કરિયાણાની દુકાન ખાલી કરી નાખવાનું કહી ચારેક શખ્સે મહિલાને આપી ધમકી

Author: નોબત સમાચાર

કરિયાણાની દુકાન ખાલી કરી નાખવાનું કહી ચારેક શખ્સે મહિલાને આપી ધમકી

સિક્કામાં દુકાનમાં ઘૂસી ટોળાએ ધમાલ કરીઃ

જામનગર તા. ૨૨: જામનગરના મયુરનગરમાં કરિયાણાની દુકાન ચલાવતા એક મહિલાના ઘરે સોમવારે રાત્રે ધસી ગયેલા ચારેક જેટલા શખ્સે છરી-લાકડી બતાવી ગાળો ભાંડી દુકાન ખાલી કરી નાખવાની ધમકી આપી ઝપાઝપી કરી હતી. જ્યારે સિક્કામાં એક દુકાનમાં ઘૂસી ગયેલા એક મહિલા સહિતના સાતથી આઠ વ્યક્તિઓએ ધમાલ મચાવી એક યુવાનને માર માર્યાે હતો.

જામનગરના મયુરનગર પાસે પીઠડનગરમાં રહેતા હેતલબેન નિલેશભાઈ શેણા નામના મહિલા સોમવારે રાત્રે નવેક વાગ્યે પોતાની કરિયાણાની દુકાન પાસે ઘરે હતા ત્યારે છરી તથા લાકડી સાથે કિશન લખુભાઈ જોગાણી ઉર્ફે કચરો તથા અન્ય બે-ત્રણ અજાણ્યા શખ્સ ધસી આવ્યા હતા.

આ વ્યક્તિઓએ તારો પતિ ક્યા છે તેમ કહી દુકાન ખાલી કરી આપવાનું કહી ગાળો ભાંડ્યા પછી જાનથી મારી નાખવાની ધમકી આપવા ઉપરાંત ઝપાઝપી કરી હતી. હેતલબેને સિટી સી ડિવિઝનમાં તેની ફરિયાદ નોંધાવી છે.

જામનગર તાલુકાના સિક્કા ગામમાં રહેતા અને દાવલશા પીરની દરગાહ સામેની ગલીમાં મહાદેવ માર્કેટીંગ નામની દુકાન ચલાવતા વિમેશભાઈ રણછોડભાઈ ત્રિવેદી ગઈકાલે રાત્રે સાડા આઠેક વાગ્યે પોતાની દુકાને હતા ત્યારે ત્યાં ધસી આવેલા સિક્કાના અબ્બાસ ભટ્ટી, ગની ભટ્ટી, અબ્બાસના પત્ની તથા તેના દીકરા તેમજ ગનીના દીકરા ઉપરાંત ત્રણથી ચાર અજાણ્યા શખ્સે ઝઘડો કર્યાે હતો. દુકાનમાં હાજર દિક્ષીત નામના યુવાનને માર મારી ગાળો ભાંડી હતી. વિમેશ ભાઈએ પોલીસમાં તમામ સામે ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...