દિગ્વિજય પ્લોટ-૪૯માં મકાનમાંથી મળી આવ્યો દારૂ બીયરનો જથ્થોઃ અન્ય મકાનમાંથી ૯૬ ચપલા કબજે

Author: નોબત સમાચાર

દિગ્વિજય પ્લોટ-૪૯માં મકાનમાંથી મળી આવ્યો દારૂ બીયરનો જથ્થોઃ અન્ય મકાનમાંથી ૯૬ ચપલા કબજે

રણજીતસાગર રોડ પરથી દસ ચપલા સાથે પરપ્રાંતીય શખ્સ પકડાયોઃ

જામનગર તા. ૨૦: જામનગરના દિગ્વિજય પ્લોટ-૪૯માં એક મકાનમાંથી પોલીસે ઈંગ્લીશ દારૂની ૧ર બોટલ અને બીયરના ર૦ ટીન કબજે કર્યા છે. ઝડપાયેલા આરોપીએ સપ્લાયરનું નામ આપ્યું છે. જ્યારે રણજીતસાગર રોડ પર એક મકાનમાંથી ઈંગ્લીશ દારૂના ૯૬ ચપલા ઝડપાયા છે. આરોપી નાસી ગયો છે. એક પરપ્રાંતીય શખ્સ ૧૦ ચપલા સાથે પકડાઈ ગયો છે.

જામનગરના દિગ્વિજય પ્લોટ વિસ્તારની શેરી નં.૪૯માં આવેલા એક શખ્સના મકાનમાં ઈંગ્લીશ દારૂનો જથ્થો પડ્યો હોવાની બાતમી પરથી ગઈકાલે સિટી એ ડિવિઝન પોલીસ સ્ટેશનના સર્વેલન્સ સ્ટાફે પીઆઈ એન.એ. ચાવડાની સુચનાથી ત્યાં આવેલા મહેશ કરશનદાસ ગજરાના મકાનમાં દરોડો પાડ્યો હતો.

તે મકાનની તલાશી લેવામાં આવતા ત્યાંથી ભારતીય બનાવટના અંગ્રેજી શરાબની ૧ર બોટલ તેમજ બીયરના ર૦ ટીન મળી આવ્યા હતા. પોલીસે રૂ।.૧૮ હજારની કિંમતનો દારૂનો જથ્થો કબજે કરી મહેશ ગજરાની ધરપકડ કરી છે. આ શખ્સે તે જથ્થો દિગ્વિજય પ્લોટ-૪૯માં રામનગરના ઢાળીયા પાસે રહેતા નવીન લક્ષ્મીદાસ દામા પાસેથી લીધો હોવાની કબૂલાત કરી છે.

જામજોધપુર તાલુકાના શેઠવડાળા ગામથી નરમાણા ગામ તરફ જવાના રસ્તા પર સખપુર પાસેથી ગઈકાલે સાંજે પસાર થતાં નરમાણા ગામના રાજન હીરેનભાઈ અમલાણી નામના શખ્સને પેટ્રોલિંગમાં રહેલી પોલીસ ટીમે રોકી ચેક કરતા શખ્સ પાસે દારૂની અડધી બોટલ મળી આવી હતી.

જામનગરના રણજીત સાગર રોડ પર આવેલા મારૂ કંસારા હોલ પાછળ રણજીતસિંહ બહાદુરસિંહ જાડેજાના મકાનમાં ગઈકાલે સાંજે સિટી એ ડિવિઝનના સ્ટાફે દરોડો પાડતા તે મકાનમાંથી ઈંગ્લીશ દારૂના ૯૬ ચપટા મળી આવ્યા હતા. દરોડા પહેલાં આરોપી રણજીતસિંહ જાડેજા નાસી ગયો હતો. તેની શોધ કરાઈ રહી છે.

જામનગરના રણજીત સાગર રોડ પર ગઈકાલે સાંજે પસાર થતાં દરેડના મસીતીયા રોડ પર વસવાટ કરતા સનોજકુમાર ગોરખનાથ ચૌધરી નામના શખ્સને પોલીસે શકના આધારે રોકાવી ચેક કરતા આ શખ્સ પાસેથી ઈંગ્લીશ દારૂના દસ ચપલા મળી આવ્યા હતા. પોલીસે ચપલા કબજે કરી સનોજકુમારની ધરપકડ કરી છે.

જામનગરના દિગ્વિજય પ્લોટ વિસ્તારની શેરી નં.પ૮ સામેથી ગઈરાત્રે જઈ રહેલા બેડેશ્વર નજીકના સંતકબીર આવાસમાં રહેતા કનકસિંહ વિજયસિંહ જાડેજા નામના શખ્સને પોલીસે રોકી ચેક કરતા તેની પાસેથી ઈંગ્લીશ દારૂના બે ચપલા મળી આવ્યા હતા.

જો આપને આ પોસ્ટ ગમી હોય તો શેર કરો...