જામનગરની પેઢીને બે કરોડથી વધુનું નુકસાન વ્યાજ સાથે ચૂકવવા આદેશ

Author: નોબત સમાચાર

જામનગરની પેઢીને બે કરોડથી વધુનું નુકસાન વ્યાજ સાથે ચૂકવવા આદેશ

વીમા કંપની સામે ફોરમમાં થઈ હતી ફરિયાદઃ

જામનગર તા. ૧: જામનગરની એક પેઢીએ રૂ.૩ કરોડની અકસ્માત અંગેની પોલિસી લીધા પછી બે કરોડથી વધુનું નુકસાન વરસાદી પાણીના ભરાઈ જવાના કારણે થતાં વીમા કંપનીએ તેનું વળતર ચુકવ્યું ન હતું. આ મામલો ગ્રાહક ફોરમમાં પહોંચ્યા પછી તે રકમ વ્યાજ સાથે બે માસમાં ચૂકવી આપવા આદેશ થયો છે.

જામનગરમાં દેવ સોલ્ટ પ્રાઈવેટ લિમિટેડ નામની પેઢી દ્વારા વર્ષ ૨૦૨૦માં અકસ્માત અંગે પોલિસી લેવામાં આવી હતી. નેશનલ ઈન્સ્યુરન્સ કંપનીને તે માટે રૂ.૩ કરોડની પોલિસી મેળવી રૂ.૭પ હજાર પ્રિમિયમ ચૂકવવામાં આવ્યું હતું.

તે પછી પોલિસી ચાલુ હતી ત્યારે મોરબીના મચ્છુ ડેમ વિસ્તારમાં અતિ ભારે વરસાદના કારણે ત્રણ દિવસ સુધી પાણી ભરાઈ રહ્યું હતું અને તેના કારણે દેવ સોલ્ટના મીઠાના ઉત્પાદનના સ્થળમાં પાણી ભરાઈ જતાં મીઠું ઓગળી ગયું હતું અને પેઢીને રૂ.૨,૦૭,૮૭,૧૯૨નું નુકસાન થયું હતું. તેની જાણકારી વીમા કંપનીને આપવામાં આવ્યા પછી સર્વેયરની નિમણૂક થઈ હતી.

આ સર્વેયરે નુકસાન થયાનો રિપોર્ટ વીમા કંપનીને આપ્યો હતો. તે પછી કારણ વગર જ બીજા સર્વેયરની નિમણૂક કરી તેની પાસેથી નુકસાન ન થયાનો રિપોર્ટ લેવાયો હતો અને તેના આધારે ક્લેઈમ રદ્દ કરી નખાયો હતો. આથી પેઢીએ અમદાવાદ સ્થિત ગ્રાહક તકરાર નિવારણ કમીશનમાં ફરિયાદ કરી હતી.

આ પછી ગ્રાહક તકરાર કાયદામાં સુધારો થતાં તે ફરિયાદ જામનગર જિલ્લા ગ્રાહક તકરાર નિવારણ ફોરમમાં દાખલ કરાઈ હતી. જ્યાં પેઢીના વકીલે કરેલી દલીલો ગ્રાહ્ય રાખી ફોરમે રૂ.૨૦૭૮૭૧૯૨ની રકમ છ ટકાના વાર્ષિક વ્યાજ સાથે ચૂકવી આપવા નેશનલ ઈન્સ. કંપનીને હુકમ કર્યાે છે. બે મહિનામાં તે રકમ ન ચૂકવાય તો નવ ટકા વ્યાજ ગણી તે રકમ ચૂકવવા અને ખર્ચના રૂ.પ હજાર અલગથી આપવા ફોરમ દ્વારા આદેશ કરાયો છે. ફરિયાદી તરફથી વકીલ વસંત ગોરી, દીપક નાનાણી, નેહલ સંચાણીયા રોકાયા છે.

જો આપને આ પોસ્ટ ગમી હોય તો શેર કરો...