સોયલ પાસે ટ્રક ડ્રાઈવર પર જેક છટકતા ત્રાટકી ટ્રકઃ સારવારમાં નિપજ્યું મૃત્યુ

Author: નોબત સમાચાર

સોયલ પાસે ટ્રક ડ્રાઈવર પર જેક છટકતા ત્રાટકી ટ્રકઃ સારવારમાં નિપજ્યું મૃત્યુ

પાછળથી ડમ્પરે ટ્રકને ઠોકર મારતા સર્જાયો અકસ્માતઃ

જામનગર તા. ૨૮: ધ્રોલ પાસે સોયલ ટોલનાકા નજીક સોમવારે બપોરે મીની ટ્રકની એક્સેલ તૂટી જતાં જેક ચઢાવી તે ટ્રકના ડ્રાઈવર ટ્રક નીચે જઈ રીપેરીંગ કરતા હતા ત્યારે પાછળથી એક ડમ્પર ટકરાઈ પડતા જેક છટકતા મીની ટ્રક ડ્રાઈવર પર ત્રાટક્યો હતો અને ગંભીર ઈજા પામેલા ડ્રાઈવરનંુ મૃત્યુ નિપજ્યું હતું.

જામનગર-રાજકોટ રોડ પર આવેલા ધ્રોલ નજીકના સોયલ ટોલનાકાથી અંદાજે ૭૦૦ મીટર દૂરથી ગયા સોમવારે બપોરે રાજકોટની દિનેશ શોપ ફેકટરીની જીજે-૩-બીવાય ૮૨૯૫ નંબરની મીની ટ્રક પસાર થતી હતી.

આ વેળાએ તેમાં એક્સેલ તૂટી જતા મીની ટ્રકના ડ્રાઈવર અમિતભાઈ નીચે ઉતરી ટ્રકમાં જેક ચઢાવ્યા પછી રીપેરીંગ કરતા હતા ત્યારે અચાનક પાછળથી પુરપાટ ઝડપે ધસી આવેલા જીજે-૧૬-એવી ૭૧૧૧ નંબરના ડમ્પરે મીની ટ્રકને ઠોકર મારી હતી.

જેક પરથી મીની ટ્રક ઉતરી ગયા પછી નીચે સુઈને કામ કરતા ડ્રાઈવર અમિત અતુલભાઈ ગઢાદરા પર પડી હતી. આ અકસ્માતમાં માથા સહિતના શરીરના અન્ય ભાગમાં ઈજા પામેલા અમિતભાઈનું સારવારમાં ખસેડાયા પછી મૃત્યુ નિપજ્યું છે. દિનેશ શોપ ફેકટરીવાળા રાજકોટના સંજય કાંતિલાલ શાહે ડમ્પરના ચાલક સામે ધ્રોલ પોલીસ સ્ટેશનમાં ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...