વીજચોરીના કેસમાં સલાયાના મહિલાને ત્રણ વર્ષની સખત કેદઃ રૂ।.૭૩ હજારનો દંડ

Author: નોબત સમાચાર

વીજચોરીના કેસમાં સલાયાના મહિલાને ત્રણ વર્ષની સખત કેદઃ રૂ।.૭૩ હજારનો દંડ

છ વર્ષ પહેલાં કરાયો હતો વીજચોરીનો આક્ષેપઃ

જામનગર તા. ૩૧: ખંભાળિયા નજીકના સલાયામાં છ વર્ષ પહેલાં કરાયેલા વીજ ચેકીંગમાં એક મહિલા ઘરની બાજુમાં આવેલા થાંભલામાંથી સીધુ વીજજોડાણ મેળવી વીજળી વાપરતા મળી આવ્યા હતા. તેઓને પુરવણી બીલ આપી ફોજદારી ફરિયાદ કરાઈ હતી. તે કેસ ચાલી જતા ખાસ ઈલેકટ્રીક કોર્ટે આ મહિલાને ત્રણ વર્ષની સખત કેદ અને રૂ।.૭૩,૦૦૯નો દંડ ફટકાર્યાે છે.

દેવભૂમિ દ્વારકા જિલ્લાના મુખ્ય મથક ખંભાળિયા નજીક આવેલા સલાયા ગામમાં ગઈ તા.૬-૧ર-૧૯ના દિવસે વીજ કંપની દ્વારા કરવામાં આવેલા ચેકીંગ દરમિયાન હુસેની ચોક, સ્ટેશન રોડ પર નસીમાબેન સતારભાઈ ભોકલ નામના મહિલાના મકાનમાં ચકાસણી કરવામાં આવી હતી.

આ વેળાએ નસીમાબેન વીજ મીટર ધરાવતા ન હોવા છતાં ઘરની બાજુમાંથી પસાર થતી વીજ કંપનીની લાઈનમાંથી સર્વિસ વાયર જોડી ગેરકાયદેસર રીતે વીજ પુરવઠો મેળવી તેનો વપરાશ કરતા મળી આવ્યા હતા. આ મહિલાને રૂ।.૧૨,૧૬૮નું બીલ આપવામાં આવ્યું હતું અને વીજચોરી અંગે ફરિયાદ કરાઈ હતી.

ઉપરોક્ત કેસ ખંભાળિયાની ખાસ વીજળી કોર્ટમાં ચાલી જતાં અદાલતે એપીપી બી.એસ. જાડેજા દ્વારા કરવામાં આવેલી દલીલોને ગ્રાહ્ય રાખી આ મહિલાને તક્સીરવાન ઠરાવ્યા પછી ત્રણ વર્ષની સખત કેદ તથા વીજચોરીની રકમનો છ ગણો દંડ ભરવા હુકમ કર્યાે છે.

જો આપને આ પોસ્ટ ગમી હોય તો શેર કરો...