કચ્છના ખાવડા પાસે ડ્રોન બ્લાસ્ટઃ તપાસનો ધમધમાટ

Author: નોબત સમાચાર

કચ્છના ખાવડા પાસે ડ્રોન બ્લાસ્ટઃ તપાસનો ધમધમાટ

ઊડતી શંકાસ્પદ વસ્તુ સીમાપારથી આવી હોવાની પુષ્ટિ નહીં:

ભૂજ તા. ૮: કચ્છમાં ભારત-પાકિસ્તાન સરહદ પાસે શંકાસ્પદ વિસ્ફોટ થયો છે. ડ્રોન જેવી શંકાસ્પદ ઊડતી વસ્તુ હાઈ ટેન્શન પાવારલાઈન સાથે અથડાતા ધડાકો થયો છે. સવારે ૬ વાગ્યા પહેલા ખાવડા પાસે ધ્રોબાણા ગામની આ ઘટના પછી સુરક્ષા એજન્સીઓ દ્વારા તપાસનો ધમધમાટ શરૂ થયો છે.

પ્રાપ્ત થતી વિગતો મુજબ કચ્છના ખાવડા પાસે આજે વહેલી સવારે ડ્રોન બ્લાસ્ટ થયો છે, જેમાં સવારે અંદાજે ૬ વાગ્યા આસપાસ ઘટના બની હતી, જેમાં પોલીસ અને સુરક્ષા એજન્સી દ્વારા તપાસ શરૂ કરવામાં આવી છે. હાઈટેન્શન વાયર સાથે ડ્રોન ટકરાતા તે ટકરાઈને નીચે પડ્યું હતું, તો કચ્છ પોલીસે તપાસનો ધમધમાટ શરૂ કર્યો છે. ડ્રોન કોનું છે તે દિશામાં તપાસ હાથ ધરાઈ છે.

ઉલ્લેખનિય છે કે ઓપરેશન સિંદુર પછી ભૂજનું એરપોર્ટ બંધ કરી દેવામાં આવ્યું છે. ભૂજ એરપોર્ટ પરથી ઓપરેટ થતી તમામ ફ્લાઈટ રદ્ કરવામાં આવી છે તેમજ ભૂજ એરપોર્ટની સુરક્ષામાં પણ વધારો કરવામાં આવ્યો છે. ભૂજ-અમદાવાદ અને ભૂજ-મુંબઈ વચ્ચેની તમામ ફ્લાઈટ કેન્સલ કરવામાં આવી છે.

કચ્છના દરિયા કિનારે પણ ઘણી વખતે બિનવારસી હાલતમાં ગાંજા અને ચરસના પેકેટ પણ મળી આવતા હોય છે તેને લઈ પોલીસ પણ દરિયાઈ વિસ્તારમાં સઘન ચેકીંગ કરતી હોય છે. પશ્ચિમ કચ્છ પોલીસ દ્વારા બોર્ડર વિસ્તારમાં સઘન તપાસ હાથ ધરવામાં આવી હતી. ખાસ કરીને પાકિસ્તાન સરહદ નજીક આવેલા ખાવડા સીમાના રી-પાર્ક વિસ્તારમાં આવતા-જતા તમામ વાહનોની ચૂસ્ત તપાસ કરવામાં આવી રહી છે. પોલીસે સરહદી વિસ્તારના રહેવાસીઓને પણ સતર્ક રહેવા સૂચના આપી છે.

લોકોને વિનંતી કરવામાં આવી છે કે, જો તેમના વિસ્તારમાં કોઈ શંકાસ્પદ પ્રવૃત્તિ જોવા મળે તો તાત્કાલિક પશ્ચિમ કચ્છ પોલીસને જાણ કરે. ખાસ કરીને પાકિસ્તાન સરહદ નજીક આવેલા ખાવડા સીમાના રિ-પાર્ક જેવા સંવેદનશીલ વિસ્તારમાં આવતા-જતા તમામ વાહનોની ચૂસ્ત અને બારિકાઈથી તપાસ કરવામાં આવી રહી છે, જેથી કોઈ અનિચ્છનિય ઘટના ન બને.

જો આપને આ પોસ્ટ ગમી હોય તો શેર કરો...