હનીટ્રેપની આરોપી યુવતી તથા તેના સાગરિતને કરી દેવાયા જેલહવાલે

Author: નોબત સમાચાર

હનીટ્રેપની આરોપી યુવતી તથા તેના સાગરિતને કરી દેવાયા જેલહવાલે

નાસી છૂટેલા પોલીસકર્મી-હોમગાર્ડઝની શોધખોળઃ

ખંભાળિયા તા. ૧: દ્વારકા નજીક ઓખામઢી પાસે રાજકોટના વૃદ્ધને હનીટ્રેપમાં ફસાવી રૂ.૧ કરોડ ૨૦ લાખ પડાવી લેનાર યુવતી તથા તેના સાગરિત જીમ ટ્રેનરના રિમાન્ડ પૂર્ણ થતાં પોલીસે કોર્ટ આદેશથી જેલહવાલે કર્યા છે. નાસી છૂટેલા પોલીસકર્મી તથા હોમગાર્ડઝના સદસ્યની સઘન શોધ કરાઈ રહી છે.

દેવભૂમિ દ્વારકા જિલ્લાના દ્વારકા નજીક ઓખામઢી ૫ાસે રાજકોટના પટેલ વેપારી વૃદ્ધ સાથે એક કરોડ વીસ લાખ રૂપિયા હનીટ્રેપના બનાવમાં પડાવી લેવાયા હતા. તે અંગે દ્વારકા જિલ્લા પોલીસ દ્વારા આરષુસિંગ ઉર્ફે નીકિતા તથા પર્વત બાસફોર્ડ નામના બે આરોપીની ધરપકડ કરી કોર્ટ પાસેથી ચાર દિવસના રિમાન્ડ મેળવ્યા હતા.

રિમાન્ડની મુદ્દત પૂર્ણ થતાં તપાસનીશ અધિકારી ઓખાના પીએસઆઈ આર.આર. જરૂ દ્વારા બંનેને ગઈકાલે દ્વારકાની અદાલતમાં રજૂ કરાતા અદાલતે તેઓને જેલહવાલે કરવા હુકમ કર્યાે હતો. જેના પગલે બંને આરોપીને જામનગરની જિલ્લા જેલમાં ધકેલાયા છે.

આ ગુન્હાના બાકીના બે આરોપી જામનગરના પોલીસ હેડકવાર્ટરમાં ફરજ બજાવતા કોન્સ્ટેબલ સંજય કરંગીયા તથા હોમગાર્ડઝના સદસ્ય અજય નામનો શખ્સ રાજકોટના વૃદ્ધ પાસેથી મેળવી લીધેલી રૂ.૧.૨૦ કરોડની રકમ સાથે રાખી પલાયન થઈ ગયા છે. તેમના લોકેશન શોધી કાઢવા અને પકડી લેવા તજવીજ હાથ ધરાઈ છે. આ બંને પકડાયા પછી બાકીના હનીટ્રેપના કેસની વિગતો પણ બહાર આવે તેવી શક્યતા રહેલી છે.

જો આપને આ પોસ્ટ ગમી હોય તો શેર કરો...