નૂરી ચોકડી પાસે મોટરમાંથી ઈંગ્લીશ દારૂના ૫૨૮ ચપલા ઝડપાયાઃ સ્કૂટરમાંથી ૪૮ ચપલા કબજે કરાયા

Author: નોબત સમાચાર

નૂરી ચોકડી પાસે મોટરમાંથી ઈંગ્લીશ દારૂના ૫૨૮ ચપલા ઝડપાયાઃ સ્કૂટરમાંથી ૪૮ ચપલા કબજે કરાયા

ખંભાળિયામાં મકાનમાંથી ઝડપાઈ દારૂની ૯૬ બોટલઃ

જામનગર તા. ૭: જામનગરની નૂરી ચોકડી પાસેથી એક મોટરમાં લઈ જવાતા ઈંગ્લીશ દારૂના ૫૨૮ ચપલા કબજે કર્યા છે. ઝડપાયેલા શખ્સે રીસીવરનું નામ આપ્યું છે. દિગ્વિજય પ્લોટમાં સ્કૂટરમાંથી ૪૮ ચપલા કબજે થયા છે. એક શખ્સના મકાનમાંથી પોલીસે ઈંગ્લીશ દારૂની પાંચ બોટલ પકડી પાડી છે. ખંભાળિયાના એક શખ્સના મકાનમાંથી ૯૬ બોટલ ઝબ્બે લેવામાં આવી છે.

જામનગરના હાપા માર્કેટીંગ યાર્ડ રોડ પર એક મોટરમાં ઈંગ્લીશ દારૂનો જથ્થો લઈ જવામાં આવી રહ્યો છે તેવી બાતમી સિટી એ ડિવિઝનના સર્વેલન્સ સ્ટાફના આર.એ. જાડેજા, વિક્રમસિંહ, ડી.એમ. જાડેજાને મળતા પીઆઈ એન.એ. ચાવડાની સૂચનાથી પોલીસ કાફલો નૂરી ચોકડી પાસે વોચમાં ગોઠવાયો હતો.

તે દરમિયાન જીજે-૧૦-ટીવાય ૪૦૫૪ નંબરની અર્ટીગા હાપા માર્કેટીંગ યાર્ડ રોડથી નૂરી ચોકડી તરફ આવતી જોવા મળી હતી. તે મોટરને રોકાવી પોલીસે ચેક કરાવતા તેમાંથી ભારતીય બનાવટના અંગ્રેજી શરાબના જુદા જુદા બ્રાંડના ૫૨૮ ચપલા મળી આવ્યા હતા. તે જથ્થા સાથે નવાગામ ઘેડમાં ગાયત્રી ચોકમાં વસવાટ કરતા સુનિલ અરવિંદભાઈ ઝાલા ઉર્ફે લાલા ખવાસ નામના શખ્સની ધરપકડ કરવામાં આવી છે. આ શખ્સે દારૂનો તે જથ્થો સ્વામીનારાયણનગરની શેરી નં.પમાં રહેતા હીરેન્દ્ર ઉર્ફે હીરેન ચુડાસમાએ મંગાવ્યાની કબૂલાત કરી છે. પોલીસે મોટર, દારૂ મળી કુલ રૂ.૬,૫૨,૮૦૦નો મુદ્દામાલ કબજે કર્યાે છે.

જામનગરના દિગ્વિજય પ્લોટ વિસ્તારની શેરી નં.પ૬માં આવેલી સમીર ટેકનોમેક નામની ઓફિસ પાસેથી ગઈકાલે સાંજે પસાર થતા ભાવિક ભદ્રા ઉર્ફે સાબા નામના શખ્સના જીજે-૧૦-ઈબી ૭૭૨૧ નંબરના જ્યુપીટર સ્કૂટરને રોકાવવા સિટી એ ડિવિઝનના સર્વેલન્સ સ્ટાફે ઈશારો કરતા સ્કૂટર મૂકીને આ શખ્સ નાસી ગયો હતો. પોલીસે તેનું સ્કૂટર ચેક કરતા તેમાંથી ૪૮ ચપલા મળી આવ્યા હતા. પોલીસે દારૂનો જથ્થો તથા સ્કૂટર કબજે કરી ભાવિકની શોધખોળ શરૂ કરી છે.

જામનગરના વુલન મીલ રોડ પર મહાકાળી સર્કલ નજીક ગાયત્રી સોસાયટીની શેરી નં.૧માં નવઘણ ખીમાભાઈ નરા નામના શખ્સના મકાનમાં ગઈકાલે સિટી સી ડિવિઝનના સ્ટાફે દરોડો પાડી તલાશી લેતા ત્યાંથી ઈંગ્લીશ દારૂની પાંચ બોટલ અને બીયરના ચૌદ ટીન મળી આવ્યા હતા. પોલીસે દારૂ, બીયર કબજે કર્યાે છે અને નવઘણની શોધ આરંભી છે.

ખંભાળિયા શહેરના ધરારનગરના આશાપુરા ચોકમાં અજય ડાડુભાઈ ધારાણીના મકાનમાં રવિવારે રાત્રે દરોડો પાડી તલાશી લેતા ત્યાંથી ઈંગ્લીશ દારૂની જુદી જુદી બે બ્રાંડની ૯૬ બોટલ મળી આવી હતી. પોલીસે દારૂની બોટલ, એક મોબાઈલ મળી રૂ.૧,૨૯,૮૦૦નો મુદ્દામાલ કબજે કર્યાે છે.

ખંભાળિયાના હર્ષદપુરમાં હાપી વાડી પાસે રહેતા યોગેશ રણમલભાઈ નકુમ નામના શખ્સને દારૂની બોટલ સાથે પકડી લેવામાં આવ્યો છે. જ્યારે કલ્યાણપુર તાલુકાના ધતુરીયા ગામનો કિશોર ખીમાભાઈ પારીયા નામનો શખ્સ ગઈકાલે વાડીનારમાં કેપીટી સર્કલ પાસેથી જતો હતો ત્યારે પોલીસે રોકી તેને ચેક કરતા દારૂની બે બોટલ મળી આવી હતી.

જો આપને આ પોસ્ટ ગમી હોય તો શેર કરો...