બાઈક ઉભુ રાખવાના પ્રશ્ને બે યુવાન પર હુમલોઃ અંધાશ્રમ નજીક મહિલાને માર પડ્યો

Author: નોબત સમાચાર

બાઈક ઉભુ રાખવાના પ્રશ્ને બે યુવાન પર હુમલોઃ અંધાશ્રમ નજીક મહિલાને માર પડ્યો

શાંતિનગરમાં બે શખ્સે ઢીકાપાટુથી માર માર્યાે:

જામનગર તા. ૩: જામનગરના અંધાશ્રમ પાસે મહિલા પર એક શખ્સ તથા બે મહિલાએ હુમલો કરી નાક પાસે ફ્રેક્ચર કરી નાખ્યું હતું. રોડ પર બાઈક ઉભુ રાખવાના પ્રશ્ને બે યુવાન પર બે શખ્સે હલ્લો કર્યાે હતો. જ્યારે શાંતિનગરમાં એક યુવાન પર બે શખ્સ તૂટી પડ્યા હતા.

જામનગરના અંધાશ્રમ નજીક વોર્ડવાળી શેરીમાં રહેતા સગુફાબેન મુજમીલ શેખ નામના મહિલાએ ત્યાં જ રહેતા હનીફ ઈબ્રાહીમ આલા તથા રેશ્મા હનીફ આલા ઉર્ફે મુમતાઝ, સાનીયા હનીફભાઈ આલા સામે સિટી સી ડિવિઝન પોલીસ સ્ટેશનમાં ફરિયાદ નોંધાવી છે.

ફરિયાદમાં જણાવ્યા મુજબ તેમના પુત્ર સમીરને હનીફ આલાની પુત્રી સાનીયા સાથે બોલાચાલી થઈ હતી. તેનો ખાર રાખી રવિવારે રાત્રે હનીફ, રેશ્મા તથા સાનીયાએ ગાળો ભાંડી ઢીકાપાટુ વડે હુમલો કરી સગુફાબેનને માર માર્યાે હતો અને નાક બાજુમાં ફ્રેક્ચર કરી નાખ્યું હતું.

જામનગરના શાંતિનગર વિસ્તારની શેરી નં.૭માં રહેતા જગદીશસિંહ સુખદેવસિંહ સોઢા ગઈકાલે રાત્રે પોતાના ઘર પાસે બેઠા હતા ત્યારે પુનીતનગરમાં રહેતા કુલદીપસિંહ લાલુભા જાડેજા, હરવિજયસિંહ જાડેજા નામના બે શખ્સ આવ્યા હતા.

આ શખ્સોએ તારો ભાઈ મયુર મારી સામે જોઈને કતરાઈ છે અને તું એનું ઉપરાણું લે છે તેમ કહેતા જગદીશસિંહે મારા ભાઈ સાથે વાંધો હોય તો તેનાથી દૂર રહેજો તેમ કહેતા આ શખ્સોએ હુમલો કરી ગાળો ભાંડી ધમકી આપી હતી.

જામનગરના ગોલ્ડન સિટી વિસ્તારમાં અગાઉ રહેતા અને હાલમાં વડોદરામાં વસવાટ કરતા કરશનભાઈ કારાભાઈ પરમાર અને તેમના મિત્ર બળવંતસિંહ ગઈકાલે રાત્રે દિગ્જામ સર્કલથી બાઈક પર ઘર તરફ જતા હતા ત્યારે માર્ગમાં તેઓએ બાઈક ઉભુ રાખતા ત્યાં ધસી આવેલા અમન તથા ઝીણાએ અહીં બાઈક કેમ ઉભુ રાખ્યું તેમ પૂછતા બળવંતસિંહે જવાબ આપ્યો હતો. તેનાથી ઉશ્કેરાયેલા અમન તથા ઝીણા એ છરી, ઢીકાપાટુથી હુમલો કરી માર માર્યાે હતો. અમને છરીની મુંઢનો ભાગ કરશન ભાઈને પીઠમાં ઝીંકી દેતાં તેઓને ફ્રેક્ચર થઈ ગયું છે. બીજીવાર દેખાશો તો મારી નાખીશું તેવી ધમકી આપી બાઈકમાં પણ નુકસાન કર્યું હતું. કરશનભાઈએ ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...