દેશના પાંચમા પ્રાઈમ મિનિસ્ટર એવા હતા જેઓને પીએમ પદે રહ્યા ત્યાં સુધી સંસદમાં જવાનો અવસર જ ન મળ્યો!

Author: નોબત સમાચાર

દેશના પાંચમા પ્રાઈમ મિનિસ્ટર એવા હતા જેઓને પીએમ પદે રહ્યા ત્યાં સુધી સંસદમાં જવાનો અવસર જ ન મળ્યો!

સંસદની સુરક્ષામાં ચૂકનો મુદ્દો ગરમાયા પછી દેશભરમાં સંસદની ગરિમા અને સંસદના મહત્ત્વ વિશે ઘણી બધી ચર્ચાઓ થઈ રહી છે. ઘણાં લોકો જાણતા જ હશે કે આપણા દેશના પાંચમા વડાપ્રધાનને વડાપ્રધાનપદે રહ્યા ત્યાં સુધી સંસદમાં પી.એમ. તરીકે ભાગ લેવાનો અવસર જ મળ્યો નહોતો.

આપણા પાંચમા વડાપ્રધાન ચૌધરી ચરણસિંહ હતા. તેઓ ૨૮ જુલાઈ ૧૯૭૯થી ૧૪ જાન્યુઆરી ૧૯૮૦ વચ્ચે વડાપ્રધાન રહ્યા હતા પરંતુ આ દરમિયાન સંસદનું સત્ર જ મળ્યું નહોતું અને કોંગ્રેસે સમર્થન પાછું ખેંચી લેતા તેમણે વડાપ્રધાનપદેથી રાજીનામું આપી દીધુ હતું.

આમ, ચૌધરી ચરણસિંહ ૧૭૦ દિવસ માટે જ વડાપ્રધાન રહ્યા હતા.

ચૌધરી ચરણસિંહ કિસાનોના નેતા હતા અને સ્વતંત્ર ચળવળમાં સક્રિય રીતે જોડાયા હતા. આઝાદી પછી તેઓ ઉત્તરપ્રદેશના મુખ્યમંત્રી પણ બન્યા હતા. આઝાદી પછી તેઓ સમયાંતરે બોહિયાના ગ્રામીણ સુધાર કાર્યક્રમમાં પણ સક્રિય રીતે જોડાયા હતા. તે પછી ભારતીય લોકદળની વર્ષ ૧૯૭૪માં રચના થઈ જેના તેઓ પ્રમુખ બન્યા. ભારતીય લોકદળનું વર્ષ ૧૯૭૭માં જે.પી.ના નેતૃત્વમાં જનતા પાર્ટીમાં વિલીનીકરણ થયું પરંતુ ભાલોદનું ચૂંટણી ચિન્હ હળધારી ખેડૂત જનતા પાર્ટીનું ચૂંટણી પ્રતીક બન્યું. જનતા પાર્ટીની સરકાર બની અને વડાપ્રધાન મોરારજી દેસાઈ બન્યા. તે પછી આંતરિક વિખવાદના કારણે જનતા પાર્ટી તૂટી.

ચૌધરી ચરણસિંહ દ્વારા સ્થાપિત ભારતીય લોકદળ જનતા પાર્ટીમાં વિલીન થયું હતું અને તે પછી જનતા પાર્ટી તૂટી ત્યારે જનતા દળની રચના થઈ. આ નવી રાજકીય પાર્ટીમાંથી છૂટા પડ્યા પછી જનતા દળ બન્યું હતું.

રાષ્ટ્રીય કિસાન દિવસ

કિસાન નેતા ચૌધરી ચરણસિંહના જન્મદિન ૨૩ ડિસેમ્બરે રાષ્ટ્રીય કિસાન દિવસ ઉજવવાની ઘોષણા વર્ષ ૨૦૦૧માં વાજેપયી સરકારે કરી હતી અને ૨૩ ડિસે. ૨૦૦૧થી દેશમાં રાષ્ટ્રીય કિસાન દિવસની ઉજવણી થાય છે.

દેશના પાંચમાં વડાપ્રધાન અને કિસાન નેતા ચૌધરી ચરણસિંઘની સ્મૃતિમાં ઉજવણી થાય છે.

આ દિવસે દેશમાં કિસાનોને સાંકળીને વિવિધ પ્રવૃત્તિઓ થાય છે. કૃષિ યુનિ. સહિત શાળા-કોલેજો, ખેડૂત સંસ્થાઓ, સહકારી સંસ્થાઓ વગેરે દ્વારા આ દિવસની ઉજવણી થાય છે અને ખેડૂતોના ઉત્થાન, કૃષિ વિકાસ અને તદ્વિષય થીમ આધારિત સમારોહો, વ્યાખ્યાનો, ચિત્ર તથા ફિલ્મ પ્રદર્શનો વગેરે યોજાય છે.

કિસાનોની ઉન્નતિ, પ્રગતિ, કલ્યાણ અને કૃષિ વિકાસના વિષયો વિવિધ ક્ષેત્રે અલગ અલગ રીતે ચર્ચાતા હોય છે. આઝાદી પહેલા અને આઝાદી પછી કેટલાક કિસાન આંદોલનો પણ થયા છે.

ખેતીવિકાસનો વિષય પણ હવે ગ્લોબલ બન્યો છે. પ્રાકૃતિક ખેતીના વિકાસ માટે ગુજરાતના રાજ્યપાલ વ્યક્તિગત રીતે પણ ઝુંબેશ ચલાવતા રહે છે. ખેતી વિકાસ અને કિસાન કલ્યાણ સાથે પશુપાલન તથા પશુપાલકોના કલ્યાણના વિષયો તથા વીજ પર્યાવરણના વિષયો પણ પરસ્પર સંકળાયેલા હોવાથી કિસાન દિવસની ઉજવણીના દિવસે બહુ હેતુક પ્રવૃત્તિઓ થતી હોય છે.

વિનોદ કોટેચા

જો આપને આ પોસ્ટ ગમી હોય તો શેર કરો...