પૂછ્યા વગર કારીગરને કેમ બોલાવ્યો તેમ કહી સસરાએ પુત્રવધૂને લાકડી ફટકારી

Author: નોબત સમાચાર

પૂછ્યા વગર કારીગરને કેમ બોલાવ્યો તેમ કહી સસરાએ પુત્રવધૂને લાકડી ફટકારી

પતિએ પણ ધમકી આપતા મામલો પોલીસમાં પહોંચ્યોઃ

જામનગર તા. ૭: જામનગરના એક મહિલાએ ઘરમાં સર્જાયેલી વીજ ક્ષતિ રીપેર કરવા કારીગર બોલાવતા અચાનક બહારથી આવેલા સસરા તથા પતિએ ધમાલ કરી કારીગર પર છૂટી લાકડી ફેકી હતી અને તે લાકડીથી આ મહિલાને માર માર્યાે હતો. થોડા વર્ષાે પહેલાં પતિ સામે આ મહિલાએ હુમલાની ફરિયાદ કર્યા પછી વધુ એક વખત પોલીસનું શરણું લીધુ છે.

જામનગરના સરૂ સેક્શન રોડ પર આવેલા ગુલાબ નામના મકાનમાં વસવાટ કરતા વેજલબેન ભાવિકભાઈ શાહ (ઉ.વ.૪ર) નામના જૈન મહિલાએ સિટી બી ડિવિઝન પોલીસ સ્ટેશનમાં પોતાના પતિ ભાવિક અમૃતભાઈ તથા સસરા અમૃતભાઈ શાહ સામે ફરિયાદ નોંધાવી છે.

આ ફરિયાદમાં તેઓએ જણાવ્યા મુજબ ગયા શનિવારે તેમના ઘરમાં શોર્ટ સર્કીટ થતાં વીજળી ફોલ્ટ સર્જાયો હતો. તે રીપેર કરવા માટે વેજલબેને ઈલેકટ્રીકના એક કારીગરને બોલાવ્યો હતો તે કારીગર કામ કરતો હતો ત્યારે પતિ ભાવિક તથા સસરા અમૃતભાઈ આવ્યા હતા. તેઓએ આ કોણ છે તેમ પૂછતા વેજલબેને વીજ ફોલ્ટ રીપેર કરાવવા માટે તેને બોલાવ્યો છે તેમ કહ્યું હતું.

આથી ઉશ્કેરાયેલા સસરાએ મને પૂછ્યા વગર કેમ બોલાવ્યો? બંને નીચે આવો તેમ કહ્યા પછી ઈલેકટ્રીકનું કામ કરવા આવેલા કારીગર પર લાકડી ફેંકી હતી. તે ઘા બચાવી કારીગર દોટ મૂકીને નાસી ગયો હતો. તે પછી સસરાએ વેજલબેનને લાકડી વડે માર માર્યાે હતો. આ વેળાએ વેજલબેનનો પુત્ર વચ્ચે પડતા તેની સાથે પણ દાદાએ ઝપાઝપી કરી હતી.

આ વેળાએ પતિ ભાવિકે પણ ગાળો ભાંડી કોઈ કારીગરને ઘરમાં બોલાવીશ તો જાનથી મારી નાખીશ તેવી ધમકી આપતા વેજલબેને ફરિયાદ કરી છે. ઉલ્લેખનીય છે કે, થોડા વર્ષ પહેલાં પણ વેજલબેને પતિ ભાવિક સામે માર માર્યાની પોલીસમાં ફરિયાદ નોંધાવી હતી. તે પછી વેજલબેને કાયદાનો અભ્યાસ કરી ડિગ્રી મેળવી છે.

જો આપને આ પોસ્ટ ગમી હોય તો શેર કરો...