બાદનપરમાં કનકેશ્વર મહાદેવના સાનિધ્યમાં વિશ્વકલ્યાણ અર્થે કઠીન હઠયોગ તપની સાધના ચાલી રહી છે

૧૦ મે ના સંતવાણી, ૧૧ મે ના ભંડારો-પ્રસાદઃ પહેલી એપ્રિલથી ૪૧ દિવસની સાધના અવિરત

મનની ગતિને મજબૂત સંકલ્પ શક્તિની એક નિશ્ચિત દિશામાં વાળવાનો અખંડ પ્રયાસ એટલે હઠયોગ.

જોડિયા તાલુકાના બાદનપરમાં ઉદાસીન અખાડા શ્રી જીતેશ્વરાનંદજી મહારાજ દ્વારા સુપ્રસિદ્ધ-સ્વયંભૂ શ્રી કનકેશ્વર મહાદેવ મંદિરના સાનિધ્યમાં વિશ્વ કલ્યાણ અર્થે હઠયોગની સાધના કરવામાં આવી રહી છે. તેઓ આ અગાઉ ભારતમાં રાજસ્થાન તથા મહારાષ્ટ્રમાં પણ હઠયોગની સાધના કરી ચૂક્યા છે. જેમાં ૧૮ (અઢાર) વખત સૂર્યતપ તેમજ પંચધૂણીની કઠિન સાધનાનો સમાવેશ થયેલો છે. ઉદાસીન સંપ્રદાયના સ્વામી બ્રહ્મલીન વ્રજાનંદજી મહારાજ અવધૂત કોદરિયા સરકાર એવા સદ્ગુરુની પ્રેરણાથી તેઓ હઠયોગની સાધના કરી રહ્યા છે.

૧ એપ્રિલ ર૦ર૪ ની ૧૧ મે ર૦ર૪ કુલ ૪૧ દિવસની પંચધૂણી સાધનામાં તેઓ અન્ન લીધા વિના અખંડ ધૂણાથી સાધના તેમજ બપોરે ૧ર થી ૩ કલાક દરમિયાન ધોમધખતા તાપમાં પાંચ ધૂણી પ્રગટાવી વચ્ચે બેસી તપ કરી રહ્યા છે. આ પાંચ ધૂણીમાં પહેલા દિવસે એક ધૂણીમાં ર૧ છાણા તેવી પાંચ અલગ ધૂણી પ્રગટાવી તેની વચ્ચે બેસી સાધના કરવામાં આવે છે. ત્યારપછી તે તમામ ધૂણીમાં રોજ એક છાણું ઉમેરી તાપ વધારવામાં આવે છે.

હઠયોગ સાધનામાં શિયાળામાં કડકડતી ઠંડીમાં માટલામાં પાણી ભરી રાખી તેનાથી સ્નાન, ઉનાળાની ગરમીમાં સૂર્ય સામે બેસીને ધૂણી પ્રગટાવી તેની વચ્ચે બેસી સાધના અથવા તો સૂર્ય સામે બેસી તપ તેમજ ચોમાસામાં એક પગે ઊભા રહીને સાધના કરવામાં આવે છે.

હઠયોગી ઉદાસીન સંત શ્રી જીતેશ્વરાનંદજી જણાવે છે કે, 'ભગવાન શ્રી રામ પણ ૧૪ વર્ષ ઉદાસીન વેશમાં રહેલા ઉદાસીનનો અર્થ છે ઈર્ષ્યાથી દૂર તેથી જ ઉદાસીન માટે કોઈ શત્રુ નથી. શરીર અને મનની તાકાત જ્યારે ક્ષીણ થવા લાગે ત્યારે ઈશ્વરની કૃપા અને પ્રેરણાથી જ હઠયોગ થાય છે. ઈશ્વરની ઈચ્છાથી જ હઠયોગની સિદ્ધિ મળે છે. મેં બાળપણથી જ શ્રી હનુમાનજીની સાધના કરી છે અને આ વાતને અનુભવી છે. હાલમાં દેશની યુવાપેઢી આપણા ઋષિ-મુનિઓના આચરણ અને સંદેશને અનુસરશે તો જરૂર શરીર અને મન નિરોગી રહેશે તથા જીવનને સાચી દિશા મળશે.'

૪૧ દિવસની આ સાધનાના સંકલ્પ અંતર્ગત તા. ૧૦ મે ના બાદનપરમાં રાત્રે ૯ વાગ્યે સંતવાણી-ભજન તથા તા. ૧૧ મે ના સાંજે ૪ કલાકે ભંડારાનો પ્રસાદ પીરસાશે.

બાદનપરમાં શ્રી કનકેશ્વર મહાદેવ મંદિરના પૂજારીઓ શ્રી વલ્લભગીરી ગોસાઈ, શ્રી સુરેશગીરી, શ્રી સંજયગીરી, શ્રી હિતેષગીરી, શ્રી ધર્મેશગીરી દ્વારા શિવમંદિરમાં અવિરત સેવા કરવામાં આવી રહી છે. બાદનપરની આ પવિત્ર ભૂમિમાં હઠયોગી સંતની તપસ્યાના દર્શનાર્થે હાલમાં રોજ અનેક ભક્તો પધારી રહ્યા છે.

:: ખાસ મુલાકાત :: તોરલ ઝવેરી

 

જો આપને આ પોસ્ટ ગમી હોય તો શેર કરો...

Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.

Android: https://rb.gy/surhtv

Apple ios: https://rb.gy/cee4r9

 

Social Media

ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો

https://www.instagram.com/nobatdaily?r=nametag

 

વિડિયો માટે અમારી યુ-ટ્યૂબ ચેનલને સબસ્ક્રાઈબ કરો

https://youtube.com/@Nobatofficial