ખોડિયાર કોલોની વિસ્તારમાં રહેણાંક મકાનમાં ધોળા દિવસે ર૪ તોલા સોનાના દાગીનાની ચોરી

Author: નોબત સમાચાર

ખોડિયાર કોલોની વિસ્તારમાં રહેણાંક મકાનમાં ધોળા દિવસે ર૪ તોલા સોનાના દાગીનાની ચોરી

પરપ્રાંતીય નોકરીયાત દંપતીની ગેરહાજરીનો તસ્કરે લાભ ઉઠાવ્યોઃ

જામનગર તા. ૧: જામનગરના ખોડિયારકોલોની વિસ્તારમાં આવેલી બોર્ડિંગ પાછળ ભાડાના મકાનમાં રહેતું એક પરપ્રાંતીય દંપતી ગઈકાલે નોકરી પર ગયા પછી સવારથી બપોર સુધી બંધ પડેલા તેમના મકાનમાં ચોરી થઈ છે. કોઈ તસ્કર પાછળના દરવાજાનું લાકડુ તોડી અંદર હેંડબેગમાં રાખેલા ૨૪ તોલા ઉપરાંતના સોનાના દાગીના અને હીરાની બુટી ચોરી ગયા છે. સિટી સી ડિવિઝન પોલીસ સ્ટેશનનો સ્ટાફ અને એલસીબી સ્ટાફ તપાસમાં જોતરાયા છે.

જામનગરના ખોડિયાર કોલોની રોડ પર આવેલી જૂની આરામ કોલોની પાસે રાજગોર બ્રાહ્મણ જ્ઞાતિની બોર્ડિંગ પાછળના એક મકાનમાં ભાડેથી રહેતા મૂળ તામિલનાડુ રાજ્યના ત્રીચી જિલ્લાના વતની મરીય મેલવીન નામના પરપ્રાંતીય આસામી ગઈકાલે સવારે સાડા નવેક વાગ્યે રહેણાંકને તાળુ મારીને બહાર ગયા હતા.

તે પછી બપોરે ત્રણેક વાગ્યે જ્યારે તેઓ પરત આવ્યા તે દરમિયાન તેમના મકાનમાં ચોરી થઈ ગઈ હતી. ધોળા દહાડે ત્રાટકેલા કોઈ તસ્કરે તે રહેણાંકના પાછળના દરવાજા નીચે મારવામાં આવેલુ લાકડુ તોડી નાખી ઘરમાં પ્રવેશ મેળવ્યા પછી શયનખંડ તથા અન્ય ઓરડામાં ખાંખાખોળા કર્યા પછી એક હેન્ડબેગ શોધી કાઢી હતી.

તે હેન્ડબેગમાં મરીય મેલવીન દ્વારા રાખવામાં આવેલા સોનાના જુદા જુદા દાગીના મળી ૨૪ તોલા અને ૪ ગ્રામ વજનના દાગીના અને પેંડલ તેમજ ડાયમંડની બુટી ચોરી કરી લીધી હતી. કુલ રૂ.૬ લાખ ૧ હજારની કિંમતના દાગીનાની ચોરી કરી લીધી હતી. તેની જાણ થતાં સિટી સી ડિવિઝન પોલીસ સ્ટેશનનો સંપર્ક કરવામાં આવ્યો હતો. દોડી ગયેલા પીએસઆઈ એન.એમ. ઝાલાએ મરીય મેલવીનની ફરિયાદ પરથી બીએનએસની કલમ ૩૩૧ (૩), ૩૦૫ (એ) હેઠળ ગુન્હો નોંધ્યો છે. ડીવાયએસપી જે.એન. ઝાલાની સૂચનાથી તપાસમાં એલસીબીનો કાફલો પણ જોડાયો છે.

આ વિસ્તારમાં ધોળા દિવસે ચોરી થતાં પોલીસ હરકતમાં આવી છે. જાણવા મળ્યા મુજબ તે મકાનમાં ભાડે રહેતા મરીય મેલવીન અને તેમના પત્ની ખાનગી કંપનીમાં નોકરી કરે છે અને ગઈકાલે બંને વ્યક્તિ ઘેર ન હતા ત્યારે સવારના સાડા નવ વાગ્યાથી બપોરના પોણા ત્રણ વાગ્યા દરમિયાન તસ્કર હાથફેરો કરી ગયો છે.

જો આપને આ પોસ્ટ ગમી હોય તો શેર કરો...