આરંભડાના મહિલા સાથે રૂ.૧૧ કરોડ રપ લાખની છેતરપિંડી કરી લેવાયાની ફરિયાદ

Author: નોબત સમાચાર

આરંભડાના મહિલા સાથે રૂ.૧૧ કરોડ રપ લાખની છેતરપિંડી કરી લેવાયાની ફરિયાદ

દસ્તાવેજમાં સહી કરાવી લીધા પછી બાકીના પૈસા ન આપ્યા!

જામનગર તા. ૨૦: દ્વારકાના મકનપુર ગામમાં આવેલી એક જગ્યા આરંભડાના મહિલાએ વેચવા માટે કાઢ્યા પછી કલ્યાણપુરના પાનેલી ગામના એક આસામીએ તેનો સોદો કરી જંત્રી મુજબ રૂ.૯ લાખ ૩૦ હજાર ચૂકવી દઈ રૂ.૧૧ કરોડ રપ લાખના સોદામાંથી ફરી જઈ, આ મહિલાની દસ્તાવેજમાં સહી કરાવી બાકીની રકમ ન આપતા આખરે છેતરપિંડીની પોલીસમાં ફરિયાદ કરાઈ છે.

દેવભૂમિ દ્વારકાના મકનપુર ગામમાં આવેલી રે.સ.નં.૨૨૧ તેમજ ૧૬૪, ૧૬૫, ૧૯૩, ૧૯૮માં સુરજકરાડી નજીકના આરંભડામાં રહેતા કુમુદબેન અમૃતલાલ માવાણી નામના લોહાણા મહિલાની પાંચ એકર જગ્યા આવેલી હતી. તે જગ્યા ખરીદવા માટે કલ્યાણપુર તાલુકાના પાનેલી ગામના ભીમશીભાઈ દેવાણંદભાઈ બેલાએ વાતચીત કરી હતી.

આ શખ્સે એક એકરના રૂ.ર કરોડ રપ લાખ ગણી પાંચ એકરના ૧૧ કરોડ રપ લાખ ચૂકવવાની તૈયારી બતાવી હતી અને તે માટે આગળ વધેલી વાતચીત દરમિયાન કુમુદબેનના પુત્ર ચેતનભાઈએ સુંથી આપી વેચાણ કરાર કરવા માટે વાત કરી હતી પરંતુ ભીમશીભાઈએ વેચાણ કરવાની કે સુંથી આપવાની જરૂર નથી, દસ્તાવેજ વખતે જ બધી રકમ આપી દઈશ તેમ જણાવ્યું હતું.

ત્યારપછી ભીમશીભાઈની વાતોમાં આવી ગયેલા કુમુદબેને મકનપુરની જંત્રી મુજબ દસ્તાવેજ બનાવવા કહેતા ભીમશીભાઈએ જંત્રી મુજબનો દસ્તાવેજ તૈયાર કરાવ્યો હતો અને ત્યારપછી જંત્રી મુજબના પૈસા આપી દઈ બાકીના રૂપિયા રોકડા આપવાનું કહી ગઈ તા.ર૧ જુલાઈના દિને દસ્તાવેજમાં કુમુદબેનની સહી કરાવી લીધી હતી. આ શખ્સે જંત્રી મુજબના દસ્તાવેજમાં દર્શાવાયેલી રૂ.૯ લાખ ૩૦ હજારની રકમ ટ્રાન્સફર કરી આપી હતી. બાકીની રકમ સ્ટેમ્પ પેપરવાળો દસ્તાવેજ વકીલ પાસે તૈયાર કરાવી તે દસ્તાવેજ આરંભડામાં કુમુદબેનના ઘરે આવી તેણીને આપી સહી કરી આપો, બાકીના પૈસા આંગડિયાથી મોકલાવું છું તેમ કહેતા કુમુદબેને વિશ્વાસમાં સહી કરી હતી અને તે પછી છેતરાઈ જવાનો સમય આવ્યો હતો.

આ શખ્સે દસ્તાવેજની કચેરીએ દેખા દીધા ન હતા તેથી કુમુદબેનના પુત્ર ચેતનભાઈ તથા દલાલ ભીમશીભાઈની શોધ કરતા હતા પરંતુ મામલતદાર કચેરી કે વકીલની ઓફિસે પણ ભીમશીભાઈ ન દેખાતા માતા-પુત્ર ગભરાયા હતા અને આખરે ગઈકાલે ચેતનભાઈ અમૃતલાલ માવાણીએ પોતાની માતા સાથે રૂ.૧૧ કરોડ રપ લાખની છેતરપિંડી કરવા અંગે ભીમશીભાઈ દેવાણંદભાઈ સામે ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...