જામનગરમાં આહિર સમાજના આંગણે ઉમંગભેર ઉજવાયો શરદ રાસોત્સવઃ રાસગરબાની રમઝટ જામી

Author: નોબત સમાચાર

જામનગરમાં આહિર સમાજના આંગણે ઉમંગભેર ઉજવાયો શરદ રાસોત્સવઃ રાસગરબાની રમઝટ જામી

પૂર્વ સાંસદ વિક્રમભાઈ માડમે કર્યુ દીપ પ્રાગટયઃ સાંસદ પૂનમબેન અને મંત્રી મૂળુભાઈ બેરાનો શુભેચ્છા સંદેશ

જામનગર તા.૯: પરંપરા અને પ્રકાશનું પર્વ શરદોત્સવ નિમિત્તે જામનગરમાં આહિર યુવા ગ્રુપ દ્વારા દર વર્ષની પરંપરા અનુસાર આ વર્ષે પણ શરદોત્સવનું જબરદસ્ત આયોજન કરવામાં આવ્યું હતું. વડીલોની હાજરીમાં ભગવાન શ્રી કૃષ્ણ અને માતાજીની આરાધના અને દીપ પ્રાગટ્ય કરી કાર્યક્રમની શરૂઆત કરવામાં આવી હતી.

તે પછી રાસ ગરબાની રમઝટ જામી હતી. જેમાં કલાકાર પ્રવીણ બારોટ અને મિત્તલ ચૌહાણ સુર સંગીતની રમઝટ બોલાવી હતી. આ વેળાએ ગીત-સંગીત અને રાસ-ગરબાનો સોહામણો સંગમ જોવા મળ્યો હતો. બહેનો અને ભાઈઓ માટે અલગ અલગ રાસ યોજાયો હતો. જેમાં લોકોએ આનંદ માણ્યો હતો.

માન, મર્યાદા, મોભો અને બલિદાન માટે બિરદાવાતા આહિર સમાજની યુવા પેઢીએ આજે આ આધુનિક યુગમાં સમાજની પરંપરાને જાળવી રાખી છે. જેના આહિર સમાજના રાસોત્સવ દરમિયાન દર્શન થયા હતા. મોટી સંખ્યા સમાજની બહેનોએ પરંપરાગત વસ્ત્રો અને આભૂષણો પરિધાન કરી રાસ લેતા અલૌકિક દૃશ્યો સર્જાયા હતા.

આ પ્રસંગે આહિર સમાજના અગ્રણી અને પૂર્વ સાંસદ વિક્રમભાઈ માડમના હસ્તે દીપ પ્રાગટ્ય કરવામાં આવ્યું હતું. જેમાં આહિર સમાજના મોભી ભીખુભાઈ વારોતરીયા, યુવા ધારાસભ્ય હેમંતભાઈ ખવા, મૂળુભાઇ કંડોરીયા, કોર્પોરેટર કિશનભાઇ માડમ, ભરતભાઈ સુવા, મેરામણભાઇ ભાટું, વશરામભાઈ રાઠોડ, પરબતભાઈ ચાવડા, નગાભાઈ નંદાણીયા, કોર્પોરેટર રાહુલભાઈ બોરીચા, કરસનભાઈ કરમુર, રાજુભાઈ ગાગીયા, મેરૂભાઈ માડમ, વિક્રમભાઈ ચાવડા અને ગીરીશભાઈ ગોજીયા, ચનાભાઈ બેલા, મુરુભાઈ ગાગલીયા, સાગરભાઈ બોદર, હેમંતભાઈ આંબલીયા, હરદાસભાઇ કંડોરીયા, રણમલભાઈ કાંબરીયા આ ઉપરાંત મહિલા અગ્રણી જ્યોતિબેન ભારવાડીયા, અમિતાબેન બંધીયા, લીલીબેન માડમ, અને શોભનાબેન સહિતના અગ્રણીઓએ હાજરી આપી કાર્યક્રમને દીપાવ્યો હતો.

કાર્યક્રમના અંતમાં ધારાસભ્ય હેમંતભાઈ ખવાના હસ્તે વિજેતા ખેલૈયાઓને ઈનામ વિતરણ કરવામાં આવ્યા હતા. સાથે જ હાલારના સક્રિય સાંસદ પૂનમબેન માડમ અને ખંભાળિયાના ધારાસભ્ય તેમજ રાજય સરકારના મંત્રી મૂળુભાઇ બેરા પોતાના વ્યસ્ત શેડ્યુલને લઈ હાજરી આપી શક્યા ન હતા પરંતુ તેઓએ શુભેચ્છા સંદેશ પાઠવ્યો હતો. કાર્યક્રમને સફળ બનાવવા માટે આહિર યુવા ગ્રુપના પ્રમુખ સંજયભાઈ કાંબરિયાની આગેવાની હેઠળ આહિર યુવા ગ્રુપના સભ્યો અને સમાજના યુવાનોએ જહેમત ઉઠાવી હતી.

જો આપને આ પોસ્ટ ગમી હોય તો શેર કરો...