Advertisement
Author: નોબત સમાચાર

કાલાવડ તાલુકાના નવા રણુંજા ધામમાં શ્રી રામદેવજી મહારાજનો ત્રિ-દિવસીય ઉત્સવ યોજાશે

લોકમેળો, ભજન, ભોજન, શોભાયાત્રા સહિત કાર્યક્રમોઃ

                                                                                                                                                                                                      

જામનગર તા. ર૯: કાલાવડ નજીક આવેલા નવા રણુંજા ધામમાં ભાદરવા સુદ નોમ, દશમ અને અગિયારસના પાવન દિવસે શ્રી રામદેવજી મહારાજના ઉત્સવનું ભવ્ય આયોજન કરવામાં આવ્યું છે. તા. ૧/૯ થી તા. ૩/૯ સુધી ભાતિગળ લોકમેળો, ભજન-ભોજન, શોભાયાત્રા સહિતના કાર્યક્રમો યોજાશે.

કાલાવડ ગામ નજીક આવેલા નવા રણુંજા ધામમાં સુપ્રસિદ્ધ શ્રી રામદેવજી મહારાજનું મંદિર આવેલું છે. શ્રી રામદેવજી મહારાજના પાવન સાંનિધ્યમાં પ્રતિવર્ષ ભાદરવા સુદ નોમ, દશમ અને અગિયારસના રામદેવજી મહારાજના ઉત્સવની ભવ્ય ઉજવણી કરવામાં આવે છે. આગામી તા. ૧/૯ થી તા. ૩/૯ સુધી આ ઉત્સવ ઉજવાશે.

સિદ્ધપીઠ નવા રણુંજા ધામે રામદેવપીરની ભવ્ય શોભાયાત્રા, સમાધિ ઉત્સવ, ધ્વજારોહણ, આ ઉપરાંત દરરોજ બપોરે અને સાંજે મહાપ્રસાદ, રાત્રે નામાંકિત કલાકારો સંતવાણીમાં દૂહા-છંદ-ભજનની રમઝટ બોલાવશે.

અત્રે ઉલ્લેખનિય છે કે, આ ત્રણ દિવસ દરમિયાન ભવ્ય લોકમેળો પણ યોજવામાં આવે છે, જેમાં મહારાષ્ટ્ર, રાજસ્થાન, સુરત, અમદાવાદ, જામનગર, કાલાવડ સહિતના વિસ્તારોમાંથી શ્રદ્ધાળુઓ બહોળી સંખ્યામાં ઉમટી પડશે.

જુના રણુંજાની જગ્યા કે જે હીરાબાપાની જગ્યા તરીકે પણ પ્રસિદ્ધ છે. ત્યાં પણ વર્ષોથી રામદેવજી મહારાજનો ઉત્સવ ધામધૂમથી ઉજવવામાં આવે છે. કાનગોપી, ભજન સહિતના ધાર્મિક કાર્યક્રમો ઉજવાય છે.

ઉલ્લેખનિય છે કે, નવા રણુંજા મંદિરમાં આ ઉપરાંત વર્ષ દરમિયાન બાર બીજની ઉજવણી, દર મહિનાની સુદ બીજના દિવસે ધ્વજારોહણ, નવરાત્રિમાં ગરબી, રામદેવજી મહારાજના પાઠ, નવા વર્ષે અન્નકૂટ સહિતના કાર્યક્રમો યોજાય છે. પક્ષીઓ માટે ચણ, સવાર-સાંજ પ્રસાદની વ્યવસ્થા સહિતની સેવાકીય પ્રવૃત્તિઓ કરવામાં આવે છે.

જો આપને  પોસ્ટ ગમી હોય તો શેર કરો...

Follow us:   પ્રકારની બીજી પોસ્ટ માટે અમારી એપ ડાઉનલોડ કરો.

Android: https://rb.gy/surhtv

Apple ios: https://rb.gy/cee4r9

 

Social Media

ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો

https://www.instagram.com/nobatdaily?r=nametag

 

વિડિયો માટે અમારી યુ-ટ્યૂબ ચેનલને સબસ્ક્રાઈબ કરો

https://youtube.com/@Nobatofficial



Advertisement

અન્ય સમાચારો

Advertisement
close
Ank Bandh