ચાર ગામના એરપોર્ટ પ્રોજેક્ટ અન્ય સ્થળે ખસેડવા માગણીઃ હાઈકોર્ટ સુધી લડતની ચિમકી

Author: નોબત સમાચાર

ચાર ગામના એરપોર્ટ પ્રોજેક્ટ અન્ય સ્થળે ખસેડવા માગણીઃ હાઈકોર્ટ સુધી લડતની ચિમકી

દ્વારકાના વસઈની આજુબાજુના

દ્વારકા તા. રરઃ દ્વારકા નજીક પ્રસ્તાવિત એરપોર્ટ પ્રોજેક્ટના વિરોધમાં ચાર ગામોના અસરગ્રસ્ત ખેડૂતો દ્વારા પ્રાંત અધિકારીને આવેદન આપીને પ્રોજેક્ટને અન્યત્ર ખસેડવાની માગ સાથે હાઈકોર્ટ સુધી લડી લેવાની ચિમકી આપવામાં આવી છે.

દ્વારકા નજીકના વસઈ તથા આસપાસના ચાર ગામોમાં યાત્રધામ દ્વારકા માટે એરપોર્ટ નિર્માણના થોડા સમય પહેલા લેવાયેલ નિર્ણય પછી શરૂ થયેલા પ્રાથમિક સર્વે અંગે ઉગ્ર વિરોધ પછી આજરોજ અસરગ્રસ્ત ગામોના ખેડૂતોએ સૂત્રોચ્ચાર સાથે પ્રસ્તાવિત એરપોર્ટ પ્રોજેક્ટને અન્યત્ર ખસેડવાની માગ સાથે દ્વારકા પ્રાંત અધિકારીને આવેદન પત્ર પાઠવી વસઈ-મેવાસા સહિતની ફળદ્રુપ જમીનને બચાવવા હાઈકોર્ટ સુધી લડત આપવાની ચિમકી ઉચ્ચારી હતી. દ્વારકા માટેના વસઈ નજીકના ચાર ગામોની જમીન પર પ્રસ્તાવિત એરપોર્ટ પ્રોજેક્ટનો વિરોધ વંટોળ દિન-પ્રતિદિન વધતો જતો હોય તેમ ગઈકાલે તંત્ર દ્વારા શરૂ કરાયેલ સરકારી જમીનો પરના પ્રાથમિક અને ત્યારપછી ક્રમશઃ ખાનગી જમીનોના સર્વેની કામગીરી કરવાનો વિરોધ ઊઠ્યા પછી વસઈ તથા મેવાસા ગામના ખેડૂતોએ મોટી સંખ્યામાં એકત્ર થઈ સૂત્રોચ્ચાર સાથે એરપોર્ટ પ્રોજેક્ટને અન્યત્ર ખસેડવાની માગ કરતું આવેદનપત્ર દ્વારકા પ્રાંત અધિકારી અમોલ આવરેને આપ્યું હતું.

આ સાથે ખેડૂતોએ પૂર્વજો પાસેથી પ્રાપ્ત ખેતીની ફળદ્રુપ જમીનને ગુમાવવાની ભીતિ સાથે આ પ્રોજેક્ટને અન્યત્ર ખસેડવાની માગ કરી હતી. સાથે જ આ જમીન પર એરપોર્ટ બનશે તો ફળદ્રુપ જમીન ધરાવતા ખેડૂતો ભૂમિહિન થઈ જશે અને આજિવિકા છિનવાશે તેવી રજૂઆત કરી ટૂંક સમયમાં આ અંગે ખેડૂતલક્ષી નિર્ણય નહીં લેવાય તો હાઈકોર્ટના દ્વાર ખખડવાવાની પણ મૌખિક ચિમકી ઉચ્ચારી છે. પ્રાંત અધિકારીએ હાલના સર્વેની કામગીરીમાં ભૌગોલિક પરિસ્થિતિનો અભ્યાસ કરી તેનો રિપોર્ટ સરકારને સોંપાશે તેમ જણાવ્યું હતું.

જો આપને આ પોસ્ટ ગમી હોય તો શેર કરો...