જામ્યુકોની જગ્યામાંથી ૧ર૦૦ થી વધુ બોર્ડ-કિયોસ્ક હટાવાયાઃ આજે પણ પ્રક્રિયા યથાવત્

Author: નોબત સમાચાર

જામ્યુકોની જગ્યામાંથી ૧ર૦૦ થી વધુ બોર્ડ-કિયોસ્ક હટાવાયાઃ આજે પણ પ્રક્રિયા યથાવત્

મંજુરી વિના આટલા બધા બોર્ડ લાગે ત્યારે કોઈ જોતું જ નહીં હોય?

જામનગર તા. ૬: જામનગરમાં ગેરકાયદે રીતે લગાવાયેલા જાહેરાતના હોર્ડિંગ્સ-બોર્ડ દૂર મહાનગરપાલિકા દ્વારા ઉતારી લેવાયા છે. છેલ્લા ત્રણ દિવસમાં ૧ર૦૦ થી વધુ મંજુરી વગરના બેનર પોસ્ટર ઉતારી લઈ કબજે કરી લેવાયા છે. આજે પણ આ કાર્યવાહી યથાવત્ છે.

જામનગર મહાનગર પાલિકાની એસ્ટેટ શાખાની ટીમ દિવાળીના તહેવારો નજીક આવતા હોવાથી વધુ સક્રિય બની છે, અને જુદી જુદી ત્રણ ટીમો બનાવી શહેરના મુખ્ય રોડ પર મહાનગરપાલિકાની જગ્યામાં મંજુરી લીધા વિના લગાવી દેવાયેલા ૧ર૦૦ થી વધુ જાહેરાતના બોર્ડ-કિયોસ્ક દૂર કરવાની કાર્યવાહી હાથ ધરવામાં આવી છે. જામનગર શહેરમાં દિવાળીના તહેવારોને કારણે કેટલાક ધંધાર્થીઓ દ્વારા મંજુરી મેળવ્યા વિના આડેધડ જાહેરાત માટે બોર્ડ અને બેનરો લગાડવામાં આવ્યા હતાં.

આડેધડ મૂકાયેલા બોર્ડ અને બેનરો જપ્ત કરવાની જામ્યુકોની એસ્ટેટ શાખાના દબાણ હટાવ અધિકારી અનવર ગજ્જણના માર્ગદર્શન હેઠળ ટીમે કામગીરી હાથ ધરી હતી. જેમાં શહેરના અલગ અલગ વિસ્તારોમાં ત્રણ ટીમો બનાવીને છેલ્લા ત્રણ દિવસથી કાર્યવાહી હાથ ધરવામાં આવી રહી છે.

જેમાં રણજીતસાગર રોડ, હવાઈચોક, ટાઉન હોલ, સેન્ટ્રલ બેંક, એસ.ટી. રોડ, બેડીનાકા, પી.એન. માર્ગ, સાત રસ્તાથી ટાઉનહોલ સુધીનો રોડ, સમર્પણ સર્કલ, ખોડિયાર કોલોની, શરૂસેક્શન રોડ સહિતના વિસ્તારોમાં કોઈપણ પ્રકારની મંજુરી વગર લગાવી દેવાયેલા બિનઅધિકૃત એવા ૧ર૦૦ થી વધુ જાહેરાતના બોર્ડ-કિઓસ્કો અને બેનરો જપ્ત કરવામાં આવ્યા છે, જે કાર્યવાહી આજે પણ ચાલુ રખાઈ છે.

આટલા બધા જાહેરાતના બોર્ડ એકાદ-બે દિવસમાં તો લાગે જ નહીં, તેથી આ બોર્ડ-કિયોસ્ક લગાવાયા ત્યારે કોઈએ જોયું નહીં હોય? તેવી નગરચર્ચા થઈ રહી છે.

જો આપને આ પોસ્ટ ગમી હોય તો શેર કરો...