રાજકીય પક્ષોની રોબોટ રેલી

Author: નોબત સમાચાર

રાજકીય પક્ષોની રોબોટ રેલી

આ વાત છે. ૨૦૨૮ની સાલમાં આવતી ચૂંટણીઓના સમયની... આવું થાશે જોઈ લેજો.

આજે તો ગજબ થઈ ગયો સૂર્ય કઈ બાજુ ઉગ્યો છે તે નક્કી કરવા માટે મેં એ આઈ ને પૂછ્યું.

વિરોધ પક્ષો અને શાસક પક્ષ એક મુદ્દા ઉપર સહમત થયો હતો. મિટિંગોનો ધમધમાટ શરૂ થઈ ગયો હતો.

મને ખબર છે કે તમને હરખના શેરડા ફૂટ્યા હશે. કોઈ વિકાસની વાતને લઈ અને એક મત નથી થયા પણ હવે રેલી માટે રોબોટની ખરીદી કરવા તમામ પક્ષ અલગ અલગ ઓફિસમાં એક મુદ્દા પર વાત કરી રહૃાા છે.

શાસક પક્ષ

''નેતાજી આપણે બહુ રોબોટ ની જરૂર નહીં પડે કારણ કે આપણી પાસે ઘરની કંકોત્રી દેવા માટે કુરિયર કરી દે, કે ુરટ્ઠંજટ્ઠૅૅ કરી દે પરંતુ આપણા પક્ષને મત આપજો તેવું પાંચ વાર ઘરે ઘરે જઈ જમાઈ જમણનું આમંત્રણ આપતા હોય તેમ આગ્રહ કરે તેવા નવરી બજાર જેવા કાર્યકર્તાઓ છે.''

''બીજું કે સામેના પક્ષમાંથી પણ ઘણા તક પીપાષુ કશુક પામવા માટે દરવાજે ઉભા જ છે.

ત્યાં જ એક ભરાવદાર કાયા ધરાવતો મહાકાય નેતા બોલ્યો કે ''હવે હજાર પંદરસો માં રેલીમાં આવતા દાડીયાઓ ભાવ વધારો માગી રહૃાા છે. આપણે અવારનવાર રેલી કરવી હોય તો દર વખતે પૈસા દેવા કરતા એક વખતનું રોકાણ કરી અને રોબોટ લઈ લેવા સારા.''

''મારા ધ્યાનમાં એક કંપની છે જે દાધારીંગા, મજબુત, છૂટથી ગાળા ગાળી કરી શકે, જરૂર પડે છૂટા હાથની મારામારી પણ કરી શકે, તેવા રોબોટ બનાવે છે. વળી પાર્ટી ફંડ પણ આપશે.''

વિરોધ પક્ષ

''રોબોટ તો લેવા જ પડશે કારણ કે આપણા કાર્યકરો સામેના પક્ષમાં ભળવા મંડ્યા છે. નેતાઓ પણ વંડી ઠેકી અને જુદી જુદી ખુરશીઓ પકડવા મંડ્યા છે.''

''જે થોડા ઘણા બચ્યા છે તે આળસુ થઈ ગયા છે અને વિરોધ કરવા માટે પણ થોડું ફંડ ફાળવો તેવી માગણી કરી રહૃાા છે.''

નવા રોબોટ છે તે કાર્યાલયમાં બેસવા તથા રહેવા માટે ચા પાણી કે ભજીયા પાર્ટીની ડિમાન્ડ પણ નહીં મૂકે.

''એ બધી વાત સાચી પરંતુ આપણને કોઈ બોન્ડ દ્વારા ફંડ આપવું જોઈએ ને? તપાસ કરો ક્યાંક રૂપિયા બાકી રાખી રોબોટ મળતા હોય તો.''

''રેલીમાં આપણે મોકલશું તો ફૂડ પેકેટનો ખર્ચો પણ બચશે.''

''મોટા સ્પીકર ઇનબિલ્ટ હોય તેવા રોબોટ પસંદ કરશું જેથી નારેબાજી સારી અને મોટેથી કરી શકે.''

નાના પક્ષ

''આપણે રોબોટ લેવા છે પરંતુ તપાસ કરો કે કોઈ મોટા પક્ષે ખરીદ કર્યા હોય અને અપડેટ થવા માટે જુના રોબોટ કાઢવાના હોય તો આપણને સારું પડે.''

