નગરની સગીરા પર દુષ્કર્મ ગુજારવાના ગુન્હામાં આરોપીને ૨૦ વર્ષની સખત કેદ

Author: નોબત સમાચાર

નગરની સગીરા પર દુષ્કર્મ ગુજારવાના ગુન્હામાં આરોપીને ૨૦ વર્ષની સખત કેદ

સગીરાને રૂા.૪ લાખનું ચૂકવાશે વળતરઃ

જામનગર તા. ૯: જામનગરની એક સગીરા પર પાંચ વર્ષ પહેલાં વાતચીતનો સંબંધ કેળવ્યા પછી એક શખ્સે દુષ્કૃત્ય ગુજાર્યું હતું. એક રાત્રે મ્હોં કાળુ કરવા આવેલા આ શખ્સના પગરવથી સગીરાના પરિવારજન જાગી ગયા હતા અને સગીરા ડરની મારી ઘર છોડીને નીકળી ગઈ હતી. પોલીસે તે સગીરાને રોકી પૂછપરછ કર્યા પછી મામલો પ્રકાશમાં આવ્યો હતો. આ કેસ ચાલી જતા અદાલતે આરોપીને ૨૦ વર્ષની સખત કેદની સજા અને દંડ ફટકાર્યાે છે.

જામનગરના ધરારનગર-૧માં વસવાટ કરતા ઈબ્રાહીમ અબ્દુલ પાનવાલા (ઉ.વ.૨૦) નામના શખ્સે પાંચેક વર્ષ પહેલાં એક સગીરાને ચિઠ્ઠીમાં પોતાના મોબાઈલ નંબર લખી આપ્યા હતા. તે સગીરાએ કોલ કરતા તેની સાથે વાતચીતનો સંબંધ કેળવી ઈબ્રાહીમે મળવા માટે કહ્યું હતુું.

મળવા આવવાની સગીરાએ ના પાડતા ફોન પર તું મારી સાથે વાત કરશ તે તારા પરિવારને કહી દઈશ તેમ કહી ઈબ્રાહીમે ધમકી આપતા ડરી ગયેલી સગીરા મળવા ગઈ હતી જ્યાં ઈબ્રાહીમે તેણી પર દુષ્કર્મ ગુજાર્યું હતું. તે પછી વધુ એક વખત સગીરાને બોલાવી દુષ્કર્મ ગુજારાયું હતું. તે પછી એક રાત્રિએ આ શખ્સ આવ્યો હતો અને ત્યારે જ સગીરાના પરિવારજન જાગી જતા ડરી ગયેલી સગીરા પોતાના ઘરેથી નીકળી ગઈ હતી અને આત્મહત્યા માટે વિચારવા માંડી હતી. તેણીને પોલીસનો ભેટો થયો હતો અને સમગ્ર મામલો બહાર આવ્યો હતો.

પોલીસે ઈબ્રાહીમ અબ્દુલ પાનવાલા સામે આઈપીસી ૩૭૬ (ર) (એન) તેમજ પોક્સો એકટની કલમ ૪, ૬ હેઠળ ગુન્હો નોંધ્યો હતો. આ કેસ ચાલી જતાં અદાલતે આરોપી ઈબ્રાહીમ અબ્દુલ પાનવાલાને તક્સીરવાન ઠરાવી પોક્સો એક્ટની કલમ ૪ના ગુન્હામાં દસ વર્ષની સખત કેદ, રૂા.૧૦ હજારનો દંડ, કલમ ૬ના ગુન્હામાં ૨૦ વર્ષની સખત કેદ અને રૂા.પ હજારનો દંડ ફટકાર્યાે છે. ભોગ બનનારને કમ્પેઈન્સેશનમાંથી રૂા.૪ લાખ ચૂકવવામાં આવશે.

જો આપને આ પોસ્ટ ગમી હોય તો શેર કરો...