ઈરાન બરબાદ... ઈઝરાયલનો યુદ્ધમાં વિજયનો દાવો

Author: નોબત સમાચાર

ઈરાન બરબાદ... ઈઝરાયલનો યુદ્ધમાં વિજયનો દાવો

હું જીવતો છું... દુશ્મનનો ન્યુક્લિયર પાવર નષ્ટઃ નેતન્યાહુ

તેલ અવીવ તા. ર૦: ઈઝરાયલના વડાપ્રધાન બેન્જામિન નેતન્યાહુએ દાવો કર્યો છે કે, ઈઝરાયલ યુદ્ધ જીતી રહ્યું છે, જ્યારે ઈરાન સંપૂર્ણપણે બરબાદ થઈ ગયું છે. હું હજુ પણ જીવિત છું. ઈરાન હવે દુનિયાને બ્લેકમેલ કરી શકશે નહીં. તેમણે ટ્રમ્પની પ્રશંસા કરતા કહ્યું કે આપણે યુદ્ધમાં મોટી જીત મેળવી છે.

ઈઝરાયલના વડાપ્રધાન બેન્જામિન નેતન્યાહુએ વિદેશી મીડિયા માટે આયોજિત એક પ્રેસ કોન્ફરન્સમાં ઈરાન સામે ચાલી રહેલા લશ્કરી અભિયાન અંગે અનેક મહત્ત્વપૂર્ણ મુદ્દાઓ ઊઠાવ્યા અને યુદ્ધમાં વિજયતો દાવો કર્યો.

પોતાના ઠેકાણા અંગેની અટકળોને સંબોધતા નેતન્યાહુએ કહ્યું, મેં પહેલેથી જ કહ્યું છે કે હું જીવિત અને સ્વસ્થ છું. નેતન્યાહુએ દાવો કર્યો હતો કે ર૦ દિવસના ભયંકર યુદ્ધ પછી ઈરાન પાસે હવે યુરેનિયમ સમૃદ્ધ કરવાની કે બેલિસ્ટિક મિસાઈલ બનાવવાની કોઈ ક્ષમતા નથી. તેમણે જાહેર કર્યું, અમે જીતી રહ્યા છીએ, અને ઈરાનનો નાશ થઈ રહ્યો છે. તેમણે એમ પણ કહ્યું કે, હોર્મુઝ સ્ટ્રેટ અંગે નવા વિકલ્પોની જરૂર છે. અમે ઈરાન પર સંપૂર્ણ હુમલો કરી રહ્યા છીએ, અને ઈરાન હવે વિશ્વને બ્લેકમેલ કરી શકશે નહી, કારણ કે તેનું નેતૃત્વ નાશ પામ્યું છે. ઈરાન પાસે તે મિસાઈલો નથી જે તે રાખવાની ધમકી આપી રહ્યું છે. અમારૂ લક્ષ્ય ઈરાની લોકોના સ્વતંત્રતાના અધિકારને સુનિશ્ચિત કરવાનું છે.

આજે અમારા મહાન મિત્ર યુનાઈટેડ સ્ટેટ્સ સાથે મળીને અમે મહાન કાર્યો પ્રાપ્ત કર્યા છે. ડોનાલ્ડ ટ્રમ્પ સાથે અમારૃં સંકલન ઉત્તમ છે. ટ્રમ્પના નિર્ણયો કોઈપણ દબાણ હેઠળ નથી, તે પોતાના નિર્ણયો લે છે, અને તેમના નિર્ણયો મહત્ત્વપૂર્ણ છે. અમે અમેરિકાને આ યુદ્ધમાં ધકેલી દીધું નથી. ઈસ્લામિક રિવોલ્યુશનરી ગાર્ડ કોર્પ્સ પાસે હવે ખૂબ ઓછો સમય બાકી છે અને તેમનું મિશન યોગ્ય દિશામાં આગળ વધી રહ્યું છે.

તેમણે કહ્યું કે ઈઝરાયલ તેના મહાન મીત્ર યુનાઈટેડ સ્ટેટ્સ સાથે મળીને ઐતિહાસિક સિદ્ધિઓ પ્રાપ્ત કરી રહ્યું છે. રિવોલ્યુશનરી ગાર્ડસનો પ્રભાવ સંપૂર્ણપણે ખતમ થઈ રહ્યો છે. લશ્કરી કાર્યવાહીની વિગતો આપતા તેમણે કહ્યું અમે તેમને હવામાં, જમીન પર અને ભૂગર્ભમાં ફટકારી રહ્યા છીએ.

ગઈકાલે અમે કેસ્પિયન સમુદ્રમાં ઈરાનના સમગ્ર નૌકાદળનો નાશ કર્યો. સ્થાનિક મોરચે તેમણે અર્થતંત્ર અને શાળાઓને ધીમે ધીમે ફરીથી ખોલવા અને તેમને પૂરતં વળતર આપવાની પ્રતિબદ્ધતા પણ વ્યક્ત કરી હતી.

નેતન્યાહુએ વધુમાં કહ્યું, ઈરાની લોકોએ પણ અમને નિશાન બનાવ્યા, પછી ભલે તેમનું સ્થાન કોણ લે, અમે ખાતરી કરી રહ્યા છીએ કે રિવોલ્યુશનરી ગાર્ડસની શિફ્ટ ખૂબ જ ટૂંકી હોય.

જો આપને આ પોસ્ટ ગમી હોય તો શેર કરો...