જાંબુડા પાટીયા પાસે મોટરમાંથી ઈંગ્લીશ દારૂના ૪૮૦ ચપલા સાથે જામનગરના બે શખ્સ ઝડપાયા

Author: નોબત સમાચાર

જાંબુડા પાટીયા પાસે મોટરમાંથી ઈંગ્લીશ દારૂના ૪૮૦ ચપલા સાથે જામનગરના બે શખ્સ ઝડપાયા

ધ્રોલમાં મકાનમાંથી ઈંગ્લીશ દારૂની ૨૬૮ બોટલ ઝબ્બેઃ આરોપી ફરારઃ

જામનગર તા. ૧૦: ધ્રોલના એક મકાનમાંથી એલસીબીએ ઈંગ્લીશ દારૂની નાની મોટી ૨૬૮ બોટલ કબજે કરી છે. આ મકાન ભાડે રાખનાર શખ્સ દરોડા પહેલા નાસી ગયો છે. તે પછી એલસીબીએ જાંબુડા પાટીયા પાસેથી એક મોટરમાં ઈંગ્લીશ દારૂનો જથ્થો લઈને જતા બે શખ્સને દબોચી લીધા છે. મોટરમાંથી ૪૮૦ ચપલા મળી આવ્યા હતા. આ શખ્સોએ ઉપરોક્ત શખ્સ પાસેથી દારૂ લીધો હોવાની કબૂલાત કરી છે. નગરમાંથી એક શખ્સ બે બોટલ સાથે પકડાઈ ગયો છે.

ધ્રોલ શહેરની એક સોસાયટીમાં દારૂનો જથ્થો વેચાણ માટે રાખવામાં આવ્યો હોવાની બાતમી એલસીબીના યુવરાજસિંહ, હિતેન્દ્રસિંહ, મયુરસિંહને મળતા પીઆઈ વી.એમ. લગારીયાની સુચનાથી એલસીબી સ્ટાફે ધ્રોલ શહેરના રાધે રેસીડેન્સી સોસાયટી વિસ્તારમાં એક મકાનમાં દરોડો પાડ્યો હતો.

ત્યાં આવેલા જયદીપ રતીલાલ નામના આસામીના મકાનમાં ભાડેથી રહેતા ક્રિપાશંકર ઓમકારનાથ શર્માના રહેણાંકમાં દરોડો પાડી એલસીબીએ તલાશી લેતા તે મકાનમાંથી ભારતીય બનાવટના અંગ્રેજી શરાબની નાની મોટી ૨૬૮ બોટલ મળી આવી હતી. દરોડા પહેલા ક્રિપાશંકર શર્મા નાસી ગયો હતો. રૂ.૧,૬૬,૯૬૪નો મુદ્દામાલ કબજે કરી લેવાયો છે.

જામનગર-રાજકોટ ધોરીમાર્ગ પર આવેલા જાંબુડા પાટીયા પાસે એક મોટરમાં ઈંગ્લીશ દારૂની હેરાફેરી થતી હોવાની બાતમી એલસીબીના યુવરાજસિંહ, દિલીપભાઈ તલવાડીયા, ઋષિરાજસિંહને મળતા પીઆઈ વી.એમ. લગારીયાને વાકેફ કરાયા પછી એલસીબી સ્ટાફે પીએસઆઈ પી.એન. મોરી, સી.એમ. કાંટેલીયાના વડપણ હેઠળ વોચ રાખી હતી.

તે દરમિયાન જીજે-૧૦-એસી ૧૮૦૫ નંબરની સ્વીફટ મોટર પસાર થતા તેને રોકી લેવામાં આવી હતી. આ મોટરની તલાશી લેવાતા તેમાંથી ભારતીય બનાવટના અંગ્રેજી શરાબના ૪૮૦ ચપલા મળી આવ્યા હતા. આ જથ્થા સાથે કિસાન ચોક નજીક કબીર આશ્રમ પાસે રહેતા વિશાલ પ્રવીણભાઈ માવ તથા નંદનવન સોસાયટીમાં રહેતા જયેશ કિશોરભાઈ ચાંદ્રા ઉર્ફે જયુ સિંધી નામના બે શખ્સને દબોચી લેવાયા છે. એલસીબીએ મોટર, શરાબનો જથ્થો, બે મોબાઈલ મળી કુલ રૂ.૪,૭૩,૫૦૦નો મુદ્દામાલ ઝબ્બે લીધો છે. આ શખ્સોની હાથ ધરાયેલી પૂછપરછમાં દારૂનો જથ્થો મૂળ ઉત્તરપ્રદેશના વતની અને હાલમાં ધ્રોલમાં રહેતા ક્રિપાશંકર ઓમકારનાથ શર્મા નામના શખ્સે સપ્લાય કર્યાની વિગત મળી છે. ત્રણેય સામે પંચકોશી એ ડિવિઝન પોલીસ સ્ટેશનમાં ગુન્હો રજીસ્ટર કરાવાયો છે.

જામનગરના દિગ્વિજય પ્લોટ વિસ્તારની શેરી નં.૫૮ના છેવાડે આવેલા બાળકોના સ્મશાન પાસેથી ગઈકાલે બપોરે પસાર થતા શંકરટેકરીના શાસ્ત્રીનગરવાળા ધનજી ખેંગારભાઈ રાઠોડ ઉર્ફે ભોજા નામના શખ્સને પોલીસે રોકી ચેક કરતા તેની પાસેથી દારૂની બે બોટલ મળી આવી હતી.

જો આપને આ પોસ્ટ ગમી હોય તો શેર કરો...