જામનગરમાં લઘુતમ તાપમાન ર.૬ ડીગ્રી અને મહત્તમ તાપમાન પાંચ ડીગ્રી ઘટ્યું

Author: નોબત સમાચાર

જામનગરમાં લઘુતમ તાપમાન ર.૬ ડીગ્રી અને મહત્તમ તાપમાન પાંચ ડીગ્રી ઘટ્યું

હાલાર ઠંડુગારઃ હિમાલયમાં હિમવર્ષાથી શિતલહેરઃ

જામનગર તા. ર૪: લદ્દાખ, જમ્મુ-કાશ્મીર હિમાચલ પ્રદેશ અને ઉત્તરાખંડમાં બરફવર્ષાએ રફ્તાર પકડી લીધી છે, જેના પગલે મોટાભાગના વિસ્તારોમાં બરફની સફેદ ચાદર પથરાઈ ગઈ છે. ઘરો, પહાડો, વૃક્ષો, મેદાનો, વાહનો તથા માર્ગો બરફ આચ્છાદીત થઈ ગયા છે. મોટાભાગના વિસ્તારોમાં તાપમાનનો પારો માઈનસમાં ચાલ્યો ગયો છે. હિમવર્ષાથી પર્યટકો આનંદીત થઈ ગયા છે, પરંતુ સ્થાનિકોની હાડમારીમાં વધારો થયો છે. ઉત્તર ભારતના પહાડી વિસ્તારોમાંથી આવતા ઠંડા પવનના પગલે હરિયાણાથી ગુજરાત સુધી ઠંડીનું મોજુ ફરી વળ્યું છે. વેસ્ટન ડિસ્ટર્બન્સના પગલે ગુજરાતના વિવિધ ભાગોમાં માવઠાની આગાહી હવામાન વિભાગ દ્વારા કરવામાં આવી છે, જેના પગલે તાપમાનમાં ઘટાડો થતા હવે ઠંડીમાં વધારો થશે. જામનગરમાં શનિવારે સવારે પૂરા થતાં ચોવીસ કલાક દરમિયાન ર.૬ ડીગ્રીના ઘટાડા સાથે ન્યુનત્તમ તાપમાન ૧ર ડીગ્રી અને મહત્તમ તાપમાનનો પારો સડસડાટ પાંચ ડીગ્રી સુધી ગગડીને ર૩.પ ડીગ્રીએ પહોંચી ગયો હતો. પવનની ગતિ વધીને પ્રતિકલાકની સરેરાશ રપ થી ૩૦ કિ.મી.ની રહેવા પામી હતી. ગઈકાલે સવારથી જ સમગ્ર વાતાવરણમાં ઠંડક પ્રસરી જવા પામી હતી. સાંજથી તેમાં વધારો થતા પ્રજાજનો ઠંડીથી ધ્રુજી ઊઠ્યા હતાં. રાતથી વહેલી સવાર સુધી હાડ થીજવતી ઠંડી અનુભવાઈ હતી. ઠંડી સામે રક્ષણ મળે તે માટે લોકો ગરમ વસ્ત્રોમાં ઢબુરાઈ ગયા હતાં તેમજ ગરમ પીણા અને તાપણાનો સહારો લીધો હતો.

જામનગરના વાતાવરણમાં ભેજનું પ્રમાણ ૬ ટકા ઘટીને ૪૯ ટકા રહ્યું હતું.

ઉલ્લેખનિય છે કે, સાંજના સમયે પણ બરફીલા પવનના કારણે લોકો વહેલા જ ઘરની વાટ પકડી છે છે, જેથી શહેરના મુખ્ય માર્ગો સુમસામ નજરે પડી રહ્યા છે. છેલ્લા ત્રણ દિવસથી ભેજના પ્રમાણમાં પણ વધારો થયો હોવાના કારણે પ્રતિદિન જાકળભીની સવાર થાય છે અને માર્ગો પણ ભીંજાયેલા રહે છે, જેથી પરોઢિયે વાહનચાલકોને હાલાકી વેઠવી પડે છે, જો કે હવામાન વિભાગ દ્વારા ઠંડીનો પારો ૧ર.૦ ડીગ્રી સુધી ઉપર દર્શાવાઈ રહ્યો છે, જે આંકડા બરોબર ન હોવાનો નગરજનોનો મત છે.

જો આપને આ પોસ્ટ ગમી હોય તો શેર કરો...