ધ્રોલમાંથી બાળકીનું અપહરણ કરી જનાર પરપ્રાંતીય આરોપી ઝડપાયોઃ પૂછપરછ શરૂ

Author: નોબત સમાચાર

ધ્રોલમાંથી બાળકીનું અપહરણ કરી જનાર પરપ્રાંતીય આરોપી ઝડપાયોઃ પૂછપરછ શરૂ

બાળકીને તબીબી ચકાસણી માટે ખસેડવામાં આવીઃ

જામનગર તા. ૩૦: ધ્રોલમાંથી અપહરણ કરાયેલી બાળકીના સગડ પોલીસે મેળવી લીધા છે. મૂળ મધ્યપ્રદેશના અલીરાજપુર જિલ્લાના એક શખ્સની બાળકી સાથે અટકાયત કરી લેવામાં આવી છે. આ શખ્સે એક બાઈકમાં લીફ્ટ મેળવી હોવાનું પ્રાથમિક તબક્કે બહાર આવ્યું છે. બાળકીને મેડિકલ ચકાસણી માટે ખસેડી પોલીસે આરોપીની પૂછપરછ આદરી છે.

ધ્રોલ પંથકમાં આવેલા એક ખેતરમાં મજૂરીકામ માટે આવીને રહેતા માંગુભાઈ સુદરીયા પચાયા નામના શ્રમિકની પાંચ વર્ષની પુત્રીનું અપહરણ થયાની ધ્રોલ પોલીસ મથકમાં ફરિયાદ કરવામાં આવ્યા પછી પોલીસે કાલાવડ પોલીસ તેમજ એલસીબી, એસઓજીની મદદથી તપાસનો ધમધમાટ શરૂ કર્યાે હતો.

આ બાળકીને બાઈક પર બેસાડીને લઈ જવામાં આવી હોવાના સીસીટીવી ફૂટેજ પ્રકાશમાં આવ્યા હતા. તેથી જુદી જુદી પોલીસ ટીમોએ નાકાબંધી કરાવવા ઉપરાંત શંકાસ્પદ બાઈકના નંબર મેળવવાના પ્રયાસો કર્યા હતા. તે દરમિયાન માંગુભાઈએ પોતાના જ રાજ્યના અને જિલ્લાના વતની કાજુ હટુ બુંદેડીયાનું નામ પણ શકદાર તરીકે આપ્યું હતું.

તે દરમિયાન ધ્રોલના ત્રિકોણ બાગ પાસેથી ઉપરોક્ત બાઈક મળી આવ્યું હતું. જેમાં કાજુ હટુ બંદુડીયા તથા બાળકી મળી આવતા પોલીસે બાળકીને મેડિકલ ચકાસણી માટે હોસ્પિટલ ખસેડવા ઉપરાંત કાજુ હટુ બુંદેડીયાની અટકાયત કરી છે. આ શખ્સને બાઈકમાં લીફ્ટ આપનાર શખ્સની પણ પૂછપરછ કરાઈ રહી છે. આરોપી તથા ફરિયાદી એક જ ગામના હોવાનું ખૂલ્યું છે. આરોપીએ તે બાળકીને પોતાની સાથે લઈ જવા ઉપરાંત નજીકમાંથી પસાર થતાં બાઈકને રોકાવી આ બાળકીની દવા લેવા જવાનું છે તેમ કહી લીફ્ટ મેળવી હતી.

જો આપને આ પોસ્ટ ગમી હોય તો શેર કરો...