પાંડવોએ જ્યાં પૂર્વજોના પીંડ તારવ્યા હતાં, તે પીંડારા ઝંખે છે, પ્રવાસન પ્લેસ તરીકે વિકાસ

Author: નોબત સમાચાર

પાંડવોએ જ્યાં પૂર્વજોના પીંડ તારવ્યા હતાં, તે પીંડારા ઝંખે છે, પ્રવાસન પ્લેસ તરીકે વિકાસ

અહીં દુર્વાષા ઋષિનો આશ્રમ, ૩૨ પ્રાચીન પૂતળાઓ-ભોયરૂ, મહાપ્રભુજીની બેઠક છે

ખંભાળીયા તા. ૨૧: દેવભૂમિ દ્વારકા જિલ્લો જુદા-જુદા ધાર્મિક સ્થાનો માટે જાણીતું છે ત્યારે કલ્યાણપુર તાલુકાનું પિંડારા ગામ અનોખું છે. જ્યાં ભીમ-પાંડવો દ્વારા તેમના પૂર્વજોના પીંડ લોખંડના તરાવીને પિતૃ મોક્ષ કરાવ્યો હતો.

પીંડતારક કૂંડ

ભાટિયા-નંદાણા કે રાણ તરફથી દ્વારકા ચરકલા જતા રોડ પર પંદરેક કિ.મી. ફૂટ પિંડારા એટલે કે, પીંડ તારક ગામ આવેલું છે. જ્યાં સમુદ્રના કાંઠા પર પીંડતારક કૂંડ આવેલો છે. જ્યાં મહાભારતના યુદ્ધ પછી પાંડવોએ આવીને લોખંડના ૧૦૮ પીંડ ઋષિમુનીઓની સલાહથી તરાવ્યા હતાં તથા પિતૃ મોક્ષ કરાવ્યો હતો.

ત્રણ શિવલીંગવાળું મહાદેવનું મંદિર

હાલ વિશાળ જગ્યામાં આવેલ પીંડતારક જગ્યામાં વિશાળ મેદાન સમુદ્રના કાંઠા પાસે પીંડતારક કૂંડ અતિ પ્રાચીન ત્રણ શિવલીંગવાળું મહાદેવનું મંદિર તથા દુર્વાસા ઋષિનો આશ્રમ આવેલો છે.

પાંચ હજાર પુરાણી જગ્યા

આ અતિ પ્રાચીન પાંડવકાલીન જગ્યા કે જ્યાં પાંડવો આવેલા તે પાંચ હજાર વર્ષ પુરાણી જગ્યા છે, પણ અહીં સગવડતા નથી. પવિત્ર કૂંડ ગંદા પાણીથી ભરેલો છે તથા દુર્વાષા આશ્રમ બાજુમાં છે, જ્યાં દુર્વાષા ઋષિ સ્થાપિત અતિ પ્રાચીન ખૂબ જ ઉંચા શિવલીંગ, દુર્વાષા ઋષિ જ્યાં બેસતા તે જગ્યા પ્રાચીન મૂર્તિઓ, બત્રીસ પ્રાચીન પૂતળીઓ જેને દરેક ગણતા જુદો આંકડો આવે, નજીકના સમુદ્રમાં ઉંડે આવેલો અન્ય કૂંડ જ્યાં શ્રાવણ-અમાસના જાણકારો જઈ શકે છે તથા દુર્વાષા આશ્રમ પાસે પ્રાચીન ભોંયરૃં તથા નજીકમાં મહાપ્રભુજીની બેઠક આવેલા છે.

રાણનું વૃક્ષ જ્યાં દુર્વાષા ઋષિ તપ કરતા

પિંડારા ગામની નજીક જ વિશાળ તળાવ જે બારે માસ પાણીથી ભરેલું હોય છે. ત્યાં તળાવના કાંઠે જમીનમાં ૩૦/૩પ ફૂટ ઉંડો અને વિશાળ થડ અને બખોલોવાળું વૃક્ષ રાણનું છે. જે હજારો વર્ષ જુનું છે. જ્યાં દુર્વાષા ઋષિ તપ કરતા હતાં, તે ભવ્ય જગ્યા પણ જોવા લાયક છે. જેનાથી ઘણાં લોકો અજાણ છે.

મલ્સકુસ્તી મેળાની વિશેષતા

પિંડારામાં દર વર્ષે યોજાતો મલ્લ કુસ્તી મેળો પણ ખૂબ જ જાણીતો છે, ત્યારે હાલ ગુજરાત સરકાર પ્રવાસન ક્ષેત્રને મહત્ત્વ આપીને વિકાસ કરી રહી છે ત્યારે ખાસ દ્વારકા જિલ્લાનો વધુ વિકાસ થાય તો અહીં દ્વારકા આવતા હજારો યાત્રિકો દુર્વાષા આશ્રમ, પીંડતારક કૂંડની મુલાકાત લઈ શકે તથા પ્રાચીન રાણ વૃક્ષ જોઈ શકે.

ચરણગંગાનો ઈતિહાસ

દુર્વાષા આશ્રમથી જ શ્રીકૃષ્ણ-રૂક્ષ્મણી રથમાં જાતે જોડાઈને ઘોડાની જગ્યાએ રથ લઈને દ્વારકા દુર્વાષા ઋષિને લઈ જતા ટુંપણી ગામ પાસે રૂક્ષ્મણીને પાણીની તરસ લાગતા ચરણગંગા શ્રીકૃષ્ણએ પ્રગટ કરેલી, જે સ્થળ પણ જાણીતું છે, ત્યારે પ્રવાસન મંત્રી મૂળુભાઈ બેરા દ્વારકા જિલ્લાના ધારાસભ્ય છે, ત્યારે લોકો આ સ્થળના વિકાસની રાહ જુએ છે. આ સ્થળે લોકો બહુ દૂરથી આવે છે, પણ તેમને રહેવાની કોઈ વ્યવસ્થા નથી.

જો આપને આ પોસ્ટ ગમી હોય તો શેર કરો...