સમાધાન કરવા આવેલા ધ્રોલના ચાર શખ્સે વેપારી સહિત ત્રણ પર કર્યાે હલ્લો

Author: નોબત સમાચાર

સમાધાન કરવા આવેલા ધ્રોલના ચાર શખ્સે વેપારી સહિત ત્રણ પર કર્યાે હલ્લો

દંપતીએ પાઈપ વડે માર મારતા યુવક ઘવાયાઃ

જામનગર તા. ૧: ધ્રોલના એક વેપારીની દુકાને સમાધાન માટે આવેલા ચાર શખ્સે છરી-ઢીકાપાટુથી હુમલો કરી ત્રણ ભાઈને માર માર્યાની પોલીસમાં ફરિયાદ થઈ છે. ગોકુલનગરમાં જકાતનાકા પાસે ગઈકાલે એક યુવાનને દંપતીએ માર મારી ઈજા કરતા આ યુવાનને સારવાર માટે અમદાવાદ ખસેડાયા છે.

ધ્રોલ શહેરની રઝવી સોસાયટીમાં રહેતા અને પીપી કોમ્પલેક્ષમાં ફેશન પોઈન્ટ નામની કપડાની દુકાન ચલાવતા ઈમરાન ઈકબાલ વાગડીયા નામના વેપારી ગઈ રાત્રે નવેક વાગ્યે પોતાની દુકાને હાજર હતા ત્યારે ધ્રોલના આબીદશા હબીબશા શાહમદાર, નઝીરશા અકબરશા, અલીઅઝગર હુસેન મતવા, આસિફશા અસરફશા શાહમદાર નામના ચાર શખ્સ આવ્યા હતા.

આ શખ્સોએ ઈમરાનને કહ્યું હતું કે, તમારા માતાએ બજારમાં ડુંગળીના ફોતરા નાખ્યા હતા. તે બાબતે સમાધાનની વાત કરવી છે. તેથી ઈમરાને પોતાના ભાઈ બિલાલ તથા દાનીશને પણ બોલાવ્યા હતા.

આ વેળાએ સમાધાનની ચાલતી વાત દરમિયાન આસિફશાએ ઉશ્કરાઈ જઈને બિલાલ પર ઢીકાપાટુથી હુમલો કર્યાે હતો અને આબીદશાએ છરી કાઢી જાનથી મારી નાખવાની ધમકી આપી ગાળો ભાંડી હતી. ઝપાઝપીમાં ઈમરાનને છરી વાગી ગઈ હતી. નઝીરશા અને અલીઅસગરે પણ હુમલો કર્યાે હતો. જાનથી મારી નાખવાની ધમકી આપી ચારેય શખ્સ ચાલ્યા ગયા હતા. ધ્રોલ પોલીસ સ્ટેશનમાં ઈમરાને ફરિયાદ કરી છે.

જામનગરના ગોકુલનગર નજીક આશાપુરા સર્કલ પાસે ગઈકાલે બપોરે પસાર થતાં ગિરીશ લાલદાસ જાદવ પર પાઈપ વડે જગદીશ બધીયા નામના શખ્સે હુમલો કર્યાે હતો અને જાનવી બધીયાએ ફડાકા ઝીંકી ગાળો ભાંડી જાનથી મારી નાખવાની ધમકી આપી હતી. સિટી સી ડિવિઝનમાં ગિરીશે ફરિયાદ નોંધાવી છે.

વધુમાં જાણવા મળ્યા મુજબ હુમલાખોર પૈકીના જાનવીબેને ભોગ બનનાર ગિરીશભાઈના પત્ની વિશે કોઈની સાથે વાત કર્યા પછી થોડા દિવસથી મનદુખ ચાલતું હતું. તે દરમિયાન ગઈ કાલે મામલો બિચકતા ગિરીશભાઈને વાત કરવા માટે ગોકુલનગર બોલાવાતા તિરૂપતિ સોસાયટીમાંથી આ યુવાન ત્યાં ગયા પછી પતિ, પત્ની તૂટી પડ્યા હતા. ઈજા પામેલા ગિરીશભાઈને વધુ સારવાર માટે અમદાવાદ ખસેડવામાં આવ્યા છે.

જો આપને આ પોસ્ટ ગમી હોય તો શેર કરો...