લગ્નની લાલચ આપી સગીરા પર દુષ્કર્મ આચરનાર શખ્સને વીસ વર્ષની સખત કેદ

Author: નોબત સમાચાર

લગ્નની લાલચ આપી સગીરા પર દુષ્કર્મ આચરનાર શખ્સને વીસ વર્ષની સખત કેદ

સગીરાને વળતર પેટે રૂ. ૪ લાખ ચૂકવાશેઃ

જામનગર તા. ૨: કાલાવડ તાલુકાના એક ગ્રામ્ય પંથકમાં વસવાટ કરતા પરિવારની પોણા સોળ વર્ષની સગીર પુત્રીને લગ્ન કરવાની લાલચ બતાવી પાંચ વર્ષ પહેલા એક શખ્સ નસાડી ગયો હતો અને આ શખ્સે તેણી પર સંખ્યાબંધ વખત દુષ્કર્ર્મ ગુજાર્યું હતું. ઉપરોકત કેસ ચાલી જતાં અદાલતે આરોપીને પોકસો એકટની કલમ હેઠળ વીસ વર્ષની સખત કેદ અને કુલ રૂ. ૧૫હજારનો દંડ ફટકાર્યો છે. સગીરાને કમ્પેઈનશેસનમાંથી રૂ. ચાર લાખ ચુકવવામાં આવશે.

કાલાવડના ગ્રામ્ય પંથકમાં મજુરી કામ માટે આવીને રહેતા એક પરિવારની પોણા સોળ વર્ષની પુત્રી એક સ્થળે મજુરી કામમાટે જતી હતી ત્યાં મજુરી માટે આવતો કાલાવડના સોરઠ ગામનો પરેશ પ્રભાત ડાંગી તેના પરિચયમાં આવ્યો હતો. આ શખ્સે હું તને પ્રેમ કરૂ છું, તારી સાથે લગ્ન કરવા છે તેમ કહી વર્ષ ૨૦૨૦માં આ શખ્સે તે તરૂણીને ત્રણ થી ચાર મહિનામાં આઠેક વખત દુષ્કર્મનો ભોગ બનાવી હતી.

ત્યારપછી ગઈ તા. ૨૪-૧૧-૨૦ ના દિને પરેશે આ તરૂણીને પોતાની સાથે ભાગી જવાનું કહેતા તેની વાતોમાં આવી ગયેલી તરૂણી પરેશ સાથે નીકળી ગઈ હતી. છ દિવસ સુધી તેણીને મછલીવડ, મોટા વડાળા, મહાદેવપુર, તાલોદ ગામમાં લઈ જઈ પરેશે શરીર સંબંધ બાંધ્યો હતો. પોલીસમાં તેની થયેલી ફરિયાદના આધારે આરંભાયેલી તપાસમાં આરોપી તથા સગીરા મળી આવ્યા હતા. પોલીસે આઈપીસી ૩૬૩, ૫૦૬(૨), તેમજ પોક્સો એક્ટની કલમ ૪,૫,૬ હેઠળ આરોપીની ધરપકડ કરી હતી.

ઉપરોકત કેસ જામનગરની ખાસ પોકસો અદાલતમાં ચાલી જતાં અદાલતે આરોપીને તકસીરવાન ઠરાવી પોકસો એકટની કલમ ૪ હેઠળ દસ વર્ષની સખત કેદ તથા રૂ. દસ હજારનો દંડ, પોકસો એકટની કલમ ૬ ના ગુન્હામાં વીસ વર્ષની સખત કેદ તથા રૂ. પાંચહજારનો દંડ ભરવા આદેશ કર્યો છે. ભોગ બનનાર સગીરાને રૂ. ચાર લાખ વળતર પેટે ચૂકવવામાં આવશે. સરકાર તરફથી પી.પી.ભારતીબેન વાદી રોકાયા હતા.

જો આપને આ પોસ્ટ ગમી હોય તો શેર કરો...