દ્વારકામાં સાતમા માળેથી પડી ગયા પછી બાળકીનું મૃત્યુઃ ઓખામાં યુવાનનું મોત

Author: નોબત સમાચાર

દ્વારકામાં સાતમા માળેથી પડી ગયા પછી બાળકીનું મૃત્યુઃ ઓખામાં યુવાનનું મોત

બાઈકમાંથી પડી જતાં વૃદ્ધા પર કાળનો પંજોઃ

જામનગર તા. ૮: ખંભાળિયાના કાકાભાઈ સિંહણ ગામના એક વૃદ્ધાને છાતીમાં દુખાવો ઉપડતા બાઈક પર દવાખાને લઈ જવાતા હતા ત્યારે માર્ગમાં તેઓનું પડી જવાથી મૃત્યુ નિપજ્યું છે. દ્વારકામાં એક ઈમારતના સાતમા માળેથી પટકાયેલી બાળકી મોતને શરણ થઈ છે. ઓખામાં એક અજાણ્યા યુવાનને હૃદયરોગનો હુમલો આવી જતા તેઓનું મૃત્યુ નિપજ્યું છે. મૃતકની ઓળખ માટે તપાસ કરાઈ રહી છે.

ખંભાળિયા તાલુકાના સિંહણ ગામમાં રહેતા નાથીબેન સવાભાઈ સરસીયા નામના સિત્તેર વર્ષના વૃદ્ધાને ગઈકાલે સવારે છાતીમાં દુખાવો ઉપડતા તેઓને બાઈક પર બેસાડી ખંભાળીયા દવાખાને લઈ જવાતા હતા. માર્ગમાં આ મહિલાને ફરીથી આંચકો આવતા તેઓ બાઈક પરથી પડી ગયા હતા અને માથામાં ગંભીર ઈજા પામ્યા પછી તેઓનું મૃત્યુ નિપજ્યું છે. સોમાભાઈ લખુભાઈએ પોલીસને જાણ કરી છે.

દ્વારકા શહેરમાં સિદ્ધનાથ મહાદેવ મંદિર પાસે એક બિલ્ડીંગમાં કામ કરતા મૂળ દાહોદ જિલ્લાના લીમખેડા તાલુકાના કંબોઈ ગામના વતની બચુભાઈ ધુરાભાઈ મોહનીયા નામના શ્રમીકની છ વર્ષની પુત્રી ગઈકાલે આ બિલ્ડીંગના સાતમા માળેથી કોઈ રીતે પડી જતાં તે બાળકીનું ગંભીર ઈજા થવાથી મૃત્યુ થયું છે. પિતાએ પોલીસને જાણ કરી છે.

ઓખામાં વિરમ આશા ઓફિસ પાછળ આવેલા ગોડાઉન નજીક ગઈકાલે સાંજે પાંત્રીસેક વર્ષના એક અજાણ્યા યુવાન ફસડાઈ પડ્યા પછી મોતને શરણ થયા છે. હિતેશ વાનાભાઈ બારીયા દ્વારા પોલીસને જાણ કરવામાં આવી છે. આ યુવાનનું હૃદય રોગનો હુમલો આવતા મૃત્યુ થયાનું તારણ કાઢવામાં આવ્યું છે. પોલીસે મૃતકની ઓળખ મેળવવા તપાસ આરંભી છે.

જો આપને આ પોસ્ટ ગમી હોય તો શેર કરો...