માળીયા પાસે મોટરમાં પચ્ચાસ ગ્રામ ડ્રગ્સ લઈ આવી રહેલા જામનગરના બે શખ્સ ઝડપાયા

Author: નોબત સમાચાર

માળીયા પાસે મોટરમાં પચ્ચાસ ગ્રામ ડ્રગ્સ લઈ આવી રહેલા જામનગરના બે શખ્સ ઝડપાયા

દોઢ લાખનું ડ્રગ્સ, ત્રણ મોબાઈલ, મોટર ઝબ્બેઃ

જામનગર તા. ૨૦: મોરબી નજીકના માળીયાની ફાટક ચોકડી પાસેથી ગઈકાલે મોરબી એલસીબીએ જામનગરના બે શખ્સને મોટરમાં પચ્ચાસ ગ્રામ ડ્રગ્સ લઈ જતા પકડી પાડ્યા છે. રૂ।.દોઢ લાખથી વધુનું ડ્રગ્સ, મોટર, ત્રણ મોબાઈલ કબજે લેવાયા છે, અન્ય બેના નામ ખૂલ્યા છે.

મોરબી જિલ્લાના માળીયા ગામ પાસે ફાટક ચોકડી નજીકથી પસાર થતી એક મોટરમાં ડ્રગ્સનો જથ્થો લઈ જવામાં આવી રહ્યો છે તેવી બાતમી મળતા મોરબી જિલ્લાની એલસીબી ટીમ ગઈકાલે વોચમાં ગોઠવાઈ હતી. જેમાં ફાટક ચોકડી નજીકથી પસાર થતી એક અર્ટીગા મોટરને આંતરી લેવામાં આવી હતી.

આ મોટરની તલાશી લેવામાં આવતા તેમાંથી જામનગરના નવાગામ ઘેડમાં રહેતો તૌસીફમિંયા હુસેનમિંયા બુખારી તથા બેડેશ્વર વિસ્તારમાં રહેતો મુસા ચાવડા મળી આવ્યા હતા.

આ શખ્સો પાસેથી પચ્ચાસ ગ્રામ ડ્રગ્સ સાંપડ્યું છે. એલસીબીએ રૂ।.૧૫૦૩૯૦ની કિંમતનું ડ્રગ્સ કબજે કરી રૂ।.પ લાખની મોટર અને ત્રણ મોબાઈલ પણ ડીટેઈન કર્યા છે. આ શખ્સોની પૂછપરછમાં તેઓએ પાટણના વારાહી તાલુકાના એક શખ્સનું નામ અને રાજસ્થાનના સાચોરમાંથી ડ્રગ્સ આપવામાં આવ્યું હોવાનું કબૂલ્યું છે.

જો આપને આ પોસ્ટ ગમી હોય તો શેર કરો...