સાડા ત્રણ વર્ષથી ચાલતુ રશિયા-યુક્રેન યુદ્ધ સમાપ્ત થવાના એંધાણઃ ટ્રમ્પે કરી જાહેરાત

Author: નોબત સમાચાર

સાડા ત્રણ વર્ષથી ચાલતુ રશિયા-યુક્રેન યુદ્ધ સમાપ્ત થવાના એંધાણઃ ટ્રમ્પે કરી જાહેરાત

અલાસ્કામાં ટ્રમ્પ-પુતિનની મુલાકાત પછી

વોશિંગ્ટન તા.૯: એક દાયકા બાદ અમેરિકા રૂસી રાષ્ટ્રપતિ આવશે. અલાસ્કામાં બંને મહારથીઓ વચ્ચે બેઠક યોજાશે. યુક્રેન સંઘર્ષ મંત્રણામાં કેન્દ્ર સ્થાને હશે. સાડા ત્રણ વર્ષથી ચાલતા યુદ્ધનો અંત આવવાના એંધાણ

રશિયા અને યુક્રેન વચ્ચે ચાલી રહેલા યુદ્ધને રોકવાના પ્રયાસરૂપે યુએસ પ્રમુખ ડોનાલ્ડ ટ્રમ્પ આગામી સપ્તાહે તેમના રશિયન સમકક્ષ વ્લાદિમીર પુતિનને મળવાના છે. ટ્રમ્પે સોશિયલ મીડિયા પોસ્ટ દ્વારા જણાવ્યું હતું કે બંને નેતાઓ ૧૫ ઓગસ્ટે રશિયા-યુક્રેન સંઘર્ષ પર ચર્ચા કરવા માટે મળશે. બંને વચ્ચેની મુલાકાત અલાસ્કામાં થવાની છે.

રશિયન સમાચાર એજન્સી ટીએએસએસ એ અહેવાલ આપ્યો છે કે ક્રેમલિનના સહાયક યુરી ઉષાકોવે આ બેઠકની પુષ્ટિ કરી છે. સોશિયલ મીડિયા પર જાહેરાત પહેલાં, ટ્રમ્પે કહૃાું હતું કે યુક્રેનના રાષ્ટ્રપતિ વ્લાદીમીર ઝેલેન્સકી સહિત બંને પક્ષો યુદ્ધવિરામ કરારની નજીક છે જે સાડા ત્રણ વર્ષથી ચાલી રહેલા સંઘર્ષને સમાપ્ત કરી શકે છે. તેમણે સંકેત આપ્યો કે આ માટે યુક્રેનને તેના પ્રદેશનો મોટો ભાગ છોડવો પડી શકે છે.

શુક્રવારે વ્હાઇટ હાઉસમાં પત્રકારો સાથે વાત કરતા તેમણે કહૃાું, 'બંને દેશોના હિતમાં કેટલાક પ્રદેશોનું વિનિમય થશે.' શુક્રવારે સાંજે, યુક્રેનિયન રાષ્ટ્રપતિએ પણ રાષ્ટ્રને સંબોધન કર્યું અને કહૃાું કે જો રશિયા પર દબાણ જાળવી રાખવામાં આવે તો યુદ્ધવિરામ શક્ય છે. તેમણે કહૃાું કે તેમની ટીમ અમેરિકા સાથે સતત સંપર્કમાં છે.

જાન્યુઆરી ૨૦૨૫ માં પોતાનો બીજો કાર્યકાળ શરૂ કર્યા પછી ટ્રમ્પની પુતિન સાથેની આ પ્રથમ સત્તાવાર મુલાકાત છે. જૂન ૨૦૨૧ પછી યુએસ અને રશિયન રાષ્ટ્રપતિઓની આ પ્રથમ ઔપચારિક મુલાકાત હશે. ૨૦૨૧ માં, બિડેન સ્વિટ્ઝર્લેન્ડમાં પુતિનને મળ્યા હતા. પુતિનની અલાસ્કાની મુલાકાત એક દાયકામાં તેમની અમેરિકાની પ્રથમ મુલાકાત હશે.

આ પહેલાં તેમણે સપ્ટેમ્બર ૨૦૧૫ માં ન્યૂયોર્કમાં સંયુક્ત રાષ્ટ્ર મહાસભા દરમિયાન અમેરિકાની મુલાકાત લીધી હતી, જ્યાં તેઓ તત્કાલીન રાષ્ટ્રપતિ બરાક ઓબામાને મળ્યા હતા. જો કે, તેમની ટીમે વાતચીત માટે સંયુક્ત આરબ અમીરાત જેવા ત્રીજા સ્થાનને પસંદ કર્યું હતું. પરંતુ ટ્રમ્પ વહીવટીતંત્રે સુરક્ષા કારણોસર સ્થાનિક સ્થળ પર આગ્રહ રાખ્યો હોય તેવું લાગે છે.

પુતિન અને પોતાની વચ્ચેની મુલાકાતની જાહેરાત કરતા ટ્રમ્પે ટ્રુથ પર લખ્યું, 'યુનાઇટેડ સ્ટેટ્સના રાષ્ટ્રપતિ તરીકે મારી અને રશિયન રાષ્ટ્રપતિ વ્લાદિમીર પુતિન વચ્ચેની બહુપ્રતિક્ષિત મુલાકાત આગામી શુક્રવાર, ૧૫ ઓગસ્ટ, ૨૦૨૫ ના રોજ અદ્ભુત યુએસ રાજ્ય અલાસ્કામાં યોજાશે.

બ્લુમબર્ગ ન્યૂઝના અહેવાલ મુજબ, આ સંભવિત કરાર હેઠળ, રશિયા ખેરસન અને ઝાપોરિઝિયા પ્રદેશોમાં તેની લશ્કરી કાર્યવાહી બંધ કરશે. જાન્યુઆરીમાં વ્હાઇટ હાઉસ પરત ફર્યા બાદ, ટ્રમ્પે રશિયા સાથે સંબંધો સુધારવા અને યુદ્ધનો અંત લાવવાનો પ્રયાસ કર્યો છે.

જો આપને આ પોસ્ટ ગમી હોય તો શેર કરો...