જામનગરના તબીબના ક્લેઈમ ન ચૂકવતી વીમા કંપની સામે ગ્રાહક ફોરમનો આદેશ

Author: નોબત સમાચાર

જામનગરના તબીબના ક્લેઈમ ન ચૂકવતી વીમા કંપની સામે ગ્રાહક ફોરમનો આદેશ

ખોટી રીતે કાપેલી રકમ ચૂકવવા હુકમઃ

જામનગર તા. ૧૮: જામનગરના એક તબીબની પુત્રીને મેડિક્લેઈમ અંતર્ગત ચૂકવવાની થતી રકમ વીમા કંપનીએ ન ચૂકવતા અને એક આસામીની મેડિકલેઈમ પોલિસી અંતર્ગત તેમના પુત્રને થયેલા અકસ્માત તથા આ આસામીને લેવી પડેલી સારવારની રકમમાંથી વીમા કંપનીએ કાપકુપ કરી હતી તેથી ગ્રાહક ફોરમમાં ધા નખાઈ હતી. ફોરમે વીમા કંપનીને રકમ ચૂકવવા આદેશ કર્યાે છે.

જામનગરમાં વસવાટ કરતા ડો. રૂપેનભાઈ દોઢીઆએ ધી નેશનલ ઈન્સ્યુરન્સ કંપની પાસેથી પોતાના તથા પરિવારની મેડિક્લેઈમ પોલિસી મેળવી હતી. ત્યારપછી તેમની પુત્રીને હોસ્પિટલમાં દાખલ કરવામાં આવી હતી અને બેરીયાટ્રીક ઓપરેશન કરાવ્યું હતું.

ઓપરેશન થઈ ગયા પછી ક્લેઈમ ફોર્મ સાથે ઓપરેશન તથા સારવારના તમામ પેપર્સ રજૂ કરી વીમા કં૫ની સમક્ષ રૂા.૧ લાખ ૪૫ હજારના ખર્ચ માટે કલેઈમ કરાયો હતો. તે કલેઈમ વીમા કંપનીએ રદ્દ કરતા ગ્રાહક ફોરમમાં ફરિયાદ કરાઈ હતી. ફોરમે તે રકમ પર છ ટકા વ્યાજ ગણી રકમ ચૂકવી આપવા વીમા કંપનીને આદેશ કર્યાે છે.

જામનગરના પંકજભાઈ નાંઢાએ સ્ટાર હેલ્થ એન્ડ એલાઈડ કંપની પાસેથી મેડિકલેઈમ મેળવ્યા પછી તેમના પુત્રને અકસ્માત થતાં સારવાર લેવી પડી હતી. જેમાં રૂા.૧,૨૫,૫૦૦નો ખર્ચ થયો હતો. વીમા કંપનીએ રૂા.૬૦,૫૫૦ કાપી બાકીની રકમ ચૂકવી હતી અને પંકજભાઈને સારવારમાં થયેલા ખર્ચમાંથી રૂા.૨૩,૬ર૯ કાપી લેવાયા હતા. તેથી પંકજભાઈએ ગ્રાહક ફોરમમાં ફરિયાદ કરી હતી. ઉપરોક્ત ફરિયાદ ચાલી જતા ફોરમે પ્રથમ ફરિયાદમાં રૂા.૬૦૫૫૦ તથા બીજી ફરિયાદમાં રૂા.૨૩૬૨૯ ચૂકવી આપવા અને ફરિયાદ ખર્ચ આપવા વીમા કંપનીને હુકમ કર્યાે છે. ફરિયાદીઓ તરફથી વકીલ વસંત ગોરી, દીપક નાનાણી, નેહલ સંચાણીયા રોકાયા હતા.

જો આપને આ પોસ્ટ ગમી હોય તો શેર કરો...