જામનગરમાં મહત્તમ તાપમાન ૩૪.પ ડીગ્રી

Author: નોબત સમાચાર

જામનગરમાં મહત્તમ તાપમાન ૩૪.પ ડીગ્રી

ભારેથી અતિભારે વરસાદની આગાહી વચ્ચે

જામનગર તા. ૬ઃ રાજ્યના હવામાન વિભાગ દ્વારા જામનગર સહિત ગુજરાતના ઘણાં ભાગોમાં તા. ૮ અને ૯ જુલાઈએ ભારેથી અતિભારે વરસાદ પડવાની આગાહી કરવામાં આવી છે. ગોરંભાયેલા આકાશ વચ્ચે અસહ્ય બફારો યથાવત્ રહેતા નગરજનો અકળાઈ ઊઠ્યા છે. છેલ્લા ચોવીસ કલાક દરમિયાન કોઈ વધારા કે ઘટાડા વગર મહત્તમ તાપમાન ૩૪.પ ડીગ્રીએ સ્થિર રહ્યું હતું.

ગુજરાતના હવામાન વિભાગ દ્વારા આગામી દિવસોમાં જામનગર સહિત રાજ્યના ઘણાં ભાગોમાં ભારે વરસાદની આગાહી વ્યક્ત કરવામાં આવી છે જેની અસર પણ જોવા મળી રહી છે. વાદળોની આવન-જાવન વચ્ચે નગરમાં મેઘાવી માહોલનું સર્જન થયું છે. મેઘાડંબર વચ્ચે વાતાવરણમાં ભેજનું પ્રમાણ ૮૦ ટકા રહ્યું હતું. ભેજના આટલા વધુ પ્રમાણના પગલે બફારો પણ યથાવત્ રહ્યો હતો. અસહ્ય બફારાથી પરશેવે રેબઝેબ બની ગયેલ નગરજનો અકળાઈ ઊઠ્યા હતાં. ખાસ કરીને રસોઈ બનાવતી વેળાએ ગૃહિણીઓને ભારે હાલાકીનો સામનો કરવો પડ્યો હતો. અસહ્ય બફારામાંથી રાહત મળે તે માટે લોકોએ પંખા, એસી તથા એરકૂલરનો સહારો લીધો હતો.

જામનગરમાં છેલ્લા ૩ દિવસથી મહત્તમ તાપમાનમાં કોઈ ચડાવ-ઉતાર નોંધાયો નથી અને તે ૩૪.પ ડીગ્રીએ સ્થિર રહ્યું હતું. છેલ્લા ચોવીસ કલાક દરમિયાન અડધો ડીગ્રી ઘટીને લઘુતમ તાપમાન ર૭ ડીગ્રી નોંધાયું હતું. પવનની ગતિ પ્રતિકલાકની સરેરાશ ૧૦ થી ૧પ કિમીની રહેવા પામી હતી.

જો આપને આ પોસ્ટ ગમી હોય તો શેર કરો...