જામજોધપુરમાં સગીરા સાથે અણછાજતા અડપલા કરનાર શખ્સને પાંચ વર્ષની કેદ

Author: નોબત સમાચાર

જામજોધપુરમાં સગીરા સાથે અણછાજતા અડપલા કરનાર શખ્સને પાંચ વર્ષની કેદ

રૂ।.ર લાખ વળતર પેટે સગીરાને ચૂકવાશેઃ

જામનગર તા. ૨૪: જામજોધપુરમાં ચારેક વર્ષ પહેલાં એક બાળકી નાસ્તો લેવા માટે એક દુકાને ગઈ ત્યારે દુકાનદારે તેણીને ઘરમાં આવી વાસણ સાફ કરી આપવાનું કહ્યા પછી અડપલા કર્યા હતા અને કોઈને ન કહેવાનું જણાવી મારી નાખવાની ધમકી આપી હતી. તેની ફરિયાદ પોલીસમાં થયા પછી આ કેસ ચાલી જતાં અદાલતે આરોપીને પાંચ વર્ષની સખત કેદ ફટકારી છે. સગીરાને રૂ।.ર લાખ વળતર પેટે ચૂકવવામાં આવશે.

જામજોધપુર શહેરમાં વસવાટ કરતા ચંદુ નાથાભાઈ ચાવડા (ઉ.વ.૪પ) નામના શખ્સની દુકાને થોડા વર્ષ પહેલાં અગિયારેક વર્ષની એક બાળકી નાસ્તો લેવા માટે ગઈ ત્યારે ચંદુએ પોતાના ઘરના વાસણ સાફ કરી આપ તેમ કહી હાથ પકડીને બાજુમાં જ આવેલા પોતાના ઘરમાં આ બાળકી ને લઈ જઈ તેણી સાથે અણછાજતા અડપલા કર્યા હતા.

આ વેળાએ તે બાળકી રડવા માંડતા ચંદુએ તેણીનું ગળુ દબાવી મારી નાખવાની ધમકી આપી કોઈને વાત ન કરવા કહ્યું હતું. ત્યારપછી આ સગીરાએ પોતાના ભાભુને તેની જાણ કરતા પોલીસ સ્ટેશનમાં ફરિયાદ કરવામાં આવી હતી. પોલીસે આઈપીસી ૩૫૪ (ક) (૧) (ર), ૫૦૬ (ર) તેમજ પોક્સો એક્ટની કલમ ૮, ૧ર હેઠળ ગુન્હો નોંધ્યો હતો.

ઉપરોક્ત કેસ જામનગરની ખાસ પોક્સો અદાલતમાં ચાલવા પર આવતા સરકાર પક્ષ તરફથી ૧ર સાહેદની જુબાની અને દસ્તાવેજી પુરાવા રજૂ કરવામાં આવ્યા હતા. તેને ગ્રાહ્ય રાખી આરોપી ચંદુ નાથાભાઈ ચાવડાને તક્સીરવાન ઠરાવી અદાલતે પોક્સો એક્ટની કલમ ૮ના ગુન્હામાં પાંચ વર્ષની સખત કેદ, રૂ।.૧પ હજારનો દંડ, પોક્સો એક્ટની કલમ ૧રના ગુન્હમાં ત્રણ વર્ષની કેદ તથા રૂ।.૧૦ હજારનો દંડ, આઈપીસી ૫૦૬ (ર)ના ગુન્હામાં ત્રણ વર્ષની સખત કેદ અને રૂ।.પ હજારનો દંડ ફટકાર્યાે છે. દંડ ભરવામાં ન આવે તો વધુ સજાનો હુકમ કરાયો છે. ભોગ બનનાર સગીરાને વળતર પેટે કમ્પેઈન્સેશનમાંથી રૂ।.ર લાખ ચૂકવવા આદેશ થયો છે. સરકાર તરફથી પીપી ભારતીબેન વાદી રોકાયા હતા.

જો આપને આ પોસ્ટ ગમી હોય તો શેર કરો...