ચાલીને દ્વારકા જવા નીકળેલા યુવાનને રાણા રોઝીવાડા પાસે બાઈકની ટક્કરઃ મૃત્યુ નિપજ્યું

Author: નોબત સમાચાર

ચાલીને દ્વારકા જવા નીકળેલા યુવાનને રાણા રોઝીવાડા પાસે બાઈકની ટક્કરઃ મૃત્યુ નિપજ્યું

અકસ્માત સર્જી બાઈક મૂકી ચાલક પલાયનઃ

જામનગર તા. ૨૭: ભાણવડ તાલુકાના મોટા કાલાવડ ગામના એક યુવાન તથા તેમના પત્ની ચાલીને દ્વારકા જવા માટે નીકળ્યા પછી બુધવારે રાત્રે રાણા રોઝીવાડા ગામના પાટીયા પાસે પહોંચ્યા ત્યારે આ યુવાનને એક બાઈકે હડફેટે લીધા હતા. ગંભીર ઈજા પામેલા આ યુવાનનું મૃત્યુ નિપજ્યું છે.

દેવભૂમિ દ્વારકા જિલ્લાના ભાણવડ તાલુકાના મોટા કાલાવડ ગામના વાડી વિસ્તારમાં રહેતા ગોવિદંભાઈ વરવાભાઈ સીસોટીયા તથા તેમના પત્ની જમનાબેન પોતાના ગામથી ચાલીને દ્વારકા દર્શનાર્થે જવા માટે નીકળ્યા હતા.

ઉપરોક્ત વ્યક્તિઓ બુધવારે રાત્રે સાડા આઠેક વાગ્યે રૂપામોરા ગામથી આગળ રાણા રોઝીવાડા ગામના પાટીયા પાસે પહોંચ્યા ત્યારે આરજે-૩૦-એસએક્સ ૪૮૦૧ નંબરનું બાઈક પુરઝડપે ધસી આવ્યું હતું. તેના ચાલકે ગોવિંદભાઈને હડફેટે લેતા આ યુવાનને માથા સહિતના શરીરના અન્ય ભાગોમાં ગંભીર ઈજા થઈ હતી. સારવારમાં ખસેડાયેલા આ યુવાનનું મૃત્યુ નિપજ્યું છે.

અકસ્માત સર્જી પોતાનું બાઈક મૂકીને નાસી ગયેલા તેના ચાલક સામે મૃતકના મોટાભાઈ નારણભાઈ વરવાભાઈ સીસોટીયાએ ભાણવડ પોલીસ મથકમાં ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...