વાડીનારના યુવાને પોલીસના મારથી વ્યથિત થઈ કર્યું વિષપાનઃ મૃત્યુ નિપજતા ખળભળાટ

Author: નોબત સમાચાર

વાડીનારના યુવાને પોલીસના મારથી વ્યથિત થઈ કર્યું વિષપાનઃ મૃત્યુ નિપજતા ખળભળાટ

પરિવારજનોએ મૃતદેહ સ્વીકારવાનો ઈન્કાર કર્યાે:

જામનગર તા. ૨૯: ખંભાળિયા તાલુકાના વાડીનાર ગામના એક યુવાનને દારૂના નશામાં લથડીયા ખાતી હાલતમાં પોલીસે પકડી લીધા પછી પોલીસે તોડ કરીને પણ માર મારતા હોવાની કહેવાતી ચર્ચા વચ્ચે માર ખાઈને ઘેર પહોંચેલા આ યુવાને ઝેરી દવા ગટગટાવી હતી. આ યુવાનનું સારવારમાં જામનગર દવાખાને મૃત્યુ નિપજતા ખળભળાટ મચ્યો છે. તેના પરિવારે મૃતદેહ સ્વીકારવાનો ઈન્કાર કરતા દોડધામ મચી ગઈ છે. વધુ વિગત મુજબ વાડીનાર નજીકની નયારા કંપનીમાં ફરજ બજાવતા અને વાડીનારમાં રહેતા કરણસિંહ માલજી જાડેજા નામના યુવાન દારૂ પીધેલી હાલતમાં વાડીનાર પોલીસ સ્ટેશનના સ્ટાફ દ્વારા પકડવામાં આવ્યા હતા. ત્યારપછી પોલીસ મથકે તેને લઈ જઈ માર મારવામાં આવ્યો હતો ત્યારે માર સહન ન થતાં ઘરે જઈ દવા લીધી હતી. ત્યારપછી સારવાર માટે જી.જી. હોસ્પિટલમાં ખસેડવામાં આવ્યા હતા અને સારવાર દરમિયાન તેમનું મૃત્યુ થયું છે.

ત્યારપછી પરિવારજનો દ્વારા માર મારનાર બંને પોલીસકર્મી પર કાર્યવાહી ન થાય ત્યાં સુધી મૃતદેહ સ્વીકારવામાં નહીં આવે તેમ જણાવાતા જી.જી. હોસ્પિટલમાં એનએસયુઆઈના મહિપાલસિંહ જાડેજા, શક્તિસિંહ જાડેજા સહિતના આગેવાનો દોડી આવ્યા હતા. આ બનાવ અંગે એસપીને જાણ કરવામાં આવી હતી અને પરિવારજનો અને આગેવાનો જી.જી. હોસ્પિટલ પહોંચી ગયા હતા.

સૂત્રોના જણાવ્યા મુજબ આ યુવાન પાસે ન મારવા માટે પોલીસે રૂ.૭ હજાર લીધા હતા તે પછી પણ તેને મારવામાં આવ્યો હતો.

જો આપને આ પોસ્ટ ગમી હોય તો શેર કરો...