તા. ૧૧-૧૨-૨૦૨૫ ના સવારે ૧૦ કલાકે....

યુએસ ફેડરલ રિઝર્વે સતત ત્રીજી વખત વ્યાજ દરોમાં ઘટાડો કરતા અને સપ્ટેમ્બર ત્રિમાસિક માટેના જીડીપી આંક અપેક્ષા કરતા સારા આવ્યા બાદ વર્તમાન સંપૂર્ણ નાણાં વર્ષના જીડીપી આંક પ્રોત્સાહક રહેવાની ધારણાંને પગલે આજે સપ્તાહના ચોથા કારોબારી દિવસે ભારતીય શેરબજારની શરૂઆત ઉછાળા સાથે થઇ હતી, પરંતુ ટ્રેડ ડીલની અનિશ્ચિત્તા વચ્ચે ટ્રમ્પે ભારત પર વધુ ટેરિફ લાદવાની આપેલી ચીમકી આપતા ભારતીય શેરબજાર ઘટાડા સાથે કારોબાર કરી રહ્યું હતું.

અમેરિકા સાથેના ભારતના સૂચિત વેપાર કરારને મુદ્દે પ્રવર્તતી અનિશ્ચિતતા તેમજ વિદેશી રોકાણકારોની વેચવાલી સાથે સતત ચોથા દિવસે એશિયન બજારો પાછળ ભારતીય શેરબજારમાં અફરાતફરી જોવા મળી હતી.

વૈશ્વિક શેરબજારની વાત કરીએ તો ગઈકાલે અમેરિકન માર્કેટમાં ડાઉ જોન્સ ૦.૩૯%ના ઘટાડા સાથે બંધ રહ્યો હતો. જ્યારે એસ એન્ડ પી ૫૦૦ ૦.૬૮% અને નેસ્ડેક ૦.૩૬% વધીને સેટલ થયા હતા. બીએસઇ પર મીડકેપ ઈન્ડેક્સ ૦.૦૫% વધીને અને સ્મોલકેપ ઈન્ડેક્સ ૦.૨૩% ઘટીને ટ્રેડ થઇ રહ્યા હતા.

બીએસઈમાં સવારે ૧૦ કલાકે કુલ ટ્રેડીંગ થયેલી ૩૦૦૮ સ્ક્રિપોમાંથી ઘટનારની સંખ્યા ૧૪૭૧ અને વધનારની સંખ્યા ૧૩૫૬ રહી હતી, ૧૮૧ શેરના ભાવમાં કોઈ ફેરબદલ જોવાયો ન હતો. જ્યારે ૪૨ શેરોમાં ઓનલી સેલરની મંદીની નીચલી સર્કિટ સામે ૮૬ શેરોમાં ઓનલી બાયરની તેજીની ઉપલી સર્કિટ રહી હતી.

ભારતીય શેરબજારમાં આજે બીએસઈ પર કોમોડીટીઝ, ફાઈનાન્શીયલ સર્વિસ, હેલ્થકેર, ઇન્ડસ્ટ્રીયલ્સ, આઈટી, ઓટો, બેન્કેકસ, કેપિટલ ગુડ્સ, મેટલ, ઓઈલ એન્ડ ગેસ, રિયલ્ટી, ટેક અને ફોકસ્ડ આઈટી સેક્ટરમાં ઉછાળો જોવા મળ્યો હતો, જયારે અન્ય બીજા તમામ સેક્ટરલ ઈન્ડાયસીસ ઘટાડા સાથે કારોબાર કરી રહ્યા હતા.

કોમોડિટી...

એમસીએક્સ ગોલ્ડ : ઇન્ટ્રા ડે ટ્રેડીંગની શરૂઆતે ફેબ્રુઆરી ગોલ્ડ રૂ.૧,૩૦,૨૫૦ પોઈન્ટના મથાળેથી ખુલીને રૂ.૧,૩૦,૫૦૯ પોઈન્ટના ઊંચા મથાળેથી ઘટાડો નોંધાવી રૂ.૧,૩૦,૧૧૯ પોઈન્ટના નીચા મથાળે નોંધાવી ૬૫૪ પોઈન્ટના ઉછાળા સાથે રૂ.૧,૩૦,૪૫૩ આસપાસ ટ્રેન્ડ નોંધાયેલ..!!

એમસીએક્સ સિલ્વર : ઇન્ટ્રા ડે ટ્રેડીંગની શરૂઆતે માર્ચ સિલ્વર રૂ.૧,૮૯,૯૦૮ પોઈન્ટના મથાળેથી ખુલીને રૂ.૧,૯૩,૪૫૨ પોઈન્ટના ઊંચા મથાળેથી ઘટાડો નોંધાવી રૂ.૧,૮૯,૯૦૮ પોઈન્ટના નીચા મથાળે નોંધાવી ૪૩૭૪ પોઈન્ટના ઉછાળા સાથે રૂ.૧,૯૩,૧૦૯ આસપાસ ટ્રેન્ડ નોંધાયેલ..!!

સ્ટોક સ્પેસિફિક રેન્જ મુવમેન્ટ....

