ગુલાબનગર પાસે બે જૂથ વચ્ચે બઘડાટીઃ બંને પક્ષે નોંધાવી પોલીસમાં સામસામી ફરિયાદ

Author: નોબત સમાચાર

ગુલાબનગર પાસે બે જૂથ વચ્ચે બઘડાટીઃ બંને પક્ષે નોંધાવી પોલીસમાં સામસામી ફરિયાદ

એક મહિલા ઘરેથી ચાલ્યા જતાં તેની પૂછપરછમાં ડખ્ખોઃ

જામનગર તા. ૨૭: જામનગરના ગુલાબનગરમાં રહેતા એક યુવાનના પત્ની ક્યાંક ચાલ્યા જતાં તે બાબતે ગઈકાલે બે જૂથ વચ્ચે મારામારી થઈ હતી. બંને પક્ષે સામસામી ફરિયાદ કરી છે. પોલીસે કુલ સાત શખ્સ સામે ગુન્હો નોંધી આરોપીઓની ધરપકડ માટે તજવીજ કરી છે.

જામનગરના ગુલાબનગર વિસ્તારમાં વસવાટ કરતા જાવીદ બોદુભાઈ આરબ તથા તેના ભાઈને ગઈકાલે બપોરે પૂછવા આવેલા રીઝવાન સમા, અમીન, નવાઝ સમા, આરીફ નામના ચાર શખ્સે ગાળો ભાંડ્યા પછી ઢીકાપાટુથી માર મારવાનંુ શરૂ કર્યું હતું. રીઝવાનની પત્ની તેના ઘરેથી ચાલી ગઈ હોય તે બાબતે પૂછ્યા પછી રીઝવાન તથા અમીને ગાળો ભાંડી હતી અને તેની સાથે નવાઝ તથા આરીફે હુમલો કરી દીધો હતો. ત્યાં આવેલી એક દુકાનમાંથી લોખંડનું કોઈ સાધન લાવી નવાઝે છાતીમાં ફટકાર્યું હતું અને ધમકી આપી હતી તેવી ફરિયાદ સિટી એ ડિવિઝનમાં જાવીદ આરબે નોંધાવી છે.

આ ફરિયાદની સામે રીઝવાન શૌકતભાઈ સમાએ વળતી ફરિયાદ નોંધાવી તેમાં જણાવ્યું છે કે, તેની પત્ની ઘરેથી ચાલ્યા જતા તેણે સીકંદર બોદુભાઈ આરબને તેની ખબર હોવાની શંકાથી ગઈકાલે જ્યારે પૂછ્યું ત્યારે ઉશ્કેરાયેલા સીકંદર તેમજ તેના ભાઈ જાવીદ અને અયુબ બોદુભાઈ આરબે ગાળો ભાંડી હતી. સીકંદરે છરી કાઢી હતી અને જાવીદ તથા અયુબ બાજુમાં આવેલી પંક્ચરની દુકાનમાંથી લોખંડનો સળીયો કાઢી આવ્યા હતા. આ શખ્સોએ માર માર્યા પછી મારી નાખવાની ધમકી પણ આપી હતી. પોલીસે બંને ફરિયાદ પરથી કુલ સાત સામે ગુન્હો નોંધી તપાસ હાથ ધરી છે.

જો આપને આ પોસ્ટ ગમી હોય તો શેર કરો...