જગતમંદિરમાં દ્વારકાધીશના રાષ્ટ્રપતિ દ્રૌપદી મુર્મુએ કર્યા દર્શનઃ થયા ભાવવિભોર

Author: નોબત સમાચાર

જગતમંદિરમાં દ્વારકાધીશના રાષ્ટ્રપતિ દ્રૌપદી મુર્મુએ કર્યા દર્શનઃ થયા ભાવવિભોર

રાજ્યના કેબિનેટ મંત્રી મુળૂભાઈ બેરાએ કર્યું સ્વાગતઃ પૂજારી પરિવારે કરાવ્યું પાદૂકાપૂજનઃ દીકરી ઈતિશ્રી મુર્મુ સાથે હતાં: ચૂસ્ત બંદોબસ્ત

દ્વારકા/ખંભાળિયા તા. ૧૧: રાષ્ટ્રપતિ દ્રૌપદી મુર્મેએ આજે ભાવભક્તિપૂર્વક જગતમંદિરમાં દ્વારકાધીશના દર્શન કરી મંદિર સંકુલની મુલાકાત લીધી હતી. તેઓ દ્વારકા પહોંચ્યા ત્યારે રાજ્ય સરકાર અને ગુજરાતની જનતા તરફથી રાજ્યના કેબિનેટ મંત્રી મૂળુભાઈ બેરા સહિતના મહાનુભાવોએ તેઓનું સ્વાગત કર્યું હતું.

યાત્રાધામ દ્વારકામાં રાષ્ટ્રપતિ શ્રીમતી દ્રૌપદી મુર્મુએ ભગવાન દ્વારકાધીશના દર્શન કર્યા હતાં. દ્વારકાધીશના ચરણોમાં શિશ ઝુકાવી દર્શન કરી ધન્યતા અનુભવતા રાષ્ટ્રપતિ શ્રીમતી દ્રૌપદી મુર્મુ ભાવવિભોર થયા હતાં.

તેઓએ ભગવાન દ્વારકાધીશને ભારતના નાગરિકોની સુખ, શાંતિ અને સમૃદ્ધિ માટેની હદયપૂર્વક પ્રાર્થના કરી હતી. રાષ્ટ્રપતિશ્રીએ ભક્તિભાવથી શાસ્ત્રોક્ત વિધિપૂર્વક પાદૂકાપૂજન કરી ધન્યતા અનુભવી હતી. પૂજારી પરિવારે પાદૂકાપૂજન કરાવ્યું હતું.

દ્વારકાધીશ મંદિરમાં પ્રવાસન મંત્રી મૂળુભાઈ બેરા, જિલ્લા કલેક્ટર રાજેશ તન્ના, રેન્જ આઈજી અશોકકુમાર યાદવ, પોલીસ અધિક્ષક જયરાજસિંહ વાળા, પ્રાંત અધિકારી અમોલ આવતે, વહીવટદાર તથા નાયબ કલેક્ટર હિમાંશુ ચૌહાણએ ઉપરણું, દ્વારકા મંદિરની પ્રકૃતિ, ફૂલ અને તુલસીમાંથી નિર્મિત અનુગ્રહમ અગરબત્તી, ગોલ્ડ પ્લેટેડ દ્વારકાધીનું સ્વરૂપ તથા પ્રસાદ આપી તેઓનું અદકેરૂ સ્વાગત કર્યું હતું. રાષ્ટ્રપતિશ્રી સાથે તેમના દીકરી ઈતિશ્રી મુર્મુ અને મહાનુભાવો જોડાયા હતાં.

તે પહેલા રાષ્ટ્રપતિ શ્રીમતી દ્રૌપદી મુર્મુ તેમના ગુજરાતના ત્રિદિવીસીય પ્રવાસના તૃતીય દિવસે ભગવાન દ્વારકાધીશની પાવન ભૂમિ દ્વારકામાં આવી પહોંચતા દ્વારકા હેલિપેડ પર તેમનું ઉષ્માભર્યું સ્વાગત કરવામાં આવ્યું હતું. હેલિપેડ પર પ્રવાસન મંત્રી મૂળુભાઈ બેરા, ઉપરાંત કોસ્ટગાર્ડ ડી.આઈ.જી. શ્રી મનજીત સિંઘ ગિલ, આઈ.એન.એસ. કેપ્ટન શશાંક શર્મા કલેક્ટર રાજેશ તન્ના, જિલ્લા પોલીસ અધિક્ષક જયરાજસિંહ વાળાએ રાષ્ટ્રપતિને પુષ્પગુચ્છ આપી આવકાર્યા હતાં.

જો આપને આ પોસ્ટ ગમી હોય તો શેર કરો...