કાલાવડના ચોરીના બનાવના દાગીના ખરીદનાર રાજકોટના શખ્સની ધરપકડ

Author: નોબત સમાચાર

કાલાવડના ચોરીના બનાવના દાગીના ખરીદનાર રાજકોટના શખ્સની ધરપકડ

દંપતીની ધરપકડ થઈ છે અને મહિલાની શોધખોળઃ

જામનગર તા. ૫: કાલાવડમાં સોનીની એક દુકાનમાં દસેક દિવસ પહેલાં થયેલી ચોરીમાં જે દાગીના ગયા હતા તે દાગીના ખરીદી લેનાર રાજકોટના એક શખ્સને કાલાવડ પોલીસે દબોચી લીધો છે. આ શખ્સે તે દાગીના આધાર પુરાવા વગર જ વેચાતા લીધા હતા.

કાલાવડ શહેરમાં મુખ્ય બજારમાં આવેલા મંગલમ્ જવેલર્સમાં ગઈ તા.૨૮ની બપોરે એક મહિલા ગ્રાહક બનીને આવી હતી. તેણે વેપારીને સોનાના દાગીના બતાવવાનું કહી વાતોમાં ચઢાવ્યા. તે દરમિયાન મોબાઈલ પર આવેલા કોલમાં વાત કરી રહેલા વેપારીની નજર ચૂકવી ટેબલ પરથી આ મહિલાએ સોનાના દાગીના ભરેલો પ્લાસ્ટિકનો ડબ્બો ઉઠાવી લીધો હતો.

અંદાજે રૂ. પાંચેક લાખની કિંમતના દાગીનાની ચોરીની તપાસ શરૂ કરાયા પછી રાજકોટમાંથી એક દંપતીની પોલીસે ધરપકડ કરી લીધી હતી અને કેટલોક મુદ્દામાલ કબજે કરાયો હતો. દંપતી પૈકીના પુરૂષની માતા ઉપરોક્ત દુકાનમાં ગ્રાહક બનીને ગઈ હતી તેની શોધખોળ કરાઈ રહી છે. તે દરમિયાન ઝડપાયેલા દંપતીની પૂછપરછ કરાતા તેઓએ ઉપરોકત મુદ્દામાલ રાજકોટના જામનગર રોડ પર વસવાટ કરતા રાજેશ રમેશભાઈ ભટ્ટી નામના શખ્સને વેચ્યો હોવાનું કબૂલ્યું હતું.

રાજકોટ દોડી ગયેલી પીઆઈ એન.વી. આંબલીયાના વડપણ હેઠળની ધાનાભાઈ મોરી સહિતની ટીમે ત્યાંથી રાજેશ ઉર્ફે રાજુ ભટ્ટીની ધરપકડ કરી છે. આ શખ્સે ઉપરોક્ત દાગીના ચોરાઉ હોવાનું જાણતો હોવા છતાં તેને આધાર પુરાવા વગર ખરીદી લીધા હતા. પોલીસે તેની ધરપકડ કરી પૂછપરછ કરતા તેની સામે કેટલાક ગુન્હાઓ નોંધાયેલા હોવાનું ખૂલ્યું છે.

જો આપને આ પોસ્ટ ગમી હોય તો શેર કરો...