પાસે પહોંચ્યા. ડોક્ટરે પૂરું ચેકઅપ કર્યું અને અમથાલાલના બધા મેડિકલ રિપોર્ટ તપાસ્યા અને પછી કહ્યું, 'અમથાલાલ, તમારે અમદાવાદમાં ત્રણ ફ્લેટ છે ને?'

'ત્રણ નહીં ચાર. એક પાલડીમાં, એક આંબાવાડીમાં, એક નવરંગપુરામાં અને એક બોપલમાં..'

'તો ચારમાંથી એક ફ્લેટ વેચી કાઢો. કારણ કે બે દિવસ પછી તમારું બાયપાસ છે...!!' ડોક્ટરે કહ્યું.

સામાન્ય માણસો પણ હવે પોતાની તંદુરસ્તી અંગે સભાન થઈ ગયા છે. આખું વર્ષ આરામ કરનાર આળસુ માણસ પણ શિયાળો આવતા જ મોર્નિંગ વોક શરૂ કરી દે છે, અથવા તો વજન ઘટાડવા જીમમાં જવાનું શરૂ કરી દે છે.

પરંતુ અમારા પાડોશી જટાશંકર આટલું પણ નથી કરી શકતા. તેમને વજન ઘટાડવું છે, તેમને શિયાળાની વાનગીઓ પણ ઝાપટવી છે, પરંતુ કોઈપણ પ્રકારની કસરત નથી કરવી કે વોકિગ નથી કરવું, એટલે તેઓ પોતાના ફેમિલી ડોક્ટરની સલાહ લેવા ગયા.

ડોક્ટરે તેમની પૂરી વાત સાંભળી અને કહ્યું, 'જટાશંકર, ઘરની આસપાસ લોન ઉપર ચાલવાનું રાખો તો તબિયત સારી રહેશે..'

જટાશંકર કહે, 'સાહેબ તમને સાચું કહું ? મારું આખું ઘર લોન ઉપર જ ચાલે છે..!'

શિયાળામાં વોકિંગ કરવા માટે અમારી સાથે ગ્રુપમાં એક નવા મેમ્બર જોડાયા, ડોક્ટર રાજન. એકદમ સરળ અને સેવાભાવી. નવા આવેલા ડોક્ટર સાહેબનું લાલાએ સ્વાગત કર્યું, એક પ્રશ્નથી, 'ડોક્ટર સાહેબ, એવી કઈ વસ્તુ છે કે જે ફક્ત તમે જ કરી શકો, બીજા કોઈ નહીં..?'

'મારા અક્ષર ફક્ત હું જ વાંચી શકું બીજા કોઈ જ નહીં..' ડોક્ટર સાહેબે હસતા હસતા જવાબ આપ્યો.

'પરંતુ તો પછી તમારી લખેલી દવાની પ્રિસ્ક્રિપ્શન પર મેડિકલ સ્ટોરવાળા દવા કઈ રીતે આપે છે ?' લાલાએ પૂછ્યું.

'થોડુંક અનુભવથી જ્યારે થોડુંક અનુમાનથી..!!'

લાલો ખુશ થઈ ગયો. તેને જોઈતો હતો તેવો જ જવાબ મળ્યો.

કહે છે કે કોમ્પ્યુટરની શોધ ડોક્ટરની આવી વાંચી ન શકાય તેવી પ્રિસ્ક્રિપ્શનના પ્રોબ્લેમ દૂર કરવા માટે જ થઈ છે, અને તેનો લાભ અનાયાસે જ બેંકના કસ્ટમરને પણ મળ્યો છે. હા, બેંકના કસ્ટમરને કોમ્પ્યુટરના કારણે વાંચી ન શકાય તેવી પાસબુકમાંથી છૂટકારો મળ્યો છે..!

વિદાય વેળાએઃ- ડોક્ટરે સલાહ આપી, કે સરકારે ભલે ગિફ્ટ સિટીમાં દારૂબંધી થોડી હળવી કરી, પરંતુ દારૂ પીવામાં આપણે તો પૂરો કંટ્રોલ રાખવાનો. કારણ કે દારૂ તો ધીમું ઝેર છે અને તે માણસને ધીમે ધીમે મારે છે.

લાલાએ તરત જ તેનો જવાબ આપ્યો, ''તો આપણને ક્યાં મરવાની ઉતાવળ છે..?!!''

 

જો આપને આ પોસ્ટ ગમી હોય તો શેર કરો...

Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.

Android: https://rb.gy/surhtv

Apple ios: https://rb.gy/cee4r9

 

Social Media

ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો

https://www.instagram.com/nobatdaily?r=nametag

 

વિડિયો માટે અમારી યુ-ટ્યૂબ ચેનલને સબસ્ક્રાઈબ કરો

https://youtube.com/@Nobatofficial