મરચાની ભૂક્કીમાં કલરની ભેળસેળના કેસમાં નગરના વેપારીનો થયો છૂટકારો

Author: નોબત સમાચાર

મરચાની ભૂક્કીમાં કલરની ભેળસેળના કેસમાં નગરના વેપારીનો થયો છૂટકારો

૨૭ વર્ષ પહેલાં લેવામાં આવ્યો હતો નમૂનોઃ

જામનગર તા. રઃ જામનગરની પટેલ મસાલા મીલના સંચાલક સામે ર૭ વર્ષ પહેલાં જામ્યુકોની ફૂડ શાખાના ઈન્સ્પેક્ટરે મરચાની ભૂક્કીમાં કલરની ભેળસેળનો ગુન્હો નોંધ્યો હતો. તે કેસ ચાલી જતાં અદાલતે આરોપી નો છૂટકારો ફરમાવ્યો છે. તે નમૂનો સર્કીટ હાઉસમાંથી લેવામાં આવ્યો હતો અને બચાવ પક્ષે નમૂનામાં મોકલાયેલો સામાન આ પેઢીમાંથી ખરીદવામાં આવ્યો હોવાનું બીલ અપાયંુ નથી તેવી દલીલ કરી હતી.

જામનગર મહાનગર પાલિકામાં ફૂડ ઈન્સ્પેક્ટર તરીકે વર્ષ ૧૯૯૮માં ફરજ બજાવતા એચ.એસ. પંડયા એ સર્કીટ હાઉસમાંથી મરચાની ભૂક્કીનો નમૂનો મેળવી તેને પૃથ્થકરણ માટે વડોદરા સ્થિત લેબ.માં મોકલાવ્યા પછી તેમાં કલર ઉમેરવામાં આવ્યો હોવાનું જણાઈ આવ્યું હતું. તેથી જવાબદાર અધિકારીની મંજૂરી લઈ સર્કીટ હાઉસના જે તે વખતના જવાબદાર અધિકારી તથા પટેલ મસાલા મીલ ચલાવતી પટેલ હિરજી કાનજી એન્ડ કંપનીવાળા દામોદર હિરજી પટેલ, જયંતિભાઈ હિરજી પટેલ સામે કેસ કરાયો હતો.

ઉપરોક્ત કેસ ચાલવા પર આવતા ફરિયાદીની આરોપી પક્ષના વકીલે ઉલટ તપાસ કરી હતી. જેમાં પટેલ હિરજી કાનજી એન્ડ કંપની પાસેથી ઉપરોક્ત સામાન ખરીદવામાં આવ્યો હોય તેવું કોઈ અસલ બીલ કબજે કરવામાં આવ્યું ન હોવાનું ખૂલ્યું હતું. તે ઉપરાંત રિપોર્ટમાં છેકછાક જોવા મળી હતી અને રિપોર્ટમાં નમૂનો અનસેફ હોવા અંગે કોઈ અભિપ્રાય નથી તેવી દલીલ કરવામાં આવી હતી.

તે ઉપરાંત મંજૂરી આપનાર અધિકારીને મંજૂરી આપવાની સત્તા ન હોવાનું પણ ઉમેરી નમૂનાનો ત્રીજો ભાગ કોની પાસે (કસ્ટડીમાં) છે તેની ફરિયાદીને જાણકારી ન હોવાની પણ દલીલ કરાઈ હતી. તે ઉપરાંત ફરિયાદી બી.એસ. પ્રજાપતિને નમૂનો લીધાની જાણકારી ન હતી અને નમૂનો લેનાર એચ.એસ. પંડયાને જે તે વખતે તપાસવામાં ન આવ્યાનું અદાલતને જણાવાયું હતું. તે દલીલ ગ્રાહ્ય રાખી અદાલતે પટેલ હિરજી કાનજી એન્ડ કંપનીના ભાગીદાર જયંતિલાલ હિરજી પટેલનો છૂટકારો ફરમાવ્યો છે. આરોપી તરફથી વકીલ હેમલ ચોટાઈ, વી.એચ. બક્ષી, હીરેન ગુઢકા રોકાયા હતા.

જો આપને આ પોસ્ટ ગમી હોય તો શેર કરો...