દ્વારકાના વસઈ ગામે એરપોર્ટ સામે ખેડૂતોના પ્રચંડ વિરોધ પછી તંત્ર દોડ્યું: ટીમો કરશે સર્વે

Author: નોબત સમાચાર

દ્વારકાના વસઈ ગામે એરપોર્ટ સામે ખેડૂતોના પ્રચંડ વિરોધ પછી તંત્ર દોડ્યું: ટીમો કરશે સર્વે

ખેતીવાડી-એરપોર્ટના અધિકારીઓએ ખેડૂતોની રજૂઆતો સાંભળીઃ અખબારી અહેવાલોનો પડઘો

દ્વારકા તાલુકાના વસઈ ગામ આસપાસ પ્રસ્તાવિત એરપોર્ટ નિર્માણ પ્રોજેકટ અંતર્ગત ખેતીવાડી અધિકારી તથા એરપોર્ટ ઓથોરિટીના અધિકારીઓની સંયુક્ત ટીમ દ્વારા વસઈ ગામની મુલાકાત લીધી હતી. અધિકારીગણની વીઝીટ દરમ્યાન આસપાસના ગામના ખેડૂતોએ એકત્ર થઈ વસઈ આસપાસની જગ્યામાં એરપોર્ટ નિર્ણય અંગે વિરોધ વ્યક્ત કર્યો હતો. ખેડૂતો દ્વારા એરપોર્ટ નિર્માણ અને વિકાસનો વિરોધ ન હોવાનું જણાવી એરપોર્ટ પ્રોજેકટને વસઈ આસપાસની જમીનને બદલે અન્ય જગ્યાએ એરપોર્ટ નિર્માણ કરાય તેવી માંગ કરી છે. સાથે જ વસઈ ગામની ફળદ્રુપ જમીનમાં તાલુકાના અન્ય ગામોની સાપેક્ષમાં ખેતી-શાકભાજી ઈત્યાદિ તેમજ પાણીદાર જમીન હોય, આ જમીન પર એરપોર્ટ બનાવવામાં આવે તો અહીંના ખેડૂતોને મોટા આર્થિક નુકસાન સાથે આજીવીકાનું જોખમ ઊભું થશે તેવો સુર વ્યક્ત કર્યો હતો અને એરપોર્ટ પ્રોજેકટને અન્ય બિનફળદ્રુપ અને સરકારી જમીન પર સ્થાનાંતરિત કરવામાં આવે તેવી માંગ કરી છે.

દ્વારકા નજીકના વસઈ, ગઢેચી, મેવાસા અને કલ્યાણપુર ગામની જમીન પરના પ્રસ્તાવિત પ્રોજેકટ અંગે ખેતીવાડી અધિકારી તથા એરપોર્ટ ઓથોરિટીની ટીમે ખેડૂતો સાથે પ્રાથમિક ચર્ચા કર્યા પછી તેમની રજૂઆત સાંભળી આ અંગે સરકારમાં રજૂઆત કરવામાં આવશે તેમ જણાવ્યું હતું.

અત્રે ઉલ્લેખનિય છે કે ખેડૂતોએ કાળી પટ્ટી બાંધીને જ્યારે વિરોધ નોંધાવ્યો ત્યારે તંત્રે બહુ ધ્યાન આપ્યું નહોતું, તે પછી નોબત સહિતના અખબારી અહેવાલો તથા ખેડૂતોના પ્રચંડ વિરોધના કારણે તંત્રમાં દોડધામ મચી ગઈ હતી.

જો આપને આ પોસ્ટ ગમી હોય તો શેર કરો...