સ્ટેટ બેન્ક (૯૬૩) : પબ્લિક બેન્ક સેક્ટરની આ કંપનીના શેરનો ભાવ હાલમાં રૂ.૯૪૯ આસપાસ પ્રવર્તી રહ્યો છે. રૂ.૯૪૦ ના સ્ટ્રોંગ સપોર્ટથી આ સ્ટોક ટૂંકા સમયગાળે રૂ.૯૭૩ થી રૂ.૯૭૯ આસપાસ ભાવ સપાટી નોંધાવે તેવી શક્યતા છે...!! રૂ.૯૮૪ ઉપર તેજી તરફી ધ્યાન...!!

એચડીએફસી લાઈફ (૭૬૯) : એ/ટી+૧ ગ્રુપનો આ સ્ટોક રૂ.૭૫૫ આસપાસ પોઝીટીવ બ્રેકઆઉટ!! રૂ.૭૪૫ ના સપોર્ટથી આ સ્ટોક ૭૭૮ થી રૂ.૭૮૫ આસપાસ ભાવ સપાટી નોંધાવે તેવી સંભાવના છે...!!

એક્સાઈડ ઈન્ડસ્ટ્રીઝ (૩૭૦) : રૂ.૩૬૩ નો પ્રથમ તેમજ રૂ.૩૫૫ બીજા સપોર્ટથી ઓટો કમ્પોનન્ટ્સ અને ઇક્વિપ્મેંટ સેક્ટરનો રોકાણલક્ષી આ સ્ટોક રૂ.૩૭૯ થી રૂ.૩૯૦ આસપાસ ભાવ સપાટી નોંધાવે તેવી શક્યતા છે...!!

વિપ્રો લિ. (૨૬૦) : કમ્પ્યુટર્સ - સોફ્ટવેર અને કન્સલ્ટિંગ સેક્ટરનો આ સ્ટોક ટ્રેડીંગલક્ષી રૂ.૨૬૭ થી રૂ.૨૭૪ ના ભાવ સપાટીની રેન્જ મુવમેન્ટ ધરાવે છે!! અંદાજીત રૂ.૨૫૪ નો સ્ટ્રોંગ સપોર્ટ ધ્યાને લેવો...!!!

બજારની ભાવિ દિશા.... મિત્રો, ભારતમાં રોકાણના બદલાતા વલણો સ્પષ્ટ કરે છે કે ભારતીય શેરબજાર આગામી વર્ષોમાં વધુ મજબૂત અને વ્યાપક બનવા જઈ રહ્યું છે. મ્યુચ્યુઅલ ફંડ્સ અને લિસ્ટેડ શેરોમાં વધતી રૂચિ, રોકાણયોગ્ય સંપત્તિમાં તેમનો સતત વધતો હિસ્સો અને ટિયર-૨, ટિયર-૩ શહેરો તરફ વધતો બજાર પ્રવેશ ભારતીય મૂડીબજારના ધોરણોને બદલી રહ્યા છે. ખાસ કરીને યુવા રોકાણકારો અને મહિલાઓનો વધતો પ્રવેશ બજારમાં નવી ઊર્જા અને લાંબા ગાળાના મૂડીપ્રવાહને મજબૂત કરશે. એસઆઈપી મારફતે સતત આવતો સ્થિર નાણા પ્રવાહ બજારને વોલેટિલિટી દરમિયાન પણ સપોર્ટ કરે છે, જે ભારતીય શેરબજારને વધુ રેસિલિયન્ટ અને મજબૂત બનાવે છે. આ તમામ પરિબળો દર્શાવે છે  કે આવનારા સમયમાં ભારતીય બજારમાં ભાગીદારી અને લિક્વિડિટી બંને વધશે, જે ઈક્વિટી માર્કેટને લાંબા ગાળે મજબૂત આધાર પૂરું પાડશે.

જો કે, ભારત હજી પણ કેનેડા, યુએસ, યુકે અને બ્રાઝિલ જેવા દેશોની તુલનામાં ઈક્વિટી અને મ્યુચ્યુઅલ ફંડ રોકાણોમાં ઘણું પાછળ છે, પરંતુ આ જ તફાવત ભારત માટે સૌથી મોટી તક છે. સ્થાનિક સંપત્તિમાં ઈક્વિટી રોકાણનો હિસ્સો વધવા માટે વિશાળ અવકાશ છે અને જ્યારે રોકાણયોગ્ય સંપત્તિ ૨૦૨૫ સુધી ૧૩૦૦-૧૪૦૦ લાખ કરોડ સુધી પહોંચવાની શક્યતા છે, ત્યારે આ બજારમાં વધુ મૂડી પ્રવાહની સંભાવના વધારે છે. ડેમોગ્રાફિક એડ્વાન્ટેજ, વિકાસશીલ ડિજિટલ ઈકોસિસ્ટમ, નિયમનકારી સુધારા અને વધી રહેલી નાણાકીય જાગૃતિ મળીને ભારતને વિશ્વના સૌથી ઝડપથી વિકસતા ઈક્વિટી બજારોમાં સ્થાન અપાવી શકે છે.