હાલારમાં કાળજુ કંપાવતી ઠંડીઃ ન્યુનત્તમ ૧ર ડીગ્રી

Author: નોબત સમાચાર

હાલારમાં કાળજુ કંપાવતી ઠંડીઃ ન્યુનત્તમ ૧ર ડીગ્રી

ઝપાટાબંધરીતે ફૂંકાતા તેજીલા વાયરાઓના પગલે

જામનગર તા. ર૬: જામનગરમાં ઝપાટાબંધરીતે ફૂંકાતા તેજીલા વાયરાઓના પગલે એક ડીગ્રીના ઘટાડા સાથે ન્યુનત્તમ તાપમાન ૧ર ડીગ્રી નોંધાયું હતું. ઉત્તર ભારતમાંથી આવતા ઠંડા અને ગતિમાન પવનના પગલે હાલરમાં કાળજુ કંપાવતી ઠંડીથી પ્રજાજનો ધ્રુજી ઊઠ્યા છે.

જમ્મુ-કાશ્મીર, ઉત્તરાખંડ અને હિમાચલ પ્રદેશમામં હિમવર્ષાનો દોર યથાવત્ રહ્યો છે. હિમાલય ક્ષેત્ર પરથી આવતા હિમ સમાન ઠંડા પવનની અસર પંજાબ, હરિયાણા, રાજસ્થાન, મધ્યપ્રદેશ સહિતના રાજ્યોમાં પડી રહી છે.

ઉત્તર ભારતના બર્ફિલા પવનના પગલે ગુજરાતમાં પણ અસહ્ય ઠંડી અનુભવાઈ રહી છે. કચ્છ, જૂનાગઢ, બનાસબાંઠા, સૌરાષ્ટ્ર સહિતના ભાગોમાં કડકડતી ઠંડી પડી રહી છે.

જામનગરમાં છેલ્લા ચોવીસ કલાક દરમિયાન પવનની ગતિ પ્રતિકલાકની સરેરાશ ૩૦ થી ૪પ કિ.મી.ની રહેવા પામી હતી. ગતિમાન પવન વચ્ચે એક ડીગ્રીના ઘટાડા સાથે ન્યુનત્તમ તાપમાન ૧ર ડીગ્રી અને અડધો ડીગ્રી વધીને મહત્તમ તાપમાન ર૩.પ ડીગ્રી નોંધાયું હતું. ઉત્તર ભારતના પહાડો પરથી આવતા હિમસમાન ઠંડા અને તેજીલા વાયરાઓના પગલે સમગ્ર હાલાર પંથકમાં ઠંડીનું મોજુ ફરી વળ્યું છે. જામનગર અને દેવભૂમિ દ્વારકા જિલ્લામાં કાળજુ કંપાવતી ઠંડી પડી રહી છે. હાલારવાસીઓ અસહ્ય ઠંડીથી ધ્રુજી ઊઠ્યા છે. જનજીવન ઠૂંઠવાઈ ગયું છે. હાલારમાં ખાસ કરીને ગ્રામ્ય અને નગરસીમ વિસ્તારો તથા વાડી વિસ્તારોમાં તીવ્ર ઠંડી અનુભવાઈ રહી છે. કાળજુ થરથરાવતી ઠંડી સામે રક્ષણ મળે તે માટે હાલારવાસીઓ સ્વેટર, ગરમ વસ્ત્રો અને ગરમ પીણા તથા તાપણાનો સહારો લઈ રહ્યા છે.

નગરમાં આજે સવારે પૂરા થતા ચોવીસ કલાક દરમિયાન ૧૧ ટકા વધીને વાતાવરણમાં ભેજનું પ્રમાણ પ૭ ટકા રહ્યું હતું.

જો આપને આ પોસ્ટ ગમી હોય તો શેર કરો...