''એમને ખબર પડે કે સામેના પક્ષ વાળાને લેવા છે તો કદાચ ન આપે.''

''ભલા માણસ કોઈપણ પક્ષમાં લાલચુ,ભ્રષ્ટાચારી, નેતાઓ ન હોય તેવું બને નહીં.''

''અંડર ટેબલ વ્યવહાર કરો એટલે ૧૦ જુના રોબોટની સાથે બે નવા પણ રવાના કરી દે.''

આવો સમય ગેરેન્ટીથી આવશે જ.

જોકે આ તો મશીન કહેવાય એટલે ક્યારેક સોફ્ટવેરમાં પ્રોબ્લેમ પણ થાય તો કેવી ઘટના ઘટે?

રેલી બરાબર મુખ્ય ચોકમાં જ પહોંચી હોય ત્યાં એક રોબોટ સૌથી ઉપરની જગ્યાએ પહોંચી અને જાહેરાત કરે...

''મિત્રો... મિત્રો... મારૃં સોફ્ટવેર અપડેટ માંગે છે, ત્યાં સુધી વિપક્ષના વખાણ સાંભળી લો!'' નેતાજી તો પરસેવે રેબઝેબ થઈ ગયા. તેમણે તરત જ આઈટી સેલને ફોન કર્યો, ''અલ્યા, આમાં વિરોધ પક્ષનું વાયરસ ક્યાંથી આવ્યું?''

સામેથી જવાબ મળ્યો, ''સાહેબ, પેલો રોબોટ ઓપરેટર છે ને, એ ગઈકાલે જ સામેના પક્ષમાં ભળી ગયો છે, એટલે એણે 'બખડ જંતર' મોડ એક્ટિવેટ કરી દીધું છે!''

સામે રોબોટ બનાવતી કંપનીઓની જાહેરાતમાં પણ સ્લોગન આવશે.

રોબોટ બનાવતી જુદી જુદી કંપનીઓ પણ નવી નવી સ્કીમો સાથે દરેક પક્ષનો સંપર્ક કરશે.

(૧) અમારી કંપની હુબહુ માણસ જેવા રોબોટ બનાવી આપશે, (૨) એક વખત ચાર્જ કરશો તો બે કલાક સુધી રેલીમાં ભાગ લઈ શકશે. (૩) અમારો રોબોટ ક્યારેય સત્તાની માગણી નહીં કરે. (૪) ૫૦ રોબોટ ખરીદશો તો પાંચ રોબોટ ફ્રી આપવામાં આવશે. (૫) અમારો રોબોટ ઇવીએમ સેટિંગ પણ કરી આપશે. (૬) સિગ્નેચર ફીચર તરીકે કંપની કહેશે કે અમારો રોબોટ ક્યારેય પક્ષ પલટો નહીં કરે.

જુદા જુદા પક્ષના રોબોટ જ્યારે સાંજ પડે કોઈ ચાર્જિંગ પ્લગ શોપ*માં ભેગા થશે ત્યારે ચર્ચા કરતા હશે કે આપણા ગમે તેટલા સ્માર્ટ સોફ્ટવેર હોય પરંતુ આપણને ચલાવનારા આ લુચ્ચી બુદ્ધિના, જાડી ચામડીના, અત્યંત ભ્રષ્ટ નેતાઓ જેવા આપણે ક્યારેય નહીં થઈ શકીએ.

દૂર બેઠેલો બિચારો પ્રજાજન પેટના ખાડા ને પંપાળતો, કોરી આંખોથી આ રોબોટના આંસુ જોતો, વિચારતો હશે કે આ મશીનને રોવડાવે છે તો મારી શું વિશાત?

વિચારવાયુઃ- રોબોટ ૧: ''તને કયા પક્ષમાં રહેવું ગમે?''

રોબોટ ૨: ''મને તો અપક્ષમાં રહેવું ગમે, કારણ કે ત્યાં ચાર્જિંગ ઓછું અને આરામ વધારે મળે છે!''

મિલન ત્રીવેદી

જો આપને આ પોસ્ટ ગમી હોય તો શેર કરો...