ખંભાળીયામાં આરોગ્ય સહિત વિવિધ સેવાકીય પ્રવૃત્તિઓ માટે જગ્યાની માંગણી

Author: નોબત સમાચાર

ખંભાળીયામાં આરોગ્ય સહિત વિવિધ સેવાકીય પ્રવૃત્તિઓ માટે જગ્યાની માંગણી

ઈન્ડિયન રેડક્રોસ સોસાયટી દ્વારા

ખંભાળીયા તા. ર૦: ખંભાળીયા શહેર હોસ્પિટલનું હબ જેવું ગણાય છે. દર વર્ષે બે-પાંચ નવી ખાનગી હોસ્પિટલો બની રહી છે, તથા અહીં ખંભાળીયાના જ ગામો તથા નજીકના સલાયા, કલ્યાણપુર, ભાણવડ સહિતના તાલુકાના પ૦ થી ૬૦ મળીને ૧પ૦ જેટલા ગામોના દર્દીઓ આવતા હોય, ખંભાળીયામાં રેડક્રોસ સંસ્થા દ્વારા અહીં આરોગ્ય વિષયક સવલતો ઊભી કરવા માટે જિલ્લા તંત્ર પાસે જમીનની માંગણી કરાઈ છે.

રેડક્રોસ જિલ્લા પ્રમુખશ્રી કિરીટ મજીઠીયાએ જણાવેલ કે, જો જમીન સરકારી તંત્ર આપે તો આ જમીન પર દાતાઓની મદદથી દર્દીઓને રાહત ભાવે તથા નજીવા ખર્ચે હોસ્પિટલ, લેબોરેટરી સહિતની સવલતો મળે તેવી વ્યવસ્થા કરી શકાય.

ખંભાળીયા પાલિકા તંત્ર અથવા તો જિલ્લાનું સરકારી તંત્ર હાલ અનેક જગ્યાઓ સરકારી કચેરીઓ બંધ થતા ખાલી પડેલી છે, ત્યારે આવી આંતરરાષ્ટ્રીય સંસ્થા કે જેમાં સરકારી અધિકારીઓનું મોનિટરીંગ થાય છે. તેમને જો જમીન અપાય તો શહેરમાં આરોગ્ય સવલતો વધે તેમ છે. હાલ શહેરમાં પાલિકાનું જુનું દવાખાનું નગરગેઈટ પાસે જુની હોસ્પિટલ બિલ્ડિંગ, જુનું તાલુકા પંચાયત બિલ્ડીંગ, જુની પી.ડબલ્યુ.ડી. કચેરી, જુની ડે. કલેક્ટર કચેરી, જુની મામલતદાર કચેરી, જુની કોર્ટ સહિત અનેક સરકારી બિલ્ડીંગો ખાલી છે.

જો આપને આ પોસ્ટ ગમી હોય તો શેર કરો...