મોજપની મલકુસ્તીના વિજેતાઓને અપાયા હજારો રૂપિયાના ઈનામો

Author: નોબત સમાચાર

મોજપની મલકુસ્તીના વિજેતાઓને અપાયા હજારો રૂપિયાના ઈનામો

દ્વારકા નજીક યોજાયેલી સ્પર્ધામાં રાજ્યભરમાંથી ૬૯૦ ખેલાડીઓ જોડાયા હતા

ખંભાળિયા તા. ૧૭: દેવભૂમિ દ્વારકા જિલ્લાના મોજપમાં પરંપરાગત મલકુસ્તી સ્પર્ધા યોજાઈ હતી. આ પરંપરાગત મલકુસ્તી સ્પર્ધામાં ૬૯૦થી વધારે ખેલાડીઓએ ભાગ લીધો હતો. અને વયજૂથ મુજબ અગ્રીમ સ્થાનો મેળવનાર વિજેતાઓને હજારો રૂપિયાના ઈનામો અપાયા હતાં.

ગુજરાત રાજ્ય સરકારના રમત-ગમત, યુવા અને સાંસ્કૃતિક પ્રવૃત્તિઓ વિભાગ હેઠળની સ્પોર્ટ્સ ઓથોરીટી ઓફ ગુજરાત-ગાંધીનગર દ્વારા આયોજીત અને જિલ્લા રમત ગમત અધિકારી-દેવભૂમિ દ્રારકા દ્વારા સંચાલિત પરંપરાગત મલકુસ્તી સ્પર્ધા મોજપ-૨૦૨૫ તથા પ્રતિભા શાળી ખેલાડીઓ પસંદગી પ્રક્રિયાની સ્પર્ધાનું આયોજન ઓખામંડળ(દ્વારકા) તાલુકાના મોજપમાં કરવામાં આવ્યું હતું.

પરંપરાગત મલ કુસ્તી સ્પર્ધા ૨૦૨૫માં ગુજરાતના તમામ જિલ્લાઓમાંથી જુદા જુદા વયજૂથમાં કુલ ૬૯૦થી વધારે ખેલાડીઓએ ભાગ લીધો હતો. જેમાં વયજૂથ મુજબ કુલ ૧૫ ખેલાડીઓ વિજેતા થયેલ છે. જેમાં પરંપરાગત મલ કુસ્તી સ્પર્ધા ૮ થી ૧૦ વયજૂથમાં પ્રથમ ક્રમે હરેશ વિરમભા માણેક, દ્વિતીય ક્રમે સિદ્ધાર્થ આર.વિજુડા અને તૃતીય ક્રમે સાદિક સુલેમાન બેલીમ, જ્યારે ૧૧ થી ૧૩ વયજૂથમાં પ્રથમ ક્રમે દિવ્ય ભાવેશભાઈ પ્રજાપતિ, દ્વિતીય ક્રમે સંજયભા સાંચલભા માણેક, તૃતીય ક્રમે ક્રીશ બચુભાઈ પ્રજાપતિ તેમજ ૧૪ થી ૧૬ વયજૂથમાં પ્રથમ ક્રમે દિવ્યરાજ મેરૂભા માણેક, દ્વિતીય ક્રમે ધનરાજ રાજમલભા હાથલ અને તૃતીય ક્રમે સામત પૂંજાભાઈ સુવા તેમજ ૧૭ થી ૨૦ વયજૂથમાં પ્રથમ ક્રમે સાગર ઠાકોર, દ્વિતીય ક્રમે નવઘણ જગતીયા, તૃતીય ક્રમે જયેશ દશરથ માળી તેમજ ઓપન વયજૂથમાં પ્રથમ ક્રમે પ્રજાપતિ કરણ ,દ્વિતીય ક્રમે જયેશભાઈ ચોધરી અને તૃતીય ક્રમે વિશાલ ઠાકોર વિજેતા થયેલ છે. જે વિજેતાઓને સરકારશ્રી દ્રારા ૮ થી ૧૦ અને ૧૧ થી ૧૩ વયજૂથમાં પ્રથમ ક્રમે ઇનામ રૂપિયાઃ- ૧૦,૦૦૦ ,દ્વિતીય ક્રમે ઇનામ રૂપિયાઃ-૭,૦૦૦ તેમજ તૃતીય ક્રમે ઇનામ રૂપિયાઃ-૫,૦૦૦ તેમજ ૧૪ થી ૧૬ પ્રથમ ક્રમે ઇનામ રૂપિયાઃ- ૧૨,૦૦૦ ,દ્વિતીય ક્રમે ઇનામ રૂપિયાઃ-૧૦,૦૦૦ તેમજ તૃતીય ઇનામ રૂપિયાઃ-૮,૦૦૦ તેમજ ૧૭ થી ૧૮ પ્રથમ ક્રમે ઇનામ રૂપિયાઃ- ૧૫,૦૦૦ ,દ્વિતીય ક્રમે ઇનામ રૂપિયાઃ-૧૨,૦૦૦ તેમજ તૃતીય ઇનામ રૂપિયાઃ-૧૦,૦૦૦ તથા ઓપનમાં પ્રથમ ક્રમે ઇનામ રૂપિયાઃ- ૨૧,૦૦૦, દ્વિતીય ક્રમે ઇનામ રૂપિયાઃ-૧૫,૦૦૦ તેમજ તૃતીય ક્રમે ઇનામ રૂપિયાઃ-૧૦,૦૦૦ આપવામાં આવ્યા હતા. ઉપરાંત, વિજેતા ખેલાડીઓને મેડલ,ટ્રેકશૂટ, ટીશર્ટ ટ્રોફી,અને પ્રમાણપત્રથી ખેલાડીઓને પ્રોત્સાહિત કરવામાં આવ્યા હતા. તેમજ વિજેતા ખેલાડીઓને જાહેર જનતામાંથી પણ પ્રોત્સાહન સ્વરૂપે સ્થળ પર વિવિધ રોકડ રકમોના ઇનામો આપી પ્રોત્સાહિત કરવામાં આવ્યા હતા.

તેમજ સ્પોર્ટ્સ ઓથોરીટી ઓફ ગુજરાત-ગાંધીનગર દ્વારા ૮ થી ૧૪ વયજૂથમાં ૨૦ જેટલા ખેલાડીઓની પસંદગી કરેલ છે જે ખેલાડીઓને સરકાર દ્રારા ચાલતી વિવિધ રમત ગમતલક્ષી યોજનાઓના લાભ માટે પસંદગી થયેલ છે.

જો આપને આ પોસ્ટ ગમી હોય તો શેર કરો...