જૂની સોની બજારમાં વેપારીની નજર ચૂકવી પાંચેક તોલા દાગીનાની ઉઠાંતરી

Author: નોબત સમાચાર

જૂની સોની બજારમાં વેપારીની નજર ચૂકવી પાંચેક તોલા દાગીનાની ઉઠાંતરી

ગ્રાહકના સ્વાંગમાં આવેલા શખ્સનો કરતબઃ

જામનગર તા. ૬: જામનગરની જૂની સોનીબજારમાં ઘરેણાની દુકાન ચલાવતા એક વ્હોરા વેપારી દસેક દિવસ પહેલાં સવારે દુકાને હતા ત્યારે ગ્રાહકના સ્વાંગમાં આવેલા એક શખ્સે તેઓની નજર ચૂકાવી પાંચેક તોલા સોનાના દાગીના જેમાં હતા તે પ્લાસ્ટિકના ડબ્બાની ઉઠાંતરી કરી છે. પોલીસે તપાસ શરૂ કરી છે.

જામનગરના ચાંદીબજાર વિસ્તારમાં આવેલી જૂની સોની બજારમાં દુકાન ચલાવતા કૈઝરભાઈ મામુજી ભાઈ સોની નામના પંચોત્તેર વર્ષના વ્હોરા વૃદ્ધ ગઈ તા.રપ ની સવારે પોતાની દુકાને હતા ત્યારે ગ્રાહકના સ્વાંગમાં અજાણ્યો શખ્સ આવ્યો હતો.

આ શખ્સે દાગીના ખરીદવાના છે તેમ કહી કૈઝર ભાઈને દાગીના બતાવવાનું કહેતા આ વેપારીએ ઘરેણા બતાવ્યા હતા. આ વેળાએ કૈઝરભાઈની નજર ચૂકાવી આ શખ્સે કેટલાક ઘરેણા જેમાં હતા તે પ્લાસ્ટિકનો એક ડબ્બો ઉઠાવી લીધો હતો.

આ શખ્સના ગયા પછી બહાર કાઢેલા દાગીના ફરીથી ગોઠવી રહેલા કૈઝરભાઈને એક ડબ્બો ગુમ હોવાનું જણાઈ આવ્યું હતું. હાંફળા ફાંફળા બની આ વૃદ્ધે તપાસ કરતા ગ્રાહક બનીને આવેલો શખ્સ ક્યાંય નજરે ચઢયો ન હતો તેથી ગઈકાલે કૈઝરભાઈ સોનીએ સિટી એ ડિવિઝન પોલીસ સ્ટેશનમાં ફરિયાદ નોંધાવી છે અને જણાવ્યું છે કે, કાનમાં પહેરવાના બે જોડી ઝુમર, ત્રણ જોડી ઈયરીંગ, ત્રણ જોડી બુટી તથા કવીની એક જોડી જેમાં હતી તે પ્લાસ્ટિકનો ડબ્બો આ શખ્સ ઉઠાવી ગયો છે. અંદાજે પાંચેક તોલા જેટલા સોનાના દાગીનાની ચોરી થઈ છે. પોલીસે રૂ.૪ લાખના દાગીના વાળા ડબ્બાની ઉઠાંતરી કરનાર તસ્કર સામે ગુન્હો નોંધી તેના સગડ દબાવ્યા છે.

જો આપને આ પોસ્ટ ગમી હોય તો શેર કરો...